Salāmo 8 - O LE TUSI PAIA

O LE SALAMO VIII. Ua viia Ieova ona o ana galuega. Ma le usu pese i le kata. O le salāmo a Tavita.

¹ Ieova e, lo matou Alii, e silisili lava lou suafa i le lalolagi uma lava; o oe lava ua e faasilisili lou viiga i le lagi.

² Ua e faatumauina le viiga i gutu o tama meamea ma tama fesusui, ona o e faasaua ia te oe, ina ia faanofosaoina le ua ita ma le ua taui ma sui.

³ A ou vaai atu i lou lagi, o le galuega a ou tamatamai lima, o le masina atoa ma fetu na e faia;

⁴ se a ea le tagata e te manatu mai ai ia te ia; ma le atalii o le tagata e te asiasi mai ai ia te ia?

⁵ Auā ua e faamaulalo ane teisi o ia i agelu; ua e faapaleina foi o ia i le mamalu ma le matagofie.

⁶ Ua e foaiina ia te ia le pule i galuega a ou aao; ua e tuuina mea uma i lalo o ona vae;

⁷ o lafu mamoe ma povi uma lava, atoa ma manu vaefa o le vao;

⁸ o manu felelei, ma i‘a o le sami, ua tataa i ala o le sami.

⁹ Ieova e, lo matou Alii, e silisili lava lou suafa i le lalolagi uma lava.