Ieremia 1 - O LE TUSI PAIA

O LE MATAUPU I. O le tofia o Ieremia e le Atua e fai ma perofeta.

¹ O upu a Ieremia, le atalii o Hilikia, o le tasi o le au faitaulaga, o e na i Anatota i le nuu o Peniamina.

² Na oo mai le afioga a Ieova ia te ia i ona po o Iosia, le atalii o Amone, le tupu o Iuta, i le tausaga e sefulu ma le tolu o lana nofoaiga.

³ Na oo mai foi i ona po o Ioakima, le atalii o Iosia, le tupu o Iuta, ua oo i le gataaga o le tausaga e sefulu ma le tasi o Setekaia le atalii o Iosia, le tupu o Iuta, ua oo foi i le tafeaga o Ierusalema i le lima o masina.

⁴ Na oo mai ia te au le afioga a Ieova, ua faapea mai,

⁵ Na a‘u iloa oe a o lei faia oe e a‘u i le manava; na a‘u faapaiaina oe a o lei fanau mai oe, na a‘u tofia oe e fai ma perofeta i nuu.

⁶ Ona a‘u fai atu ai lea, Aue, le Alii e Ieova, faauta, ou te le iloa ona tautala, auā o a‘u o le tama itiiti.

⁷ Ona fetalai mai ai lea o Ieova ia te au, Aua e te faapea, O a‘u o le tama itiiti; auā o i latou uma ou te auina atu i ai oe, e te alu lava i ai, o mea uma foi ou te fai atu ai ia te oe, e te fai atu ai lava.

⁸ Aua e te fefe ia te i latou; auā ou te ia te oe e laveai ia te oe, ua fetalai mai ai Ieova.

⁹ Ona faaloaloa ai lea e Ieova o lona aao, ua pai mai i lo‘u gutu; ua fetalai mai foi Ieova ia te au, Faauta, ua ou tuuina atu a‘u upu i lou gutu.

¹⁰ Faauta, ua ou tofia oe i le aso nei e pule i nuu ma malo, ina ia e liaiina, ma lepetia, ma faaumatia, ma sŏloia, ia faatuina foi ma totōina.

¹¹ Na oo mai foi le afioga a Ieova ia te au, ua faapea mai, Ieremia e, o le a ea le mea ua e vaai i ai? Ona ou fai atu lea, Ou te vaai atu i le laau o le sekati.

¹² Ona fetalai mai ai lea o Ieova ia te au, Ua lelei lau vaai; auā ou te mataala ina ia faia a‘u upu.

¹³ Na oo mai foi le afioga a Ieova ia te au, o le atu lua lea, ua faapea mai, O le a ea le mea ua e vaai i ai? Ona ou faapea atu lea, Ua ou vaai atu i le ulo ua alu ae ai le ausa, o lona gutu foi ua faasaga mai mai le itu i matu.

¹⁴ Ona fetalai mai ai lea o Ieova ia te au, O le itu i matu e oso mai ai le leaga i luga o i latou uma lava o e nonofo i le nuu.

¹⁵ Auā faauta, ou te valaau i aiga uma lava o malo i le itu i matu, ua fetalai mai ai Ieova; e o mai foi i latou, ma latou taitasi ma tuu lona nofoālii i puipui o faitotoa o Ierusalema, e lata ane foi i ona pa uma ua soo ai, e lata ane foi i aai uma o Iuta.

¹⁶ Ou te faasala foi ia te i latou i a latou amio leaga uma, o e ua tuua a‘u, ma latou faamu mea manogi i atua ese, ma ifo atu i mea na faia i o latou lava lima.

¹⁷ A o oe, ina fusi ia i lou sulugatiti, ma tulai atu, ma fai atu ia te i latou mea uma ou te fai atu ai ia te oe; aua e te mata‘u ia te i latou, ina ne‘i ou faamatauina oe i o latou luma.

¹⁸ Faauta foi, o a‘u nei ua ou faia oe i le aso nei ma aai nofo ‘olo, ma pou uamea, ma pa ‘apa memea e teteeina ai le nuu uma, o tupu o Iuta, ma ona alii, ma faitaulaga, ma tagata o le nuu.

¹⁹ Latou te sii mai le taua ia te oe, a e latou te le manumalo ia te oe; auā o a‘u ou te ia oe e laveai ia te oe, ua fetalai mai ai Ieova.