Ɀireʋo 1 - Shona BIBLE

Basa rezvirevo

¹ Zvirevo zvaSoromoni, mwanakomana waDhavhidhi, mambo waIsiraeri.

² Kuti vanhu vazive uchenjeri nokurairirwa; Nokunzwisisa mashoko enjere;

³ Varairirwe nzira yokungwara, Neyokururama, nokururamisa, nokutendeka;

⁴ Vasina mano vapiwe kungwara, Jaya ripiwe zivo nokuchenjera;

⁵ Kuti wakachenjera anzwe, awedzere kudzidza; Nomunhu wenjere awane mano akanaka.

⁶ Vanzwisise chirevo nomufananidzo, Mashoko avakachenjera nezvirahwe zvavo.

Munhu ngaanzvenge vatadzi vanonyengedzera

⁷ Kutya Jehovha ndiko kuvamba kwezivo; Mapenzi anoshora uchenjeri nokurairirwa.

⁸ Mwanakomana wangu, inzwa kurairira kwababa vako; Usarasha kudzidzisa kwamai vako.

⁹ Nokuti zvichava chishongo chakanaka pamusoro wako, Nengetani pamutsipa pako.

¹⁰ Mwanakomana wangu, kana vatadzi vachikugombedzera, Usatenda iwe.

¹¹ Kana vachiti, “Hendei tose, Ngatirindire ropa; Ngativandire vasina mhosva kunyangwe pasina mhaka.

¹² Ngativamedze vari vapenyu seSheori, Vari vakukutu saivo vanoburukira kugomba.

¹³ Tichawana pfuma yamarudzi mazhinji; Tichazadza dzimba dzedu nezvatakapamba;

¹⁴ Iwe uchava mumwe wedu; Tose tichava nechikwama chimwechete.”

¹⁵ Mwanakomana wangu, usafamba navo nenzira yavo; Dzora rutsoka rwako panzira yavo;

¹⁶ Nokuti tsoka dzavo dzinovangira zvakaipa; Vanokurumidza kudurura ropa.

¹⁷ Nokuti mumbure unodzikirwa pasina Shiri dzamarudzi ose dzichizviona.

¹⁸ Vanhu ava vanogarira ropa ravo vamene; Vanozvivandira upenyu hwavo.

¹⁹ Ndizvo zvakaitawo nzira dzavose vanokarira pfuma; Zvinotorera mwene wazvo upenyu hwake.

Uchenjeri hunodana vasina njere

²⁰ Uchenjeri unodanidzira panzira dzomumusha; unonzwisa izwi rahwo panzvimbo dzakafara;

²¹ Unodana panzvimbo panoungana vazhinji; Pavanopinda pamasuwo, Paguta, ndipo pahunotaura mashoko ahwo, huchiti,

²² “Nhai imi vasina mano, muchada kusava namano kusvikira rinhiko? Nemi vaseki kufarira kuseka kwenyu, Namapenzi kuvenga zivo?

²³ Dzokai kana muchinzwa kuraira kwangu, Tarirai ndichadurura mweya wangu pamusoro penyu; Ndichakuzivisai mashoko angu.

²⁴ Zvandakadana, imi mukaramba; Ndikatambanudza ruoko rwangu, kukasava nomunhu akarangarira;

²⁵ Asi makazvidza mano angu ose, Mukaramba chose kuraira kwangu,

²⁶ Naizvozvo neniwo ndichaseka kana mava munhamo yenyu; Ndichakudadirai, kana kutya kwenyu kuchisvika.

²⁷ Kana kutya kwenyu kuchisvika sedutu guru, Nenhamo yenyu ichisvika sechamupupuri; Kana kutambudzika nokudumbirwa zvichikuwirai.

²⁸ Nenguva iyo vachadana kwandiri, asi handingapinduri; Vachanditsvaka zvikuru, asi havangandiwani.

²⁹ Zvavakavenga zivo, Vakasazvitsaurira kutya Jehovha,

³⁰ Vakaramba mano angu ose, Vakashora kuraira kwangu kwose,

³¹ Naizvozvo vachadya zvibereko zvenzira yavo; Vachagutswa namano avo.

³² Nokuti kudzokera shure kwavasina mano kuchavauraya, Kusava nehanya kwamapenzi kuchavaparadza.

³³ Asi ani naani anonditeerera achagara zvakasimba, Achagadzikana, asingatyi zvakaipa.”