Mataio 26 - O LE TUSI PAIA

O LE MATAUPU XXVI. Ua taupulepule le au faitaulaga sili ia Iesu e fasioti ia te ia.

¹ Ua faaiu e Iesu o ia upu uma, ona fetalai atu ai lea o ia i ona soo,

² Ua outou iloa a mavae aso e lua ona fai ai lea o le paseka, e tuuina atu ai le Atalii o le tagata ina ia faasatauroina.

³ O ona po ia ua faapotopoto ai le au faitaulaga sili, ma le au tusiupu, ma toeaina o le nuu i le maota o le faitaulaga sili, e igoa ia Kaiafa;

⁴ ua latou taupulepule i se mailei e mafai ai ona pue, ma fasioti ia Iesu.

⁵ A ua latou faapea ane, Aua le faia i le tausamiga, ina ne‘i faanunununu ai le nuu.

⁶ Sa i Petania Iesu i le fale o Simona le lepela,

⁷ ona sau ai lea ia te ia o le fafine ma le fagu alapasa ua i ai le suāuu manogi tau tele, ona liligi ai lea e ia i lona ao a o taoto ia e taumafa.

⁸ Ua iloa e ona soo, ona tiga ai lea o latou loto, ua latou faapea ane, Se a le mea ua faamāumau ai lena mea?

⁹ auā ana faatauina lena suāuu manogi po ua tele sona tau, e foaiina atu ai i e matitiva.

¹⁰ A ua silafia e Iesu, ona faapea atu ai lea o ia ia te i latou, Se a le mea ua outou faalavelave ai i le fafine? auā o le mea lelei ua na faia ia te au nei.

¹¹ Auā tou te nonofo pea ma e matitiva; a o a‘u nei, tatou te le nonofo pea ma a‘u.

¹² Auā ua liligi e ia lenei suāuu manogi i lo‘u tino e fai ma faataimuaga o lo‘u tanuga.

¹³ E moni, ou te fai atu ia te outou, o nuu uma i le lalolagi e tala‘iina atu i ai lenei tala lelei, e ta‘ua ai le mea ua faia e lenei fafine, e faamanatu a‘i ia te ia.

¹⁴ Ona alu ai lea o le tasi o le toasefulu ma le toalua, e igoa ia Iuta le Sekara, i le au faitaulaga sili,

¹⁵ ua faapea atu, Se a le mea tou te au mai ma‘u, ou te faalataina ai o ia ia te outou? Ona latou avane ai lea ia te ia o tupe e tolugafulu.

¹⁶ Talu ai lea aso ua lamalama e ia se itu aso e faigofie ai ona faalataina o ia.

¹⁷ O le muai aso o areto e le faafefeteina ua o mai ai le au soo ia Iesu, ua faapea mai ia te ia, Po o fea le mea e te finagalo i ai matou te saunia e te taumafa ai le paseka?

¹⁸ Ona faapea atu ai lea o ia, Ina o atu ia i le aai i le tasi tagata, ma fai atu ia te ia, Ua fai mai le a‘oa‘o, ua latalata o‘u aso; matou te fai ai le paseka ma o‘u soo i lou fale.

¹⁹ Ona faia lea e ona soo e pei ona fetalai atu ai Iesu, ua saunia foi le paseka.

²⁰ Ua oo i le afiafi, ona taoto ai lea o ia e taumafa faatasi ma le toasefulu ma le toalua.

²¹ O loo latou aai, ona fetalai atu ai lea o ia, E moni ou te fai atu ia te outou, e faalataina a‘u e so outou.

²² Ona latou matuā tiga ai lea, ua latou taitasi ma fai mai ia te ia, Le Alii e, o a‘u ea?

²³ Ona tali atu ai lea o ia, ua faapea atu, O lē fufui faatasi lona lima ma lo‘u i le tanoa, o ia lea na te faalataina a‘u.

²⁴ E alu lava le Atalii o le tagata e pei ona tusia ia te ia; a o le tagata na te faalataina le Atalii o le tagata oi talofa ia te ia! e lelei i lea tagata pe ana le fanau mai o ia.

²⁵ Ona tali mai ai lea o Iuta le na faalataina ia, ua faapea mai, Rapi e, o a‘u ea? Ua fetalai atu o ia ia te ia, O lena lava.

²⁶ O loo latou aai, a e tago Iesu i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o lo‘u tino lenei.

²⁷ Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, Ina inu ia outou uma i ai;

²⁸ auā o lo‘u toto lenei, o le toto o le feagaiga fou, ua faamaligiina mo tagata e toatele e faamagalo a‘i agasala.

²⁹ Ou te fai atu foi ia te outou, ou te le toe inu lava i lenei fua o le vine, seia oo i lea aso ou te inu ai le uaina fou faatasi ma outou i le malo o lo‘u Tamā.

³⁰ Ua uma ona fai o a latou pese, ona latou o atu ai lea i le mauga o Olive.

³¹ Ona fetalai atu ai lea o Iesu ia te i latou, E tausuai outou uma ona o a‘u i lenei lava po; auā ua tusia, Ou te taia le leoleo mamoe, ona taapeape ai lea o le lafu mamoe.

³² A e a mavae lo‘u toe tu, ona ou muamua atu ai lea ia te outou i Kalilaia.

³³ Ona tali mai ai lea o Peteru, ua faapea mai ia te ia, E ui lava ina tausuai o tagata uma ona o oe, ou te le tausuai lava a‘u.

³⁴ Ona fetalai atu ai lea o Iesu ia te ia, E moni, ou te fai atu ia te oe, o lenei lava po, a o lei vivini moa, e te faafiti faatolu mai ai ia te au.

³⁵ Ona fai mai ai lea o Peteru ia te ia, E ui ina tā oti lava faatasi ma oe, ou te le faafiti lava ia te oe. Ua faapea foi ona fai mai o le au soo uma lava.

³⁶ Ona oo ai lea o Iesu faatasi ma i latou i le fanua ua igoa ia Ketesemane; ua faapea atu foi o ia i le au soo, Ia outou nonofo iinei, seia ou alu atu iilā ou te tatalo.

³⁷ Ua o ane o ia ma Peteru ma atalii o Sepetaio e toalua, ona tiga lea o ia ma atuatuvale.

³⁸ Ona fetalai atu ai lea o ia ia te i latou, Ua matuā tiga lo‘u loto e oo i le oti; ia outou nonofo pea iinei, ma ia tatou mataala faatasi ma a‘u.

³⁹ Ua maliu faaitiiti atu i luma, ona faapaū fao ai lea o ia ma tatalo, ua faapea atu, Lo‘u Tamā e, afai e mafai, ia ave ese lenei ipu ia te au; a e aua le faia lo‘u loto, a o lou finagalo.

⁴⁰ Ona maliu ane lea o ia i ona soo, ua maua i latou o momoe, ona fetalai atu ai lea o ia ia Peteru, Pe faapena ea ona outou le lavā ona tatou mataala faatasi ma a‘u i le itu po e tasi?

⁴¹ Ia outou mataala ma tatalo, ina ne‘i oo mai le faaosoosoga ia te outou; ua manao i ai le loto, a o le tino ua vaivai.

⁴² Ua toe maliu ane ia o le atu lua lea, ua tatalo, ua faapea atu, Lo‘u Tamā e, a le mafai ona ave ese o lenei ipu ia te au seia ou inu ai, ia faia lou finagalo.

⁴³ Ona maliu ane ai lea o ia ua maua i latou ua toe momoe; auā ua maaa o latou laumata.

⁴⁴ Ona tuua lea o i latou e ia, ua toe maliu ane, ua tatalo o le atu tolu lea, ua fetalai atu i le upu lava e tasi.

⁴⁵ Ona maliu ane ai lea o ia i ona soo, ua faapea atu ia te i latou, Ina momoe pea ia, ma malolo; faauta, ua latalata le itu po e faalataina ai le Atalii o le tagata i lima o tagata agasala.

⁴⁶ Ina tutū ia, tatou o; faauta, ua latalata mai o ia na te faalataina a‘u

⁴⁷ Faauta, o loo fetalai o ia, a sau Iuta, o le tasi o le toasefulu ma le toalua, ua faatasi mai foi ma ia le motu o tagata e toatele, mai le au faitaulaga sili ma toeaina o le nuu, ua ia te i latou o pelu ma uatogi.

⁴⁸ Na tuuina atu foi e le na faalataina o ia le faailoga ia te i latou, ua faapea atu, O lē ou te sogi atu i ai, o ia lea; ia outou pue ia te ia.

⁴⁹ Ona sau loa lea o ia ia Iesu, ua faapea mai, Rapi e, si o‘u alofa; ona sogi ai lea o ia ia te ia.

⁵⁰ Ona fetalai atu ai lea o Iesu ia te ia, Sole, se a le mea ua e sau ai? Ona latou o mai ai lea, ua tago atu o latou lima ia Iesu, ua latou pue ia te ia.

⁵¹ Faauta foi, o le tasi o e na ia Iesu, ua tago ia i lana pelu, ua se‘i, ona ia taia lea o le auauna a le faitaulaga sili, ua tipiesea lona taliga.

⁵² Ona fetalai atu lea o Iesu ia te ia, Ina toe sulu ia o lau pelu i lona faamoega; auā o i latou uma o e tago i le pelu, e oti i latou i le pelu.

⁵³ Fa te oe ea ou te le mafaia ona aioi atu nei i lo‘u Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua?

⁵⁴ Ona faapefea lea ona taunuu o Tusi, e tatau ona oo ia mea?

⁵⁵ O lea itu po ua fetalai atu ai Iesu i le motu o tagata, Ua outou o mai ea ma pelu ma uatogi e pue mai ai ia te au, peiseai o se fao mea? sa tatou nonofo ma outou i le malumalu, ma ou a‘oa‘o atu ai i aso fai soo, a e tou te lei pueina ai a‘u.

⁵⁶ A ua oo ia mea uma ina ia taunuu ai Tusi a le au perofeta. Ona tuua ai lea o ia e le au soo uma, a e sosola i latou.

⁵⁷ O e na pue ia Iesu ua latou ta‘ita‘i ia te ia ia Kaiafa le faitaulaga sili, na faapotopoto ai le au tusiupu ma toeaina.

⁵⁸ A ua mulimuli mamao mai Peteru ia te ia, ua oo i le maota o le faitaulaga sili, ua ulufale atu i ai, ua nofo foi o ia faatasi ma auauna, ia iloa ona iu.

⁵⁹ A o le au faitaulaga sili, ma toeaina, ma le taupulega uma, ua latou saili ni e molimau pepelo ia Iesu, ina ia latou fasioti ia te ia;

⁶⁰ a e lei maua; e ui lava ina o mai molimau pepelo e toatele, a e lei maua lava. E mulimuli ane ua o mai molimau pepelo e toalua, ua faapea mai,

⁶¹ Na fai mai lenei tagata, Ou te mafaia ona lepeti o le malumalu o le Atua, ma ou toe faia i aso e tolu.

⁶² Ona tu ai lea i luga o le faitaulaga sili, ua faapea mai ia te ia, E leai ea sau tali? Pe se a le mau a nei tagata ia te oe?

⁶³ A ua le fetalai Iesu. Ona fai mai ai lea o le faitaulaga sili, ua faapea mai ia te ia, Ou te fai atu ia te oe ia te tauto mai ia te i matou i le suafa o le Atua soifua, po o oe le Keriso, o le Alo o le Atua.

⁶⁴ Ona fetalai atu ai lea o Iesu ia te ia, O lea lava; ou te fai atu foi ia te outou, E mulimuli ane tou te iloa ai le Atalii o le tagata e nofo i le itu taumatau o le e ona le mana, e sau foi o ia i ao o le lagi.

⁶⁵ Ona saeia ai lea e le faitaulaga sili ona lava ofu, ua faapea ane, Ua upu leaga o ia i le Atua se a se toe aoga o molimau ia te i tatou? faauta, ua outou faalogo nei i ana upu leaga i le Atua.

⁶⁶ Pe ni a fa outou? Ona latou tali mai ai lea, ua faapea mai. E tatau ona oti o ia.

⁶⁷ Ona latou taufaifeanu ai lea i ona fofoga, ua taufaitu‘i foi ia te ia; ua taufaipo atu foi isi,

⁶⁸ ua faapea mai, Keriso e, ina iite mai ia te i matou, po o ai na na fasia oe?

⁶⁹ A o Peteru sa nofo o ia i fafo i le maota; ona alu atu ai lea o le tasi auauna teine ia te ia, ua faapea atu, O oe foi, sa oulua faatasi ma Iesu le Kalilaia.

⁷⁰ Ona faafiti lea o ia i o latou luma atoa, ua faapea ane, Ou te le iloa le mea e te fai mai ai na.

⁷¹ Ua ulufafo ia i le faapaologa, ona iloa mai ai lea o ia e le tasi auauna teine, ua na fai atu i e ua i ai, O lenei tagata foi sa la faatasi ma Iesu le Nasareta.

⁷² Ona toe faafiti ai lea o ia ma le augani, Ou te lei iloa lea tagata.

⁷³ Ua toe itiiti, ona o ane ai lea o e na tutū mai, ua faapea mai ia Peteru, E moni, o oe lava lo latou; auā ua iloa oe i lau gagana.

⁷⁴ Ona augani ai lea o ia ma tauto, ua faapea atu, Ou te le iloa lava lea tagata. Ona vivini loa lea o moa.

⁷⁵ Ona manatua lea e Peteru o le upu na fetalai atu ai Iesu ia te ia, E le vivini moa seia e faafiti faatolu mai ia te au. Ona ulufafo ai lea o ia, ua tagi lotulotu.