Iopu 3 - O LE TUSI PAIA

O LE MATAUPU III. O le fetuuina e Iopu o le aso na fanau ai o ia; o ia foi ua fia oti.

¹ Mulimuli ane ua tautala atu Iopu, ma fetuu i lona aso.

² Ua fai atu foi Iopu, ua faapea atu,

³ Ia fano le aso na fanau mai ai a‘u, ma le po na fai ane ai, ua to le fafine, o le tama tane.

⁴ Ia avea lena aso ma pouliuli, aua ne‘i suesueina e le Atua mai luga; aua ne‘i pupula i ai le malamalama.

⁵ Ia toe maua e le pouliuli ma le ata o le oti, ia tumau i ona luga le ao, ia faamatautia i mea e pouliuli ai le aso.

⁶ O lena po, ia faoa e le pouliuli tele, aua ne‘i olioli o ia faatasi ma aso o le tausaga, aua foi ne‘i oo o ia i le faitauina o masina.

⁷ Faauta, ia vale lava lea po, aua ne‘i iai se pese fiafia.

⁸ Ia faafanoina ia e i latou o e ua fetuuina aso, o e ua popoto e faaoso mai i leviatana.

⁹ Ia faapouliuliina fetu o lona afiafi po, ia faatalitali i le malamalama, ae leai lava; aua foi ne‘i vaai atu ia i laumata o le taeao.

¹⁰ Auā sa le punitia e ia o faitotoa o le manava o lo‘u tinā, ma ua le natia le tiga ia te au.

¹¹ Se a le mea na le oti ai a‘u ina o faatoa te‘a mai i le manava? Se a le mea na le to ai la‘u mānava ina o ou sau mai le manava?

¹² Se a le mea na talia ai a‘u i tulivae? Se a foi na talia ai a‘u e susu ou te susu ai?

¹³ Auā po o pe na ua ou taoto ai ma le filemu, ma ou moe ai, ona ou malolo ai lea,

¹⁴ faatasi ma tupu ma faipule o le lalolagi, o e na ati ae mo i latou o mea ua gaogao;

¹⁵ po o faatasi ma alii sili, o e na iai auro, o e na faatutumuina o latou fale i ario;

¹⁶ po o pei o se fanau le au ua natia, ua leai lava o a‘u; e pei o tama meamea ua le iloa le malamalama.

¹⁷ O lea mea ua le toe iai le faasoesa o tagata amio leaga; o lea mea foi ua malolo ai e na lailoa.

¹⁸ Ua fifilemu faatasi ai o e sa noanoatia, latou te le faalogologo i le leo o le ua faasaua.

¹⁹ O iai i lea mea o tagatānuu atoa ma alii, ua saoloto ai foi le pologa nai lona alii.

²⁰ Se a le mea ua tuuina mai ai le malamalama i le ua tigaina, ma le ola i e ua faanoanoa o latou loto?

²¹ O e ua faatalitali i le oti, a ua le oo mai; e tele foi ona eli i ai, a e itiiti i le oloa ua natia.

²² O e ua matuā olioli, ma ua fiafia pe a maua e i latou le tuugamau.

²³ Se a le mea ua tuuina mai ai le malamalama i le tagata o le ua lilo lona ala, ua puipuia foi o ia e le Atua?

²⁴ Auā ua muai sau lo‘u maputiga ao lei ‘ai au, ma ua maligi mai o‘u faataio e pei o vai.

²⁵ Auā o le mea na ou matuā fefe ai, ua oo mai lea ia te au, ua oo mai foi ia te au le mea na ou mata‘u ai.

²⁶ Ua ou le filemu, ua ou le mapu foi, ua ou le malolo, a ua oo mai le atuatuvale.