Abdías 1 - Papang Yulni

Edom sau kau bukna

¹ Baisa di kaikalahwas kau yulni balna Abdías duna dai kidika, Papang kaupak. Papang yulni as dakana mayang; yul muryang as nisan balna yakat kiuna, diyulna atnin: “¡Lapaknin! ¡War kalbauna mawang Edom nining yakat!” Papang yaklauwi Edom yakat kalyulwi:

² “Dibin mayamki, nisan balna bitik pasyakat, dawak nuhni palni laih sau yakat buknaman karang.

³ Man manah kapat kaldakaman kidika yaklauwi alas mayulna. Kipala sahna walsah yakat yalahtaman, dawak bik sakman mayakau, kidika bahang kaldakaman muih as bik kidika kaupak malakwas karang.

⁴ Yakal-nuh kapat mayak ilyawama, dawak uma kidika yala yakat yamma bik kidika kaupak yamting kat bukma.” Papang kaput yulwi:

⁵ “Di malyang balna kidika pukta aiwi di mamalwarang laih, bitik laih duwi uiwas karang ki; wain minik balna kidika man yakat aiwarang kat, wain minik kidika as as dadawang. Kauna nawatwakat, man waihmala balna laih madaukalpamna.

⁶ ¡Amput dima duduna yah, Esau! ¡Di minit nuhni balna dutaman balna dai kidika bitik mamalna!

⁷ Aslah alahwanamana muihni balna bitik alas mayuyulna; man sauma kaupak makangwi yayakna. Man karak kaltalyang tanit yamni dai kidika man namangkauh yaklalauna, dawak malaihnin dini támapas yakat ahana. ¡Edom laih sinsni yudutni awas ki!”

⁸ Papang aput yulwi: “Yang Edom yakat wiski mani kat, sins duyang muihni balna duwa sakkidika bitik dismukki, dawak sinsni yudutni duwa kidika bik dakyakki, dawak Esau asangnipas kau bangkidika balna bik.

⁹ Temán ahalni war kalbauyang balna kidika diyukwarang, dawak Esau asangnipas kau muih balna kidika as bik sangnika duwas karang.

Edom dutni yamna balna

¹⁰ “Asalni manah mamukwi lakna karang, dawak madaukalpamwarang ban kaput atnin, man wirahma Jacob kau dutni kalyamta inaman kidika yulni.

¹¹ Waihla kidika yaklauwi tawan nuhni dini balna kidika yakwi duduwakat, dawak kalbauyang muihni balna sau uk kaupak kidika Jerusalén durni babahwakat, ¡man pirini yakat islawanaman dai! Di dakyayakna balna kidika tanka walwi tatalna wais yakat bukwarang kidika, dawak ritsni balna kidika duwi uina, ¡dawak witingna yayamwa kaput man bik yamna man!

¹² Man alasna dunam awasdai, wirahma kidika dutni yakat sakkat, Judá kidika dutni yakat kana kat man tala alasna dunam awas dai, dawak witingna kulninna kaida mani yakat sarahni diyulnam awasdai.

¹³ Yang tawanki nuhni yakat awanam-awas dai, dalani wauhwa mani yakat, dawak dutni yakat sakkidika yulni bik alasna dunam awas dai witing mani dutni dai yakat, dawak dini minit nuhni balna kidika bik manam awas dai, witing di dis dana mani yakat.

¹⁴ Dutni balna amput barangni anin sip-awas dai kiri yaklalawa balna yakat, dawak bik kaidinin mani balna yakat kalahwi kikira balna kidika laihta muih tingni yakat tuk-ánam awas dai.

¹⁵ Uk balna yakat yamnaman kaput man yaakt bik yamna karang: ¡man mamat duma! “Papang mani kidka ulisdana nisan balna bitik yakat.

Israel kidika mayakat dulauna karang

¹⁶ Ampus tapalhni dai sunitaka manna dinamana kidika, yang asangki holi yakat, kaput tapalhni karang sunitak kidika, bahang nisan balna kidika ulupwi didina karang; dawak pini didisna karang.

¹⁷ Kauna Sayan asangni kidika laih ban karang pa as holi, bahang muih as as kiri yaklalana karang kidika pani yakat. Jacob sulani balna saunina kidika watwi duduna karang;

¹⁸ Jacob dawak José sulani balna kidika laih kuhpau karang, dawak kuhpau dalhwi kilwa kapat karang, dawak Esau muihni balna laih dibasta kusuni kapat karang, bahang kidika kuhnipau yaklauwi bitik palni busna karang. ¡Esau muihni balna kidika as bik yaklawas karang! Yang, Papangyang kat yultayang.”

^19-20 Néguev kau Israel balna kidika, Esau sauni kau asang balna yakat kawi panina duduwarang, dawak walang kau bangdai kidika balna laih filisteo balna saunina yakat kawi duduna karang. Kaput bik Efrain sauni kidika duduwarang, dawak Samaria sauni bik, dawak Benjamín muihni balna laih Galaad sauni kidika duduwarang. Israel muihni balna saunina kaupak di kangwi yayakna balna kidika Canaán muihni balna saunina yakat kawi duduna karang Sarepta kat, dawak Jerusalén muihni balna warau lani kau bangkidika Sefarad yakat, witingna Néguev tawanni nunuhni balna yakat kawi duduna karang.

²¹ Kilwi uiwarang minit bayakna balna bahang Sayan asangni yakat, Esau asangni balna kau muihni balna yakat lanina yamna atnin, dawak Papang laih king kana karang.