हिब्रू 1 - घले नयाँ करारस्वर्गदूतयू यली च केन् ख्यङ् 1 परमेश्वर मीयूङ्जे सेमेने अगमवक्तायूप्रे क्यूत्देबे कूम फे मेस्ये कूम तर्तीप्दे ङीन्जे मेमेयूप्रे क्यम्दे। 2 तर अम्ब आखिरी दिनयूने परमेश्वर रङ्से चप्रे क्यूत्देबे ङीनप्रे क्यम ख्यङ्। ङूदे रङ्से चने साप्ता सेयूजे हक पीन्देबे चून्तीदे, परमेश्वरदे रङ्से चप्रे क्यूत्देबे अम्ब संसार मेस्ये यैयाने ख्यब साप्ताकूरूने सृष्टि चीत्दे। 3 परमेश्वरने ख्यब महिमाजे रूप् चने तङ्क्य मेस्ये परमेश्वरजे स्वभावयू क्वाने ङूप्रे ख्यङ्, होर्दे अम्ब संसारने ख्यब साप्ता सेयू रङ्से शक्तिजे वचनदे रङ्से रङ्से नेने छ्यान ख्यङ्। मीयूजे पापने क्षमा पीन जेन ङ्येदे महिमाने ख्यब परमेश्वरजे स्येत्देयोर् देन् छ्यादे। 4 केर्बे ङूदे प्रेब मीन् स्वर्गदूतयूजे यली थेप् सोरो ज्य ख्यङ्, होर्बेने स्वर्गदूतयूजे यली ङूजे हक थेप् केन् ठर्तीक ख्यङ्। 5 “न ङैजे च ख्यङ्, ङैदेने नने जन्मेदे ख्यङ्” यदेबे येशूने यब पो परमेश्वरदे कम्ब स्वर्गदूतने कलङ् यदे स्व?, होर्दे, फेरि, “ङ ङूजे प क्यूक्क्य, मेस्ये ङू ङैजे च क्यूक्क्य” यब पो परमेश्वरदे कम्ब स्वर्गदूतने कलङ् यदे स्व? 6 पात्ता खूम् जन्मीदेब रङ्से च संसारने रेप्प ङूदे फेरि यख्यङ्, “परमेश्वरजे स्वर्गदूत क्वादेने ङूनेने पूस्तीनीस्य।” 7 परमेश्वरदे स्वर्गदूतयूजे बारेने य ख्यङ्, “ङूदे रङ्से स्वर्गदूतयूने उन्दू मेस्ये रङ्से त्वोयूने मीजे उम्द चीम्मीय।” 8 तर ङूदे चजे बारेने य ख्यङ्, “परमेश्वर, नैजे सिंहासन येतार्जे लागि टूनीय, मेस्ये रङ्से मीयू फ्याने ज्य न्याय चीत्देबे राज्य चीक्क्य। 9 न्याय चेब पोने नदे प्रेम चेख्यङ्, मेस्ये दुष्ट पोने नदे घिन चेख्यङ्। येरेक्यूत्देबे परमेश्वर, नैजे परमेश्वरदे नने रङ्से ख्योन्यू यली थेप् सूग्लाबे चेब मूर्गूदे अभिषेक चीम्मे ख्यङ्।” 10 ङूदे फेरि य ख्यङ्, “परमप्रभु, नदेने पात्ता खूम् पृथ्वीजे जा पूत्दे, मेस्ये तो-मूने ख्यब साप्ताने नैजे लादे बन्दीदे। 11 हम्ब क्वाने नाश क्यूप्पीय, तर नब कलङ्नेयली क्यून्नीय। हम्ब क्वाने ह्वेब कोलाप्र ङीङ् क्यूप्पीय, 12 खट्टो यूरप्र नदे हम्ब क्वाने यूर्क्य, ह्वेब कोलाप्रने हम्ब फेर्दीय। तर न ब कलङ्नेयली त्याप्र क्यून्नीय। न येतार्जे लागि सोम्बो क्यून्नीय।” 13 “तर परमेश्वरदे कम्ब स्वर्गदूतने कलङ् येरे यदे स्व, न ङैजे स्येत्तेयोर् टूङ्, कन्छ्वासेमे ङ नैजे शत्रुयूने नैजे तोप् त्याङ् नङ्ने अन्-येत्दा?” 14 हम्ब स्वर्गदूतयू क्वाने मूक्ति प्रेब मीयूजे लागि सेवा चेने कूल्बेब परमेश्वरजे सेवा चेब आत्मायू ते या? |
Ghale New Testament © Nepal Bible Society, 2011.
Nepal Bible Society