Mariko 1 - Shona BIBLE

Johani Mubhabhatidzi

¹ Kutanga kweVhangeri yaJesu Kristu, Mwanakomana waMwari.

² Sezvazvakanyorwa mumuporofita Isaya zvichinzi, “Tarira, ‘Ndinotuma munyai wangu pamberi pako,’ Achakunatsira nzira yako;

³ Izwi raanodana murenje, ‘Gadzirai nzira yaIshe, Ruramisai migwagwa yake.’ ”

⁴ Johani akauya achibhabhatidza murenje, achiparidza rubhabhatidzo rwokutendeuka kuti vanhu varegererwe zvivi zvavo.

⁵ Nyika yose yeJudhiya, navanhu veJerusaremu vose vakaenda kwaari, vakabhabhatidzwa naye muna Jodhani, vachireurura zvivi zvavo.

⁶ Johani akanga akapfeka nguo yamakushe engamera, nebhandi reganda muchiuno chake; aidya mhashu nouchi hwesango.

⁷ Akaparidza, achiti, “Shure kwangu kunouya mumwe ane simba kupfuureni, wandisino kufanira kukotama kuti ndisunungure rukanda rweshangu dzake.

⁸ Ini ndakakubhabhatidzai nemvura, asi iye achakubhabhatidzai naMweya Mutsvene.”

Kubhabhatidzwa kwaJesu

⁹ Namazuva iwayo Jesu akabva Nazareta muGareriya, akabhabhatidzwa naJohani muna Jodhani.

¹⁰ Pakarepo achibuda mumvura, akaona denga richizarurwa, naMweya achiburukira pamusoro pake senjiva;

¹¹ izwi rikabva kudenga, richiti, “Ndiwe Mwanakomana wangu mudiwa, ndinokufarira.”

Kuedzwa kwaJesu

¹² Pakarepo Mweya akamubudisira kurenje;

¹³ akava murenje mazuva makumi mana, achiedzwa naSatani; akagara nezvikara, vatumwa vakamushumira.

Jesu anodana vadzidzi vokutanga

¹⁴ Johani akati asungwa, Jesu akasvika Gareriya, achiparidza Vhangeri yaMwari,

¹⁵ achiti, “Nguva yazadziswa, ushe hwaMwari hwaswedera pedyo; tendeukai, mutende Vhangeri.”

¹⁶ Akati achifamba pagungwa reGareriya, akaona Simoni, naAndireya, munun'una waSimoni, vachikandira usvasvi mugungwa, nokuti vakanga vari vabati vehove.

¹⁷ Jesu akati kwavari, “Nditeverei, kuti ndikuitei vabati vavanhu.”

¹⁸ Vakasiya usvasvi hwavo pakarepo, vakamutevera.

¹⁹ Akati apfuura zvishoma, akaona Jakobho, mwanakomana waZebhedhi, naJohani munun'una wake, vachigadzira usvasvi muigwa.

²⁰ Akavadana pakarepo, vakasiya baba vavo Zebhedhi muigwa navaranda, vakamutevera.

Jesu anoporesa munhu aiva nomweya wakaipa paKapenaume

²¹ Vakapinda Kapenaume; pakarepo nomusi weSabata akapinda musinagoge, akadzidzisa.

²² Vakashamiswa nokudzidzisa kwake, nokuti akavadzidzisa somunhu ane chiremera, asingaiti savanyori.

²³ Zvino musinagoge ravo makanga muno munhu akanga anomweya wakaipa, akadanidzira,

²⁴ achiti, “Tine mhaka yeiko nemi, Jesu weNazareta? Mauya kuzotiparadza kanhi? Ndinokuzivai kuti ndimi ani; muri Mutsvene waMwari.”

²⁵ Zvino Jesu akamuraira; akati, “Nyarara, ubude kwaari!”

²⁶ Mweya wakaipa akamubvundisa, ndokudanidzira nezwi guru, ndokubuda kwaari.

²⁷ Vakatya zvikuru vose, nokudaro vakaita nyaya, vachiti, “Chiiko ichi? Kudzidzisa kutsva kune simba! Anoraira kunyangwe nemweya yakaipa ikamuterera.”

²⁸ Pakarepo mukurumbira wake ukanzwika panyika yose yakapoteredza yeGareriya.

Jesu anoporesa vambuya vaPetirosi, navamwe

²⁹ Pakarepo vakati vachibva musinagoge, vakapinda mumba maSimoni naAndireya, Jakobho naJohani vanavo.

³⁰ Vambuya vaSimoni vakanga vavete vachirwara nefivha; pakarepo vakamuudza izvozvo.

³¹ Akaenda, akavabata noruoko, akavamutsa; fivha ikavarega, vakavashandira.

³² Madekwana, zuva ravira, vakaisa kwaari vose vakanga vachirwadziwa, navakanga vakabatwa nemweya yakaipa.

³³ Guta rose rakanga raungana pamusuwo.

³⁴ Akaporesa vazhinji vakanga vachirwadziwa namarudzi ehosha, akabudisa mweya yakaipa mizhinji; asi akanga asingatenderi mweya yakaipa kutaura, nokuti yakanga ichimuziva.

³⁵ Mangwanani kuchine rima, akamuka akabuda, akaenda kunzvimbo murenje, akandonyengeterapo.

³⁶ Simoni, navakanga vanaye, vakamutevera.

³⁷ Vakamuwana, vakati kwaari, “Vose vanokutsvakai.”

³⁸ Akati kwavari, “Ngatiende kumwe, kumisha iri pedyo, kuti ndinoparidza ikokowo, nokuti ndizvo zvandakauyira.”

³⁹ Akaenda, akaparidza mumasinagoge avo muGareriya rose achibudisa mweya yakaipa.

Jesu anoporesa munhu ana maperembudzi

⁴⁰ Zvino munhu aiva namaperembudzi akauya kwaari, akakumbira zvikuru kwaari, ndokupfugama pamberi pake, akati kwaari, “Kana muchida henyu, munogona kundinatsa.”

⁴¹ Akamunzwira ngoni, akatambanudza ruoko rwake, akamubata, akati kwaari, “Ndinoda, chinatswa.”

⁴² Pakarepo maperembudzi akabva kwaari, akanatswa.

⁴³ Zvino akamurayira kwazvo, akamuendesa pakarepo.

⁴⁴ Akati kwaari, “Chenjera kuti urege kuudza munhu chinhu; asi enda uzviratidze kumupristi, ubayire pamusoro pokunatswa kwako zvakarairwa naMosesi, chive chapupu kwavari.”

⁴⁵ Asi iye akabuda, akatanga kuzviudza vanhu vazhinji, nokuparidzira shoko iro, nokudaro Jesu akanga asingagoni kupinda muguta pachena, asi akanga ari kunze panzvimbo murenje; vakauya kwaari vachibva kumativi ose.