Mupiro 1 - Shona BIBLE

Mirairo yezvipiriso zvinopiswa

¹ Zvino Jehovha akadana Mosesi, akataura naye ari mutende rokusangana, akati,

² “Taura navana VaIsiraeri, uti, kwavari, ‘Kana mumwe wenyu achida kuvigira Jehovha chipo chake, munofanira kumuvigira zvipo zvenyu zvezvipfuwo, kana zvemombe kana zvamakwai.’

³ “Kana chipo chake chiri chipiriso chinopiswa chemombe, anofanira kuvigira mukono asina chipomerwa; ngaachibayire pamukova wetende rokusangana, kuti agamuchirwe pamberi paJehovha.

⁴ Zvino ngaaise ruoko rwake pamusoro wechipiriso chinopiswa, kuti chigamuchirwe panzvimbo yake, chimuyananisire.

⁵ Ngaabaye nzombe pamberi paJehovha, vanakomana vaAroni, vapristi, vagouya neropa, vasase ropa kunhivi dzose dzeatari, iri pamukova wetende rokusangana.

⁶ Zvino ngaavhiye chipiriso chinopiswa, nokuchigura–gura.

⁷ “Zvino vanakomana vaAroni, mupristi, ngavaise moto paatari, nokugadzirawo huni pamusoro pomoto.

⁸ Ipapo vanakomana vaAroni, vapristi, vanofanira kugadzira nhindi, nomusoro, namafuta pamusoro pehuni dziri pamoto uri pamusoro peatari.

⁹ Asi ngaasuke hura hwacho namakumbo acho nemvura, mupristi agopisa zvose paatari, chive chipiriso chinopiswa, chipiriso chinoitwa nomoto, chinonhuwira zvakanaka kuna Jehovha.

¹⁰ “Kana chipo chake chiri chipiriso chinopiswa chezvipfuwo zviduku zvamakwai kana mbudzi, anofanira kuvigira mukono asina chipomerwa.

¹¹ “Ngaachibaye parutivi rweatari nechokumusoro pamberi paJehovha; zvino vanakomana vaAroni, vapristi, vanofanira kusasa ropa racho kunhivi dzose dzeatari.

¹² Ipapo anofanira kugura–gura nhindi pamwechete nomusoro wacho namafuta acho, mupristi agozvigadzira pamusoro pehuni dziri pamoto pamusoro peatari.

¹³ Asi ura namakumbo ngaazvisuke nemvura, mupristi agozvibayira zvose, nokuzvipisira paatari, kuti chive chipiriso chinopiswa, chipiriso chakaitwa nomoto, chinonhuwira zvakanaka kuna Jehovha.

¹⁴ “Kana chipo chake kuna Jehovha chiri chipiriso chinopiswa cheshiri, ngaavigire chibayiro chake chenjiva, kana twana twenjiva.

¹⁵ Zvino mupristi anofanira kuchiisa paatari, agodonhedzera ropa racho parutivi rweatari;

¹⁶ zvino anofanira kutora chihururu chayo neminhenga yayo, ndokuzvirasa kurutivi rweatari kumabudazuva kunoraswa madota.

¹⁷ Ipapo anofanira kuibvambura namapapiro ayo asingaiparadzanisi, mupristi agoipisa paatari pamusoro pehuni dziri pamoto; icho chipiriso chinopiswa, chipiriso chakaitwa nomoto, chinonhuwira zvakanaka kuna Jehovha.