Mapisarema 5 - Shona BIBLE

Dhavhidhi anokumbira kuti afambiswe zvakanaka pakati pavavengi vake

Kumutungamiriri wenziyo; nenyere. Pisarema raDhavhidhi.

¹ Inzwai mashoko angu, Jehovha, Rangarirai kufunga kwomwoyo wangu.

² Teererai izwi rokuchema kwangu, imi Mambo wangu, naMwari wangu; Nokuti ndinonyengetera kwamuri.

³ Jehovha, muchanzwa izwi rangu mangwanani; Mangwanani ndichakurongedzerai munyengetero wangu, ndichirindira.

⁴ Nokuti hamuzi Mwari anofarira zvakaipa, Munhu, akashata, haangagari nemi.

⁵ Munhu, anozvikudza, haangamiriri pamberi penyu; Munovenga vose vanoita zvakaipa.

⁶ Muchaparadza vanoreva nhema; Jehovha anosema munhu anoteura ropa neanonyengera.

⁷ Asi kana ndirini, ndichapinda mumba menyu nokuwanda kwounyoro hwenyu, Ndichanamata ndakaringira kutemberi yenyu tsvene ndichikutyai.

⁸ Ndifambisei, Jehovha, mukururama kwenyu nokuda kwavavengi vangu; Gadzirai nzira yenyu pamberi pangu.

⁹ Nokuti hapana kutendeka pamiromo yavo; Mukati mavo makashata shata; Huro dzavo hwiro hwakashama; Vanobata kumeso norurimi rwavo.

¹⁰ Muvape mhosva, Jehovha; Ngavawe namano avo; Muvadzinge nokuda kwokuwanda kwokudarika kwavo; Nokuti vakakumukirai.

¹¹ Asi vose vanovimba nemi ngavafare, Ngavadanidzire nomufaro nguva dzose, nokuti imi munovadzitira; Vose vanoda zita renyu ngavafare nemi.

¹² Nokuti mucharopafadza akarurama; Imi Jehovha, muchamukomberedza nenyasha senhoo.