Kalatia 1 - O LE TUSI PAIA

O LE MATAUPU I. Ua aoai Paulo ia Kalatia ina ua sese i latou.

¹ O a‘u o Paulo o le aposetolo, (e le mai tagata, e lei tofia foi e se tagata, a o Iesu Keriso, ma le Atua le Tamā, o le na toe faatuina mai o ia i e ua oti,)

² atoa ma le au uso uma lava o e ua ia te a‘u o la matou tusi lenei i ekalesia i Kalatia.

³ Ia ia te outou le alofa tunoa ma le manuia mai le Atua le Tamā, ma lo tatou Alii o Iesu Keriso,

⁴ o le na foaiina mai o ia e ia ona o a tatou agasala, ina ia laveai mai o ia ia i tatou ai le olaga leaga ua i ai nei, e tusa ma le finagalo o le Atua, o lo tatou lava Tamā.

⁵ Ia ia te ia le viiga e faavavau faavavau lava. Amene.

⁶ Ua ou ofo ina ua faapea ona vave liliueseina o outou i le na valaauina outou i le alofa tunoa o Keriso a e faasaga i le tala lelei e ese;

⁷ e le se tasi tala lelei foi lea, a o isi tagata ua faaatuatuvale ia te outou, ma fia faaliliueseina le tala lelei a Keriso.

⁸ A e peitai e ui lava ina tala‘iina e i matou, po o se agelu mai le lagi, ia te outou se tala lelei e ese i lea na tala‘iina atu ai e i matou ia te outou, ia anatema ia.

⁹ Pei ona matou muai fai atu, ou te toe fai atu ai nei foi, Afai e tala‘iina atu e se isi ia te outou se tala lelei e ese i lea na outou talia, ia anatema ia.

¹⁰ Auā, ou te faaaviavi ea i ona po nei i tagata, po o le Atua; Ou te saili ea ina ia ou faafiafia i tagata? Auā afai ana ou faafiafia pea i tagata, po ua le fai a‘u ma auauna a Keriso.

¹¹ Le au uso e, ou te faailoa atu ia te outou, e le faatatauina i tagata le tala lelei sa tala‘iina atu e a‘u;

¹² auā e lei maua lea e a‘u mai se tagata, e lei a‘oa‘oina ai foi a‘u, ua na o le faaaliga a Iesu Keriso na ou maua ai.

¹³ Auā ua outou faalogo i la‘u amioga anamua ina ou i le lotu a Iutaia, sa ou matuā saua lava i le ekalesia a le Atua, ma faatauga i ai.

¹⁴ E sili foi lo‘u alualu i le lotu a Iutaia i nisi e toatele o lo‘u nuu na matou tupulaga faatasi, ma a‘u matuā naunau i uputuu a o‘u tamā.

¹⁵ A o le Atua o le na filifilia a‘u talu ina fanau mai o a‘u, ma na valaauina a‘u i lona alofa tunoa, na finagalo o ia,

¹⁶ ina ia faaali mai lona Alo i totonu ia te au, ina ia ou folafolaina atu i nuu ese le tala lelei ia te ia, ona ou le filifili lea ma tagata,

¹⁷ ou te lei alu ae loa foi i Ierusalema i e na muai aposetolo ia te au, a e peitai na ou alu i Arapi, ona ou toe foi lea i Tamaseko.

¹⁸ Na mavae tausaga e tolu, ona ou alu ae lea i Ierusalema ina ia ma feiloai ma Peteru, ua po sefulu ma le lima o ma nonofo ai;

¹⁹ a e ma te lei feiloai ma se tasi o le au aposetolo, ua na o Iakopo le uso o le Alii.

²⁰ O mea foi ou te tusi atu ai nei ia te outou, faauta mai ia, ou te fai atu i luma o le Atua, ou te le pepelo lava.

²¹ Mulimuli ane ona ou alu atu lea i nuu o Suria ma Kilikia;

²² sa le iloa o‘u mata e ekalesia i Iutaia o e ua ia Keriso;

²³ ua na ona latou faalogo, O le na faasaua anamua ia te i tatou, o loo folafola atu e ia i nei ona po le tala lelei o le faatuatua sa na faataugaina anamua;

²⁴ ona latou vivii ai lea i le Atua ona o a‘u.