Kenese 49 - O LE TUSI PAIA

O LE MATAUPU XLIX. O le mavaega a Iakopo i lona aiga.

¹ Ona aami lea e Iakopo ona atalii, ma na faapea atu, Faapotopoto mai ia outou, a a‘u faaali atu ia te outou o mea e oo ia te outou i aso amuli.

² Faapotopoto mai ia, ma faalogologo mai outou atalii o Iakopo; ina faalogologo mai ia i lo outou tamā o Isaraelu.

³ O Reupena, o la‘u ulumatua lava oe, o lo‘u malosi, ma le na amata mai ai lo‘u mamalu, o le ua silisili ona mamalu, ua silisili ona malosi.

⁴ Ua e oso vale pei o le vai, e le faasili lava oe; auā na e alu ae i le moega o lou tamā, i le ua leaga ia te oe; na alu ae ia i lo‘u moega.

⁵ O Simeona ma Levi, o le uso i laua; ua fai a laua pelu ma auupega e faasaua ai.

⁶ Aua ne‘i usitai lo‘u loto i la laua taupulepulega nanā; aua ne‘i faatasi lo‘u mamalu i lo laua potopotoga; auā na la fasioti le tagata i lo laua ita, o lo laua finau vale foi na la faapipili ai o vae o le povi.

⁷ Ia fetuuina lo la ita ina ua silisili, mo lo la ita tele lava ina ua la finau vale ai; ou te vavaeina i laua i le nuu o Iakopo, ou te faataapeapeina i laua i Isaraelu.

⁸ Oe na Iuta, e viia oe e ou uso; e oo lou lima i ua o e ita ia te oe; e ifo ia te oe le fanau a lou tamā.

⁹ O le tamai leona Iuta; lo‘u atalii e, na e alu ae nai le mea na saeia; na ia taoto, na ia faapuga pei o le leona, e pei o se leona fafine; o ai se na te faalili ia te ia?

¹⁰ E le avea le tootoo ia Iuta, po o le faipule ai ona vae seia maliu mai Sailo, e usiusitai foi atu nuu ia te ia.

¹¹ O loo nonoa lana asini i le vine, ma lana tamai asini i le vine lelei; o loo ta ona ofu i le uaina, ma lona ie pulupulu i le toto o le fua o le vine;

¹² e mūmū ona mata i le uaina, e sisina ona nifo i le suasusu.

¹³ O Sepulona e tu matafaga le mea e mau ai o ia; e i ai foi o ia i le mea e tau ai vaa; e oo foi lona tuaoi i Saitonu.

¹⁴ O Isakara e pei o le asini malosi o ia, o loo taoto i le va o avega e lua;

¹⁵ ua iloa atu e ia le malologa ua lelei, ma le fanua ua matagofie, ona tuuina atu lea o lona ua i le amoga, ua fai foi ma pologa e fai taulaga.

¹⁶ E faamasino e Tanu lona nuu, pei o le tasi itu aiga o Isaraelu;

¹⁷ e fai Tanu ma gata i le ala o le malo, o le gata feai i le ala, e utia ai mulivae o le solofanua, e paū ai i tua lē tietie ai.

¹⁸ Ieova e, ua ou faamoemoe i le olataga mai ia te oe.

¹⁹ O Kato, e malo se ‘au ia te ia; a o ia, e iu ina malo lava ia.

²⁰ Mai ia Asera o mea lololo, o lana mea e ‘ai lea; o ia foi na te avatua o mea e faafiafia a‘i tupu.

²¹ O Nafatali o le aila ua tatalaina atu ia, o le na te talatalaina atu i upu lelei.

²² O Iosefa o le la laau o ia e fua o le la laau e fua i tafatafa o le vaipuna; e sosolo ona la i luga i le pa.

²³ Na faatigaina o ia e i latou o e fanafana u; na latou fanafana atu ia te ia, ma ita ia te ia.

²⁴ A ua tumau pea le malosi o lana aufana, o ona lima foi ua faamalosia ia e aao o lē Malosi o Iakopo; o loo tupu mai ai foi le leoleo mamoe, o le maa lea o Isaraelu;

²⁵ e a le Atua o lou tamā o le fesoasoani ia te oe, o Lē e ona le malosi uma lava na te faamanuia oe i manuia mai le lagi i lugā, ma manuia mai le mea loloto o loo i lalō, o manuia o susu ma le manava;

²⁶ o manuia o lou tamā ua sili lava ia i manuia o o‘u tupuga, ua oo i le tuaoi lava o mauga o le vavau; e oo pea lava ia i luga o le ulu o Iosefa, ma le tumuai o le na sili i ona uso.

²⁷ O Peniamina o le luko na te saeia; o le taeao e ‘ai ai e ia le mea ua maua; o le afiafi e vavaeina ai e ia o mea ua faoa.

²⁸ O i latou atoa nei, o itu aiga e sefulu ma le lua o Isaraelu; o upu foi ia a lo latou tamā ia i latou, ua ia faamanuia ai foi i latou, e taitoatasi ma lona manuia ua ia faamanuia ai i latou.

²⁹ Ua fai atu foi o ia ia te i latou, o loo faapea atu ia te i latou, O le a faaopoopoina atu a‘u i lo‘u nuu; ia outou tanu lava a‘u faatasi ma o‘u tamā i le ana o loo i le fanua o Eferona o le sa Hetī;

³⁰ o le ana lea o loo i le fanua o Makapelu, o loo i luma o Mamere, i le nuu o Kanana, sa faatauina lea fanua e Aperaamo mai ia Eferona o le sa Hetī e fai ma tuugamau.

³¹ O le mea lea na latou tanumia ai Aperaamo ma lana avā o Sara, o le mea foi lea na latou tanumia ai Isaako ma lana avā o Repeka, o le mea foi lea na ou tanumia ai Lea.

³² O le faatauga o le la fanua atoa ma le ana o loo i ai, mai le fanauga a Heti lea.

³³ Ua uma atu foi le mavaega a Iakopo i ona atalii, ona faapupuu ae lea ona vae i lona moega, ona to lea o lana mānava, ua faaopoopoina o ia i lona nuu.