Hosea 11 - O LE TUSI PAIA

O LE MATAUPU XI. O le alofa o le Atua ia Isaraelu.

¹ O ona po na tama itiiti ai Isaraelu, na ou alofa atu ia te ia, na ou valaauina foi lo‘u atalii nai Aikupito.

² Na latou alalaga ia te i latou, a ua latou o ese ia te i latou; na latou fai taulaga ia Paala, ma faamu mea manogi i tupua ua ta.

³ Na ou a‘oa‘oina Efaraima ia savali, o loo o tauta‘ita‘i ia te i latou i o latou lima; a ua le iloa e i latou ona ou faamaloloina o i latou.

⁴ Na ou tosina i latou i maea a le tagata, o maea alofa lava; na ou i ai ia te i latou e pei o e sii ae le amo ai o latou aulamu, na au tuuina atu foi mea e ‘ai ia te i latou.

⁵ E le toe foi o ia i le nuu o Aikupito, a e avea le Asuria mona tupu; auā ua le mafafai i latou ona toe foi atu.

⁶ E tumau le pelu i ona aai, e faaumatia ai foi ona la, ma fano ai, auā o a latou lava filifiliga.

⁷ Ua naunau lo‘u nuu e liliu ese ia te au; latou te valaau i ai e o mai i lē Silisili ese, a e leai se tasi e vivii atu ia te ia.

⁸ Efaraima e, ou te mafai faapefea ona tuu atu ia te oe? Isaraelu e, ou te tuuina atu oe faapefea? ou te mafai faapefea ona tuuina atu o oe e pei o Atama? ou te tuuina atu oe faapefea e pei o Sepoima? Ua liua lo‘u loto i totonu ia te au; atoa foi ma lo‘u alofa mutimutivale ua tupu.

⁹ Ou te le faaoo lo‘u ita tele; ou te le toe faaumatia Efaraima; auā o a‘u o le Atua, a e le se tagata, o le Paia o loo i totonu ia te oe; ou te le alu atu ma le ita.

¹⁰ Latou te mulimuli atu ia Ieova, e tagi lava ia e pei o se leona; a tagi o ia, ona taalise mai ai lea o le fanau mai sisifo.

¹¹ Latou te taalise mai e pei o se manu lele mai Aikupito, e pei o se lupe foi mai le nuu o Asuria; ou te faanonofo foi ia te i latou i o latou fale, ua faapea mai ai Ieova.

¹² Ua siosio Efaraima ia te au i le pepelo, o le aiga foi o Isaraelu ua siosio ia te au i le ‘ole‘ole; a ua pule pea Iuta faatasi ma le Atua, ua faamaoni ia faatasi ma le au paia.