Iopu 10 - O LE TUSI PAIA

O LE MATAUPU X. O isi upu a Iopu, ua tagi atu ai o ia i le Atua i lona tiga.

¹ Ua musu lo‘u loto i lo‘u ola; ou te tuuina atu a‘u ia tagi pea; ou te tautala i le tiga o lo‘u loto.

² Ou te fai atu i le Atua, Aua e te faasala mai ia te au, ia e faailoa mai ia te au le mea e te finau mai ai ia te au.

³ Pe lelei ea ia te oe ina e faasaua, ma e ‘ino‘ino i le galuega a ou aao, ma e faamanuia le pule a e amio leaga?

⁴ Ua e fofoga ea i mata o tagata? po ua e silasila ea e pei o le vaai o tagata?

⁵ O ou aso ea e pei o aso o tagata? po ou tausaga ea e pei o aso o tagata?

⁶ Ina ua e saili mai i la‘u amio leaga, ma suesue i la‘u agasala.

⁷ Ua e silafia lava, ua ou le amio leaga; e leai foi se laveai mai i lou aao.

⁸ Na saunia ma faia a‘u atoa uma e ou aao; a ua e fasioti ia te au.

⁹ Se‘i e manatu, na e faia a‘u e pei o le omea; e te toe faafoisia ea a‘u i le efuefu?

¹⁰ Na e le sasaaina ea a‘u e pei o le suāsusu, ma faato‘aina a‘u e pei o le suāsusu to‘a?

¹¹ Na e faaofuina a‘u i le pa‘u ma le aano, na e faamalosia foi a‘u i ivi ma ua.

¹² Na e foaiina mai ia te au le ola ma le alofa, o lou leoleo mai foi na tausia ai lo‘u agaga.

¹³ Ua e natia foi nei mea i lou finagalo; ua ou iloa o loo ia te oe lenei mea.

¹⁴ Afai ou te agasala, ua e silasila mai ai pea ia te au, e te le faamagalo mai foi ia te au i la‘u amio leaga.

¹⁵ Afai ua ou amio leaga, oi talofa ia te au! afai foi ua ou amiotonu, e le ea i luga lo‘u ulu; ua tumu a‘u i le mā, ua ou iloa foi lo‘u puapuaga; mona ua tupu pea.

¹⁶ Ua e tuli mai ia te au, e pei o le leona; ua e toe faia ia te au mea e ofo ai.

¹⁷ Ua e faafouina mai o au molimau ia te au, ma ua e faateleina mai lou toasa ia te au; e auauai ‘au ia te au.

¹⁸ Se a le mea na e aumai ai a‘u i le manava? E! ana ou oti ma ia le iloa a‘u e se tasi,

¹⁹ po o pe na ua avea a‘u e peiseai na ou le ola mai; po ua aveina atu a‘u ai le manava i le tuugamau.

²⁰ E le itiiti ea o‘u aso? Ina soia, tuu mai pea ia o a‘u, seia ou muai malolo ane teisi,

²¹ i lo‘u alu atu ai i le mea ou te le toe foi mai ai, o le nuu o le pouliuli ma le ata o le oti;

²² o le nuu o le pouliuli, e tusa lava ma le pouliuli tele; o le ata o le oti, e le i ai ni mea tonu; o lona pupula mai e tusa ma le pouliuli tele.