Ester 1 - Kari Utux Baro Seediq Tgyada

Sqada Axasreros Qbsuran Paru ka Wastiy Mqedil Qbsuran Paru

¹ Ndaan knxalan Axasreros qbsuran paru ciida ka nii. Qmlahang peeyah Hodu betaq Kusu 1'27 dxeral nyusan ka Axasreros.

² Kiya ka pkelu qmlahang qlhangan na Susan pusu alang ka Axasreros.

³ Tg3 knkawas, psliun na qdiyal uqan mqaras ka kana qbsuran mdudul ma dqbsuran mdayo. Ckceka daha we, niqan dqbsuran mdudul peeyah Paras, Maday ma, pneeyah knkingal dxeral meeyah berah na hiya.

⁴ Ciida ka qbsuran paru we 1'80 ali sptuura na qmita ka qnbleyaq qlhangan ma knpruwan qbsranan na.

⁵ Mnhedu ka ali nii de, qbsuran paru we mk7 ali qdalan na uqan mqaras nganguc ga niqan phepah sapah qbsuran paru ka kana seediq ani rdrudan, laqi ma qrinuc alang Susan hiya.

⁶ Nganguc hiya we bkean snuyuk mtgdiyuc ka eruc btunux mkere ma spqeya cuqi ging ka galiq bhege ma mtlawa. Pniqun bobo dxeral pndpingan pqapah btunux mgsama, btunux mkere mbhege, tmayan mtumun bhege ma btunux mkere mqalux ka tluungun bbaro snmalu king ma ging.

⁷ Dmoi pngerah mahan snmalu king tmquri sino ma, ini pntena ka klegan pngerah mahan sino. Qbsuran paru we sphuwe na piimah kana seediq ka sino qbsuran paru.

⁸ Miimah sino we, asi ka niqan gaya, ini ptkeeyux seediq, ado pnosa kari kana dmqbsuran mdudul, pdai lnglungan daha nanak mooda.

⁹ Wastiy mqedil qbsuran paru uri we qdiyal uqan mqaras dmqedil sapah Axasreros qbsuran paru hiya.

¹⁰ Tg7 ali ka Axasreros qbsuran paru de sgcuqi qaras nmahan na sino ma posa kari 7 heyi gnbgaxan mdayo qbsuran paru. Kiya ka Mehuman, Bijta, Xarbona, Bigta, Abagta, Jetar ma Karkas.

¹¹ Pkbnuhi bunuh qbsuran paru ka Wastiy mqedil qbsuran paru ma adis hini. Ado mqedil qbsuran paru nii we mseediq bale qtaan, qmpqtaun na kana seediq ma dqbsuran mdayo.

¹² Kiya de Wastiy mqedil qbsuran paru we ini puyu kari pnosa qbsuran paru meyah, kiya ka mseang bale ka qbsuran paru ma betaq msqama ka seang na.

¹³ Spooda gaya qbsuran paru we, asi ka smiling dsslingun ka moda oda. Ciida, smiling dsslingun ka qbsuran paru.

¹⁴ Kiya ka 7 heyi mheyu ssiyo mdayo dqbsuran paru Paras ma Maday na we Karsena, Setar, Admata, Tarsis, Meres, Marsena ma Memukan:

¹⁵ “Ini qbahang pnosa kari Axasreros rnengo dgnbgaxan ka Wastiy mqedil qbsuran paru we spooda gaya de huwa kesun pkdira ka mqedil nii ho?”

¹⁶ Memukan we cmiyuk berah qbsuran paru ma dqbsuran mdudul: “Pnqihan Wastiy mqedil qbsuran paru we uxe wano qbsuran paru nanak, kana dqbsuran ma seediq gaga dxeral qlhangan Axasreros qbsuran paru uri.

¹⁷ Ado nasi wada klaun kana mqedil qlhangan nii ka noda mqedil qbsuran paru de mprading psbiciq qmita rseno daha nanak da. Mprengo: ‘Pnlawa Axasreros qbsuran paru ka Wastiy mqedil qbsuran paru we wada ini qbahang!’

¹⁸ Saya, mbahang noda mqedil qbsuran paru ka dmqedil qbsuran Paras ma Maday de, mpkchaya rmengo quri kana rseno daha. Kiya de ida maha mbrebur bale ka smbiciq qmita ma knseang daha.

¹⁹ Netun su so mesa malu we posa 1 nanak kari, psai ckceka gaya Paras ma Maday hiya betaq ani knuwan iya sresi. Peeyah saya, iya srwai ptqita Axasreros qbsuran paru ka Wastiy. Kiya de qbsuran paru we biqi mqedil tgkala knmalu Wastiy ka qbsranan mqedil qbsuran paru.

²⁰ Dehuk mxmuxi dxeral paru qlhangan qbsuran paru ka pnosa kari nii de peeyah qbsuran betaq toma ka dmqedil daha we, ani mbleyaq ma, ini qbleyaq ka rseno daha we, ida daha pspruun qmita.”

²¹ Mndungus lnglungan qbsuran paru ma dqbsuran mdudul ka kari nii de, asi puyu nkari Memukan ka qbsuran paru.

²² Kiya de paadis patis knkingal dxeral nyusan qmlahang ka qbsuran paru. Patis we dmoi patis daha ma kari daha nanak. Tai so tnpusu tnsapah ka rseno daha ma, txtaxa daha we mprengo kari daha nanak.