Pese 2 - O LE TUSI PAIA

O LE MATAUPU II.

¹ O a‘u o le fuga o le laau i Sarona; o le susana i vanu.

² E pei o le susana i totonu o laau talatala, o loo faapea la‘u uo i teine.

³ E pei o le moli i totonu o laau o le vao, o loo faapea lo‘u manamea i taulelea. Na ou fiafia i lona paolo, ma ou nofo ai; na suamalie foi ona fua i lo‘u gutu.

⁴ Na ia aumaia a‘u i le fale uaina; o lana fu‘a i o‘u luga, o le alofa lea.

⁵ Ia outou faamalosia a‘u i potoi vine; ina fofola mai ia o moli; auā o a‘u ua ou vaivai i lo‘u alofa atu.

⁶ Ua i lalo o lo‘u ulu lona lima tauagavale, ua fusi mai foi ia te au lona lima taumatau.

⁷ Tama fafine o Ierusalema e, ou te fai atu ia te outou, ia tauto mai i sevi ma aila o le vao, tou te le tatatuli pe fafagu i la‘u pele, seia faitalia o ia.

⁸ O le leo o lo‘u manamea! faauta, o loo sau o ia, o loo osooso i luga o mauga, o loo matuā osooso foi i mea maupuepue.

⁹ E pei o se sevi, po o se tamai aila lo‘u manamea. Faauta, o loo tu mai o ia i tuāpa o lo tatou fale; o loo silasila mai i faamalama, o loo pupula mai lona tino i le mea faamataupega.

¹⁰ Na tautala mai lo‘u manamea, ua faapea mai ia te au, Si a‘u uo e, si o‘u lalelei e, ina tulai mai ia oe, ina sau ia;

¹¹ auā, faauta mai ia, ua mavae le tausaga maalili, ua mavae le timuga, ua te‘a ia.

¹² Ua iloa atu fuga i le fanua; ua oo mai le tau e teuteu ai vine; ua lagona foi le leo o le manutagi i lo tatou nuu;

¹³ ua matua fua le mati sa moto; ua puaiina foi le nanamu o vine ua fuga. Si a‘u uo e, si o‘u lalelei e, ina tulai ia oe, ina sau ia.

¹⁴ La‘u lupe e, ua i ana o papa ma lafitaga o i mato, ina faaali mai ia ou mata ia te au; so‘u faalogo i lou leo; auā o le leo mălie lou leo, e lalelei ou mata.

¹⁵ Ina outou pupue ia mā tatou o alope, o alope iti, o e faamāumau i vine; auā ua fua o tatou vine.

¹⁶ O lo‘u manamea, o lo‘u lava ia, e fai foi a‘u mona; ua ia fafaga i lona lafu i totonu o susana.

¹⁷ Lo‘u manamea e, ina foi mai ia seia gafoa le ata, ma mavae le ufiata, ia avea oe e faapei o se sevi po o se tamai aila i mauga o Petere.