Hosea 14 - O LE TUSI PAIA

O LE MATAUPU XIV. O le faamafanafanaga.

¹ Isaraelu e ina toe foi mai ia ia Ieova lou Atua; auā o lau agasala ua e paū ai.

² Ina sauni atu ia ni a outou upu ma toe foi atu ia Ieova. Ia outou faapea atu ia te ia, Ia e ave ese agasala uma, ma talileleia mai, matou te avatua lava taulaga o matou laugutu.

³ E le faaolaina i matou e Asuria; matou te le tietie i solofanua; matou te le toe faapea ane lava i galuega a o matou lima, O matou atua ia; auā e alofagia e oe le mātuaoti.

⁴ Ou te faamaloloina lo latou liliu ese; ou te alofa fua ia te i latou; auā ua liliueseina lo‘u ita ia te i latou.

⁵ E avea a‘u ma sau ia Isaraelu; e fuga mai o ia e pei o le susana, e sosolo ona aa e pei o Lepanona.

⁶ E tutupu ae ona tātupu, e pei o le olive lona matagofie; e manogi foi ia e pei o Lepanona.

⁷ O i latou o e nonofo i lalo ifo o lona paolo, e toe ola mai i latou e pei o saito, e fua mai e pei o le vine; e ta‘ua o ia e pei o le uaina o Lepanona. E faapea mai a Efaraima,

⁸ Se a ea sa‘u toe mea e fai i tupua? Ua ou tali atu, ma vaavaai atu ia te ia; e pei o se perosi lauolaola a‘u nei; e maua lau fua mai ia te au.

⁹ Po o ai se tasi ua poto? e iloa lava e ia na mea; po o ai lē faautauta? e iloa ai e ia; auā ua tonu ala o Ieova, e savavali ai e ua amiotonu; a o e fouvale, e tautevateva ai i latou.