Iopu 4 - O LE TUSI PAIA

O LE MATAUPU IV. O le aoaiga muamua a Elifasa ia Iopu.

¹ Ona tali mai ai lea o Elifasa le Timanu, ua faapea mai,

² A taumafai atu se upu ia te oe, pe e te tiga ai ea? A o ai se na te mafaia ona taofi lana upu?

³ Faauta mai, na e apoapoai atu i tagata e toatele, na e faamalosia lima vaivai.

⁴ O au upu sa faamautuina ai le sa tautevateva, sa e faamalosia foi tulivae sa vaivai.

⁵ A o lenei, ua oo mai ia te oe, ua e faavaivai ai; ua papai mai ia te oe, ua e atuatuvale ai.

⁶ O lou faatuatuaga, o lou faamoemoega ma le tonu o ou ala, e le o lou mata‘u ea lea i le Atua?

⁷ Se‘i e manatu, po o ai ea ua fano fua a e le sala? Po o fea foi ua faaumatia ai e ua amiotonu?

⁸ O la‘u vaai lea, o e ua suatia le agasala, ma luluina le amio leaga, latou te selesele mai ai lava.

⁹ E fano i latou i le mapugatamai o le Atua, e faaumatia foi i latou i le mānava o ona pogaiisu.

¹⁰ O le tagi o le leona ma le leo o le leona, ma nifo o leona taanoa, ua gāugau lava ia.

¹¹ Ua fano le leona, auā e leai sana mea e saeia, e faataapeapeina foi le toloai a le leona fafine.

¹² Ua faaoo mai faalilolilo se upu ia te au; ua lagona ai foi o‘u taliga nai mea itiiti.

¹³ O mafaufauga i mea e vaaia i le po, ina o moe gagase tagata;

¹⁴ ua oo mai ai ia te au le mata‘u ma le gatete, na tetemu ai o‘u ivi uma.

¹⁵ Na ui ane i o‘u luma le agaga, ua mātatili ai lo‘u tino.

¹⁶ Na tu mai o ia, a ou te lei iloa le uiga o lona tino mai; sa iai le ata i luma o ou mata, sa ligoligo, ona ou faalogo ai lea i le leo,

¹⁷ Pe sili ea le amiotonu a le tagata i lo le Atua? Pe sili ea le lelei o le tagata i le na faia o ia?

¹⁸ Faauta, ua le faalagolago o ia i ana auauna; ua ia ta‘uvaleleaina ana agelu.

¹⁹ E atili ai ona faapea i e o nonofo i fale omea, o iai lo latou faavae i le eleele, ua tu‘imomomoina i latou e pei o le pepe.

²⁰ E tu‘imomomoina i latou e afua i le taeao e oo i le afiafi, ua fano i latou e faavavau ma le le manatua e se tasi.

²¹ Ua le avea ea lo latou faasilisili sa ia te i latou? Ua oti i latou, a o lē popoto.