Salāmo 6 - O LE TUSI PAIA

O LE SALAMO VI. O le tagi a Tavita i lona tiga; o lona faatuatua ia Ieova. Ma le usu pese i nekina i le seminita. O le salāmo a Tavita.

¹ Ieova e, aua e te aoai mai ia te au i lou toasa; aua foi e te sasa ia te au i lou toasa tele.

² Ieova e, ia e alofa mai ia te au, auā ua vaivai lava a‘u; Ieova e, ia e faamalolo mai ia te au, auā ua tetemu lava o‘u ivi.

³ Ua matuā polepole vale foi lo‘u loto; a o oe Ieova e, seia afea?

⁴ Ieova e, ia e toe foi mai, ia e laveai i lo‘u agaga; ia e faaola mai ia te au ona o lou alofa.

⁵ Auā e leai se manatu ia te oe i le oti; o ai ea se vivii atu ia te oe i le tuugamau?

⁶ Ua ou lailoa i lo‘u oi; ua lofia lo‘u moega i po uma lava; ua se vai le mea ou te moe ai i o‘u loimata.

⁷ Ua fole o‘u mata i lo‘u tiga; ua matatoeaina lava, ona o i latou uma o e saua mai ia te au.

⁸ Ina o ese atu ia ia te au, o outou uma o e fai amio leaga; auā ua faafofogaina e Ieova le leo o lo‘u tagi.

⁹ Ua faafofogaina e Ieova la‘u aioi atu; ua talia e Ieova la‘u tatalo.

¹⁰ E mamā ma matuā gatete lava i latou uma o e fai a‘u mo latou fili; e toe foi i latou, e faafuasei lava lo latou ma.