ƲaKorose 1 - Shona BIBLE

Kwaziso

¹ Pauro, mupostori waKristu Jesu nokuda kwaMwari, naTimoti, hama yedu,

² kuvatsvene nehama dzakatendeka muna Kristu vari paKorose: Nyasha ngadzive nemi, norugare zvinobva kuna Mwari; Baba vedu.

Kuvonga kwaPauro pamusoro pavo

³ Tinovonga Mwari, Baba vaIshe wedu Jesu Kristu, nguva dzose kana tichikunyengetererai,

⁴ zvatakanzwa zvokutenda kwenyu muna Kristu Jesu, norudo rwamunarwo kuvatsvene vose,

⁵ pamusoro petariro yamakachengeterwa kudenga, yamakanzwa kare pashoko rechokwadi reVhangeri;

⁶ iyo yakasvika kwamuri, sezvayakasvika panyika yosewo; ichibereka zvibereko, ichikura, sezvainoita kwamuriwo, kubvira pazuva ramakanzwa nokuziva kwazvo nyasha dzaMwari muchokwadi;

⁷ sezvamakadzidza kuna Epafirasi, muranda pamwechete nesu, anodikanwa, mushumiri akatendeka waKristu nokuda kwenyu,

⁸ iye akatiudzawo zvorudo rwenyu muMweya.

Pauro anovanyengeterera

⁹ Saka nesuwo, kubvira pazuva ratakanzwa, hatiregi kukunyengetererai, nokukumbira kuti muzadziswe nokuziva kwazvo kuda kwake, pakuchenjera nokunzwisisa kwose kwomweya;

¹⁰ kuti mufambe sezvinofanira Ishe, muchimufadza pazvose, muchibereka zvibereko pamabasa ose akanaka, muchikura pakuziva Mwari kwazvo;

¹¹ muchisimbiswa nesimba rose, nesimba rokubwinya kwake, muve nomwoyo murefu, nomufaro;

¹² muvonge Baba, vakatikwanisa kuti tipiwe nhaka yavatsvene muchiedza;

¹³ vakatisunungura pasimba rerima, vakatiisa muushe hwoMwanakomana worudo rwavo;

¹⁴ watine dzikinuro maari, ndiko kukanganwirwa kwezvivi zvedu.

¹⁵ Ndiye mufananidzo waMwari usingaonekwi, dangwe rezvisikwa zvose;

¹⁶ nokuti maari zvinhu zvose zvakasikwa, zviri kudenga napanyika, zvinoonekwa nezvisingaonekwi, kana zviri zvigaro zvoushe, kana ushe, kana vabati, kana masimba; zvinhu zvose zvakasikwa naye, zviripo nokuda kwake.

¹⁷ Ndiye anotangira zvose, zvose zvakabatana maari.

¹⁸ Ndiye musoro womuviri, ndiyo sangano; ndiye wokutanga, dangwe ravakamuka kuvakafa; kuti iye ave mukuru pazvinhu zvose.

¹⁹ Nokuti Baba vakafara nazvo, kuti kuzara kwose kugare maari,

²⁰ kuti naye ayananise zvinhu zvose kwaari, amboita rugare neropa rake rakaparadzirwa romuchinjikwa naiye, kunyangwe zviri panyika, kunyangwe zviri kudenga.

²¹ Nemiwo, kare maiva vaeni navavengi pakufunga kwenyu pamabasa enyu akaipa,

²² asi zvino wakakuyananisai nomuviri wenyama yake, nokufa kwake, kuti akuisei pamberi pake muri vatsvene, musina mhosva, musingapomerwi,

²³ kana muchingorambira pakutenda makateyiwa, mumire makasimba, musingabviswi patariro yeVhangeri yamakanzwa, yakaparidzirwa zvisikwa zvose pasi pokudenga; iyo Vhangeri yandakaitwa mushumiri wayo, ini Pauro.

Kutambudzika kwaPauro pamusoro pavo

²⁴ Zvino ndinofara pakutambudzika kwangu nokuda kwenyu, ndichizadzisa panyama yangu zvakasara pamatambudziko aKristu, nokuda kwomuviri wake, iro sangano;

²⁵ iro randakaitwa mushumiri waro sezvandakagoverwa naMwari pamusoro penyu, kuti ndizadzise shoko raMwari;

²⁶ ndicho chakavanzika, chakanga chakafukidzwa kubvira pakutanga kwenguva nendudzi, asi zvino chakaratidzwa vatsvene vake;

²⁷ kuna ivo Mwari waakada kuvazivisa upfumi hwokubwinya kwechakavanzika ichochi pakati pavahedheni, chokuti, Kristu mukati menyu, tariro yokubwinya;

²⁸ iye watinoparidza isu, tichirayira munhu mumwe nomumwe, tichidzidzisa munhu mumwe nomumwe nouchenjeri hwose, kuti tiise munhu mumwe nomumwe akakwana muna Kristu;

²⁹ ndizvo zvandinobatirawo, ndichirwa, zvichiitwa nokubata kwake kunobata mukati mangu nesimba.