Salāmo 18 - O LE TUSI PAIA

O LE SALAMO XVIII. O le pese faafetai a Tavita i le Atua auā o le tele o lona alofa ia te‘ia. Ma le usu pese. O le salāmo a le auauna a Ieova o Tavita, na ia fai atu ia Ieova o upu o lenei pese i le aso na laveai mai ai Ieova ia te ia ai lima o e na ita mai ia te ia uma lava, atoa ma le lima o Saulo; ua faapea atu.

¹ Ieova e, lo‘u malosi, ou te alofa lava ia te oe.

² O Ieova o lo‘u papa ia, ma lo‘u ‘olo, ma lo‘u faaola; o lo‘u Atua, o lo‘u papa, ou te faatuatua ia te ia; o lo‘u talita, ma le nifo o lo‘u olataga, o lo‘u ‘olo maualuga.

³ Ou te valaau ia Ieova, e tatau ona viia o ia; o lea e faaolaina ai a‘u i e ua ita mai ia te au.

⁴ Na siosiomia a‘u i mailei e oti ai, na faamatautia foi a‘u i tafega a e ulavavale.

⁵ Na siomia a‘u i mailei a seoli; na ou lumanai o matāsele a le oti.

⁶ Ona ou valaau atu ai lea ia Ieova i lo‘u puapuaga, ma ou alaga atu i lo‘u Atua; na faafofoga mai o ia i lona malumalu i lo‘u leo, na oo atu ia te ia la‘u alaga i ona lava fofoga.

⁷ Ona luluina ai lea ma mafuie le lalolagi; ua gatete foi faavae o mauga, ua luluina i latou, auā na toasa lava o ia.

⁸ Ua alu ae le asu i on pogaiisu; o le afi mai lona fofoga ua maamaai lea; ua mu ai malala ola.

⁹ Na lolou ifo e ia lagi ma afio ifo; o le pogisa foi sa i lalo o ona aao.

¹⁰ Na tietie ia i le kerupi, ma ua lele; na lele ia i apaau o le matagi.

¹¹ Na faia e ia o le pouliuli ma mea e lilo ai o ia; o lona apitaga ua siomia ai o ia, o le vai pouliuli, o ao uliuli o le lagi.

¹² Na mavae ese atu o ana ao ona o le pupula na i ona luma; o uato‘a ma malala ola o le afi.

¹³ Na faititili foi Ieova mai le lagi, na tŭlei ifo e le Silisili ese o lona siufofoga; o uato‘a ma malala ola o le afi.

¹⁴ Na fana atu e ia ana u fanafana, ma faataapeape ia te i latou; ma ana uila e tele, ua tuli ai ia te i latou.

¹⁵ Ona iloa atu ai lea o iliti vai, ua aliali mai o faavae o le lalolagi i lau aoaiga, Ieova e, o le mapugatamai o ou fofoga.

¹⁶ Ua ia aapa mai lona aao mai luga, ma tago ia te ua, ua ia faaea ia te au ai vai e tele.

¹⁷ Ua ia laveai mai ia te au ai le tagata malosi na ita mai, ma e na ‘ino‘ino ia te au; auā na sili lo latou malosi i lo‘u.

¹⁸ Na latou lumanai a‘u i le aso o lo‘u malaia; a o Ieova, o ia na ou faalagolago i ai.

¹⁹ Ua ia aumaia a‘u i le mea lautele; ua ia laveai ia te au, auā ua finagalo alofa mai o ia ia te au.

²⁰ Ua tauia mai a‘u e Ieova e tusa ma la‘u amiotonu; ua taui mai e ia ia te au e tusa ma o‘u lima mamā.

²¹ Auā ua ou tausia ala o Ieova, ma a‘u le lafoai faalematau i lo‘u Atua.

²² Auā ua ou lumanai pea ana faamasinoga uma; na ou le tuueseina foi ana tulafono ia te au.

²³ Na ou amiotonu i ona luma, na ou taofia a‘u ina ne‘i o‘u agasala.

²⁴ O lenei, ua tauia a‘u e Ieova e tusa ma la‘u amiotonu, e tusa ma o‘u lima mamā i ona luma.

²⁵ E te amio alofa oe i le ua alofa; e te amiotonu oe i le tagata amiotonu.

²⁶ E te amio mamā oe i le ua amio mamā; e te faapiopio foi oe i le ua faapiopio.

²⁷ Auā o oe lava, e te faaolaina le nuu ua tigaina; a o e ua mata faasiasia, e te faamaualaloina i latou.

²⁸ Auā foi e te tutu mai la‘u lamepa; e faamalamalamaina lo‘u pouliuli e Ieova lo‘u Atua.

²⁹ Auā o oe na ou sofai ai le ‘au; o lo‘u Atua na ou osopuna ai i le pa.

³⁰ O le Atua, e sao lava lona ala; ua se ario ua te‘a ma le otaota afioga a Ieova; o ia lava o le talta o i latou uma o e faatuatua ia te ia.

³¹ Auā o ai ea le Atua, ua na o Ieova? O ai ea le papa, ua na o lo tatou Atua?

³² O le Atua lea o loo fusia a‘u i le malosi, ua ia faalaulelei foi i lo‘u ala.

³³ Ua na faia o‘u vae ia pei o vae o aila; ua ia faatuina lava a‘u i a‘u mea maualuga.

³⁴ Ua ia a‘oa‘o i o‘u lima e tau ai le taua; ua lolou ai e o‘u lima le aufana ‘apa memea.

³⁵ Ua e foaiina foi ia te au le talita o le olataga mai ia te oe; ua faatumauina a‘u e lou aao taumatau; o lou agamalu ua faasilisiliina ai a‘u.

³⁶ Ua faalauteleina e oe le mea ou te savali ai, ne‘i mapeva o‘u vae.

³⁷ Na ou tuliloa i e na fai a‘u mo latou fili, ma ou maua; na ou faaumatia i latou, ona ou faatoa foi mai lea.

³⁸ Na ou fāsia i latou, ua latou le mafaia ona tutū i luga; na pauu i latou i lalo o o‘u vae.

³⁹ Ua e fusia a‘u i le malosi mo le taua; ua e faatoilalo i e na laga mai ia te au.

⁴⁰ O oe ua liutuaina mai ai ia te au o e ua fai a‘u mo latou fili; ua fano foi ia te au o e na ‘ino‘ino mai ia te au.

⁴¹ Na alalaga i latou, a ua leai se faaola; na alalaga i latou ia Ieova, a ua na le tali atu ia te i latou.

⁴² Ona ou nutininii lea ia te i latou, e pei o le efuefu ona lelea i le matagi; na ou sasaaina atu i latou e pei o le palapala i le ala.

⁴³ Na e laveai ia te au ai fefinauaiga ma le nuu; ua e tofia a‘u ia ou pule i nuu ese; e anauna mai ia te au le nuu na ou le iloa.

⁴⁴ A latou lagona, ona latou faalogo ai lea ia te au; e faatagā vivii mai ia te au tagata ese.

⁴⁵ E mavae atu tagata ese; e tetemu i latou i mea ua latou puipuia mo i latou.

⁴⁶ O loo soifua Ieova, ia faafetaia foi lo‘u papa; ma ia viia le Atua o lo‘u faaolataga.

⁴⁷ O le Atua lea o loo faia le taui ma sui mo a‘u; o le ua faatoilaloina foi le nuu ia te au.

⁴⁸ O le ua laveaiina a‘u i e ua ita mai ia te au; ua e faasilisiliina foi a‘u i e na laga mai ia te au; ua e laveaiina a‘u i le tagata faasaua.

⁴⁹ O le mea lava lea, Ieova e, ou te vivii atu ai ia te oe i luma o nuu ese; ou te pese atu foi i lou suafa.

⁵⁰ O le ua faia o le olataga tele i lana tupu; e agalelei foi o ia i le na ia faauuina, o Tavita lava lea, atoa ma lana fanau e oo i le faavavau.