Iosua 15 - O LE TUSI PAIA

O LE MATAUPU XV. O le tofi o le itu aiga o sa Iutā.

¹ O le tofi lenei o le itu aiga o le fanauga a Iuta e tusa ma o latou aiga, e oo i le tuaoi o Etoma, o le vao o Tisina i le itu i toga, o le mea lea e gata mai ai le itu i toga.

² O lo latou tuaoi i le itu i toga ua afua mai i le mea e gata mai ai le sami Oona, e afua mai foi i le faga e faasaga i le itu i toga;

³ a e alu atu i le itu i toga i le aega o Akarava, ma ui atu i Tisini, ma alu ae i le itu i toga i Katesapanea, ma ui ai i Hasaronu, ma alu ae i Atara, ma ui ane i Karaka;

⁴ ona ui atu ai lea i Asemoni, ma alu atu i le alia o Aikupito; o lona gataaga mai o lea tuaoi o le sami lea. O lo outou tuaoi lea i le itu i toga.

⁵ O le tuaoi i sasae o le sami Oona, e oo atu i le mea e gata mai ai Ioritana. O le tuaoi i le itu i matu e afua mai i le faga o le sami i le mea e gata mai ai Ioritana;

⁶ a e alu ae le tuaoi i Peteokelu, ma ui ai i le itu i matu o Petearapa; ua alu ae foi le tuaoi i le maa o Poana le atalii o Reupena.

⁷ Ona alu ae ai lea o le tuaoi i Tiperi mai le vanu o Akori, e ui ai i le itu i matu e faasaga atu i Kilikala, e feagai ma le aega i Atumema, o i le itu i toga o le alia; ona ui ai lea o le tuaoi i le vai o Enesemesa, o lona gataaga mai o i Enerokelu.

⁸ Ona alu ae ai lea o le tuaoi i le vanu o le atalii o Hinoma e oo atu i le itu i toga o sa Iepusē, o Ierusalema lea; e alu ae foi le tuaoi i le tumutumu o le mauga e feagai ma le vanu o Hinoma i sisifo, o i le mea e gata mai ai le vanu o sa Rafā i le itu i matu;

⁹ ua tusia foi le tuaoi e afua mai i le tumutumu o le mauga, e oo atu i le vaipuna o Nafatoa, ua alu atu foi i aai o le mauga o Eferona; ua tusia foi le tuaoi i Paala, o Kiriata-iarima lea.

¹⁰ Ona afe lea o le tuaoi mai Paala i sisifo, e oo atu i le mauga o Seira, ua ui atu foi i le tafatafa o le mauga o Iarima i le itu i matu, o Kasalona lea; ona alu ifo ai lea i Petesemesa, ma ui atu ai i Timena.

¹¹ Ua alu atu le tuaoi i le tafatafa o Ekerona i le itu i matu; ua tusia foi le tuaoi i Sekerona, ma ui ai i le mauga o Paala, ma alu atu i Iapenelu; o lona gataaga mai o le tuaoi o le sami lea.

¹² O le tuaoi i sisifo o le sami tele lea ma ona tuaoi. O le tuaoi lea o le fanauga a Iuta e faataaliolio ai, e tusa ma o latou aiga.

¹³ Ua avatu foi e ia se tofi ia Kalepo le atalii o Iefune, faatasi ma le fanauga a Iuta, e pei o le afioga a Ieova ia Iosua, o le aai o Arapa le tamā o Anaki, o Heperona lea.

¹⁴ Ona tulia lea ai lea mea e Kalepo o atalii e toatolu o Anaki, o Sesai, ma Aimano, ma Talemai, o le fanau a Anaki.

¹⁵ Ona alu ae lea o ia ai lea mea i e o nonofo i Tiperi; (o le igoa foi o Tiperi anamua o Kiriata-sapera.)

¹⁶ Ona fai atu ai lea o Kalepo, O se na te fasia Kiriata-sapera ma na maua, ou te avatu ia te ia o Akesa lo‘u afafine e fai mana avā.

¹⁷ Ona maua lea e Otinielu le atalii o Kinasa, le uso o Kalepo; ua avatu e ia ia te ia o Akesa lona afafine e fai mana avā.

¹⁸ Ua alu atu o ia, ona faaoso atu lea o ia ia te ia, ia ole atu i lona tamā i se fanua. Ua alu ifo o ia nai le asini, ona fai mai ai lea o Kalepo ia te ia, Se a ea lou manao?

¹⁹ Ona fai atu lea o ia, Ia e foai mai ia te au se mea alofa; ua e avane ia te au le fanua i le itu i toga, ia e foai mai foi ia te au ma ni vaipuna. Ona avatu ai lea e ia ia te ia o vaipuna o i luga ma vaipuna o i lalo.

²⁰ O le tofi lenei o le itu aiga o le fanauga a Iuta, e tusa ma o latou aiga.

²¹ O aai tupito o le itu aiga o le fanauga a Iuta, i le tuaoi o Etoma i le itu i toga, o Kapeseelu, ma Eteru,

²² ma Iakuri, ma Kina, ma Timuna,

²³ ma Atata, ma Katesa, ma Hasora,

²⁴ ma Itanana, o Sefa, ma Telema, ma Paalota,

²⁵ ma Hasora, ma Hatata, ma Kiriota, ma Hasaronu, o Hasora lea;

²⁶ o Amama, ma Sema, ma Molata, ma Asarakata,

²⁷ ma Hasamoni, ma Petepaleta,

²⁸ ma Asara-suala, ma Peresepa,

²⁹ ma Pisetia, o Paala, ma Iima,

³⁰ ma Asema, ma Elitolita, ma Kiselu,

³¹ ma Horema, ma Sekeleka, ma Matamana,

³² ma Sanesana, ma Lepaota, ma Seleima, ma Aino, ma Rimoni; o aai uma ia e lua sefulu ma le iva, atoa ma o latou faoa aai;

³³ o i le nuu maulalo, o Esetaola, ma Soraa,

³⁴ ma Asena, ma Sanoa, ma Enekanima,

³⁵ o Tapua, ma Enama, o Iaremuta, ma Atulame, o Suka, ma Aseka,

³⁶ ma Saraima, ma Atitaima, ma Ketere, ma Keteretaima; o aai e sefulu ma le fa, atoa ma o latou faoa aai.

³⁷ O Senana, ma Hatesa, ma Meketala-kato,

³⁸ ma Tileano, ma Mesepa, ma Iokatielu,

³⁹ o Lakisa, ma Posekata, ma Ekelona,

⁴⁰ ma Kapona, ma Lakemase, ma Kitelisa,

⁴¹ ma Kiterota, o Petetakona, ma Naama, ma Maketa; o aai e sefulu ma le ono, ma o latou faoa aai.

⁴² O Lipena, ma Eteru, ma Asana,

⁴³ ma Iefeta, ma Asena, ma Nisepa,

⁴⁴ ma Kaila, ma Akasepa, ma Morese; o aai e iva, ma o latou faoa aai.

⁴⁵ O Ekerona, ma ona aai, ma ona faoa aai.

⁴⁶ E afua mai i Ekerona ma le sami, o aai uma e latalata i Asetota, ma o latou faoa aai.

⁴⁷ O Asetota, ma ona aai, ma ona faoa aai, o Kasa, ma ona aai, ma ona faoa aai, e oo atu i le alia o Aikupito, ma le sami tele, ma ona tuaoi.

⁴⁸ O i le atu mauga, o Samira, ma Iatira, ma Suka,

⁴⁹ ma Tana, ma Kiriata-sena, o Tiperi lea, ma Anapa,

⁵⁰ ma Esetemoa, ma Anima,

⁵¹ ma Kosena, ma Holona, ma Kilo; o aai e sefulu ma le tasi, ma o latou faoa aai.

⁵² O Arapa, ma Tuma, ma Eseana,

⁵³ ma Ianuma, ma Petetapua, ma Afeka,

⁵⁴ ma Umeta, ma Kiriata-arapa, o Heperona lea, ma Seora; o aai e iva ma o latou faoa aai.

⁵⁵ O Meona, ma Karamelu, ma Sefa, ma Iutaa,

⁵⁶ ma Isereelu, ma Iakatoma, ma Sanoa;

⁵⁷ o Kaino, o Kipea, ma Timena; o aai e sefulu ma o latou faoa aai.

⁵⁸ O Aliula, o Petesura, ma Kitoru,

⁵⁹ ma Mearata, ma Peteanata, ma Aletekono; o aai e ono ma o latou faoa aai.

⁶⁰ O Kiriata-paala, o Kiriata-iarima lea, ma Rapa; o aai e lua ma o la faoa aai.

⁶¹ O i le vao, o Petearapa, o Metina, ma Sekaka,

⁶² ma Nivasana, ma le aai o masima, ma Enokati; o aai e ono ma o latou faoa aai.

⁶³ A o sa Iepusē, o e nonofo i Ierusalema, na le mafai ona tulia i latou e le fanauga a Iuta; a ua nonofo faatasi o sa Iepusē ma le fanauga a Iuta i Ierusalema ua oo i le aso nei.