मलाकीको पुस्तक 1 - सरल नेपाली पवित्र बाइबल

¹ इस्राएलका मानिसहरूलाई सुनाउन परमप्रभुले मलाकीलाई यो सन्‍देश दिनुभयो।

इस्राएलमाथि परमप्रभुको प्रेम

² परमप्रभुले आफ्‍ना प्रजालाई भन्‍नुहुन्‍छ, “मैले तिमीहरूलाई सधैँ प्रेम गरेको छु।” तर तिनीहरूले जवाफ दिन्‍छन्, “तपाईंले हामीप्रति आफ्‍नो प्रेम कसरी देखाउनुभयो?” परमप्रभुले उत्तर दिनुहुन्‍छ, “एसाव र याकूब दाजुभाइ थिए तर मैले याकूब र त्‍यसका सन्‍तानहरूलाई प्रेम गरें

³ र एसाव र त्‍यसका सन्‍तानहरूलाई घृणा गरें। एसावको पहाडी देश विध्‍वंस गरी त्‍यहाँका जग्‍गाजमिन स्‍यालहरूलाई छोडिदिएँ।”

⁴ एसावका सन्‍तानहरू एदोमीहरूले यदि “हाम्रा सहरहरू नाश त पारिए तर हामी ती सहरहरूलाई फेरि बनाउनेछौं,” भन्‍छन् भने परमप्रभुले यस्‍तो उत्तर दिनुहुनेछ, “तिनीहरू फेरि बनाउँदैजाऊन्, म ती फेरि भत्‍काइ दिनेछु। मानिसहरूले तिनीहरूलाई ‘दुष्‍ट देश’ र ‘परमप्रभु त्‍योमाथि सधैँ रिसाउनुभएको जाति’ भन्‍ने नाम दिनेछन्।”

⁵ इस्राएलका मानिसहरूले आफ्‍नै आँखाले यी सबै कुराहरू देख्‍नेछन् र “इस्राएल देशबाहिर पनि परमप्रभु सामर्थी हुनुहुन्‍छ,” भन्‍नेछन्।

परमप्रभुले पूजाहारीहरूलाई हप्‍काउनुहुन्‍छ

⁶ सर्वशक्तिमान् परमप्रभुले पूजाहारीहरूलाई यसो भन्‍नुहुन्‍छ, “छोरोले बुबालाई आदर गर्छ। चाकरले मालिकलाई आदर गर्छ। म तिमीहरूका बुबा हुँ भने तिमीहरूले किन मेरो आदर गर्दैनौ? म तिमीहरूका मालिक हुँ तर तिमीहरूले मलाई किन आदर गर्दैनौ। तिमीहरूले मलाई तिरस्‍कार गर्छौ र फेरि भन्‍छौ, ‘हामीले कसरी तपाईंलाई तिरस्‍कार गर्‍यौं?’

⁷ तिमीहरूले मलाई यसरी तिरस्‍कार गर्‍यौ, मेरो वेदीमा तिमीहरूले अशुद्ध रोटी चढायौ। तब फेरि तिमीहरू सोध्‍दछौ, ‘कसरी हामीले तपाईंलाई अनादर गर्‍यौं त?’ म भन्‍दछु, मेरो वेदीलाई अपमान गरेर तिमीहरूले मलाई अनादर गर्‍यौ!

⁸ तिमीहरू जब मकहाँ बलि चढाउन अन्‍धा वा बिरामी वा लङ्गडा पशु ल्‍याउँदछौ, के त्‍यो ठीकै कुरा हो भनी सोच्‍दछौ? त्‍यस्‍तो पशु बडा-हाकिमलाई दिएर हेर त! के उनी तिमीहरूसित खुसी होलान्? तिमीहरूलाई उनले केही कुरामा कृपा गर्लान् त?”

⁹ तिमी पूजाहारीहरूले अब परमेश्‍वरलाई हामीमाथि कृपादृष्‍टि गर्नुहोस् भनी बिन्‍ती गरी हेर। तिमीहरूले हातमा यस्‍तो भेटी लिई आउँदा के उहाँले तिमीहरूलाई ग्रहण गर्नुहुनेछ र?

¹⁰ सर्वशक्तिमान् परमप्रभु भन्‍नुहुन्‍छ, “तिमीहरूलाई मेरो वेदीमा व्‍यर्थको आगो बाल्‍न रोक्‍नलाई तिमीहरूमध्‍ये कसैले मन्‍दिरको ढोका बन्‍द गरिदिए त हुनेथियो। म तिमीहरूसित प्रसन्‍न छैनँ, तिमीहरूले ल्‍याएका भेटी म ग्रहण गर्नेछैनँ।

¹¹ पृथ्‍वीभरिका एक छेउबाट अर्को छेउसम्‍मका मानिसहरूले मलाई आदर गर्छन्। हरेक ठाउँमा तिनीहरूले मलाई धूप बाल्‍छन् र उचित बलिहरू चढाउँछन्। तिनीहरू सबैले मेरो आदर गर्छन्!

¹² तर तिमीहरूले मेरो अनादर गर्छौ किनकि तिमीहरूले मेरो वेदी बेकामको ठहर्‍याएर त्‍यसमा तिरस्‍कार गरिएको भोजन चढाउँछौ।

¹³ तिमीहरू भन्‍छौ, ‘हामीलाई यी सबै दिक्‍क लागिसक्‍यो’ र आफ्‍ना नाक खुम्‍च्‍याउँछौ। चोरेका वा लङ्गडा वा बिरामी पशु भेटी चढाउन ल्‍याउँछौ। के ती भेटीहरू म ग्रहण गर्छु भनी तिमीहरू ठान्‍दछौ?

¹⁴ तर त्‍यस्‍तो छली मानिसलाई सराप लाग्‍छ, जसले आफ्‍नो बगालमा मलाई चढाउन भाकल गरेको असल पशु छँदाछँदै पनि मलाई खोट लागेको पशु बलि चढाउँदछ किनकि म महान् राजा हुँ। सबै जातिका मानिसहरूले मेरो डर मान्‍छन्।”