Mapisarema 8 - Shona BIBLE

Kukudzwa kwomunhu naJehovha

Kumutungamiriri wokuimba; neGititi. Pisarema raDhavhidhi.

¹ Haiwa Jehovha, Ishe wedu, Zita renyu rakaisvonaka sei panyika yose! Makaisa umambo hwenyu kudenga.

² Pamiromo yavacheche navanoyamwa makaisa simba, Nokuda kwavadzivisi venyu, Kuti munyaradze muvengi nomutsivi.

³ Kana ndichicherechedza denga renyu rose, iro basa reminwe yenyu, Mwedzi nenyenyedzi zvamakarongedza;

⁴ Munhu chiiko, zvamunomufunga? NoMwanakomana womunhu zvamunomushanyira?

⁵ Nokuti makamuita muduku zvishoma kuna Mwari, Makamushongedza korona yokubwinya nokukudzwa.

⁶ Makamubatisa ushe hwamabasa amaoko enyu; Makaisa zvose pasi petsoka dzake.

⁷ Makwai ose nenzombe, Nemhuka dzesango;

⁸ Neshiri dzokudenga, nehove dzegungwa, Izvo zvose zvinofamba nenzira dzegungwa.

⁹ Haiwa Jehovha, Ishe wedu, Zita renyu rakaisvonaka sei panyika yose!