Salāmo 1 - O LE TUSI PAIA

O LE SALAMO I. O le manuia o le ua amiotonu, ma le malaia o le ua amio leaga.

¹ Amuia le tagata e le savali i le filifiliga a e amio leaga, e le tu foi o ia i le ala o e agasala, e le nofo foi i le nofoa o e tauemu;

² a e naunau o ia i le tulafono a Ieova; e mafaufau foi o ia i lana tulafono i le ao atoa ma le po.

³ O ia foi e faapei o le laau ua totō i tafatafa ane o vaitafe, e fua mai ona fua i ona lava tau; e le toulu foi ona lau; e manuia foi mea uma na te faia.

⁴ E le faapea o e amio leaga; a e pei o aputi o saito i latou ua lelea i le matagi.

⁵ O le mea lea e le tutū ai o e amio leaga i le faamasinoga, e le tutū foi tagata agasala i le faapotopotoga o e amiotonu.

⁶ Auā ua silafia e Ieova le ala o e amiotonu; a e fano lava le ala o e amio leaga.