Nahumi 1 - Shona BIBLE

Jehovha anotsiva vavengi vake, asi anoruramisira vanhu vake

¹ “Chirevo chaMwari pamusoro peNinivha. Bhuku yezvakaonekwa naNahumi muErikoshi.

² “Jehovha ndiye Mwari ane godo, anotsiva; Jehovha anotsiva, azere nehasha; Jehovha anotsiva vadzivisi vake, anochengetera vavengi vake hasha dzake.

³ Jehovha haakurumidzi kutsamwa, une simba guru, haangatongopembedzi ane mhosva; nzira yaJehovha iri pakati pechamupupuri nedutu, makore iguruva retsoka dzake.

⁴ Anotuka gungwa, achiri omesa, anopwisa nzizi dzose; Bhashani rinoshaiwa simba, uye Karimeri, ruva reRebhanoni rinoshaiwa simba.

⁵ Makomo anodedera pamberi pake, zvikomo zvinonyauka; nyika inosimuka pamberi pake, zvirokwazvo, iyo nyika yavose vagerepo.

⁶ Ndiani angamira pamberi pehasha dzake? Ndiani angaramba amire pakutsamwa kwake kukuru? Hasha dzake dzakadururwa somoto, matombo akaputsanyiwa naye.

⁷ Jehovha akanaka, inhare nezuva rokutambudzika; iye anoziva vanotizira kwaari.

⁸ Asi achaparadza kwazvo nzvimbo yeguta nemvura inokukura, achidzingana navavengi vake kusvikira murima.

⁹ Munorangarireiko pamusoro paJehovha? Iye achaparadza chose; nhamo haingamukizve rwechipiri.

¹⁰ Nokuti kunyangwe kupindana-pindana seminzwa, kana kuita savakabatwa nezvavakanwa, vachaparadzwa chose samashanga akaoma.

¹¹ “Mumwe akabuda pakati penyu anorangarira zvakaipa pamusoro paJehovha, anorangana zvisina maturo.

¹² Zvanzi naJehovha, ‘Kunyangwe vane simba ravo rose, vakawandawo, kunyangwe zvakadaro vachatemwa, iye achaparara. Kunyangwe ndakakutambudzai, handingazokutambudziyizve.’

¹³ Zvino ndichavhuna joko rake, ribve kwamuri, ndichadamburanya zvisungo zvenyu.

¹⁴ “Jehovha akaraira pamusoro penyu, kuti vezita renyu varege kuzodyarwazve; mumba mavamwari venyu ndichaparadza zvifananidzo zvakavezwa nezvifananidzo zvakaumbwa; ndichakuchererai hwiro; nokuti makashata kwazvo.

¹⁵ “Tarirai pamakomo tsoka dzounouya namashoko akanaka, anoparidza rugare! Itai mitambo yenyu, imi Judha, itai zvamakapika, nokuti akaipa haangazopfuurizve napakati penyu; akaparadzwa chose.