Filipi 4 - O LE TUSI PAIA

O LE MATAUPU IV. O le alofa o le ekalesia ia Paulo.

¹ O lenei, o‘u uso e, o e ou te alofa ma naunau i ai, o lo‘u fiafia ma lo‘u pale le au pele, ia faapea ona tumau o outou i le Alii.

² Ou te aioi atu ia Evotia, ou te aioi atu foi ia Sunetui, ia tasi lo la manatu, i le Alii.

³ Ou te faatoga atu foi ia te oe, lo‘u fesoasoani faamaoni, ia e fesoasoani ia te i laua, o e na finau faatasi ma a‘u i le tala lelei, atoa ma Kelemene ma nisi uma e na galulue faatasi ma a‘u, ua i le tusi o le ola o latou igoa.

⁴ Ia outou olioli i le Alii aua le aunoa; ou te toe fai atu, ia outou olioli.

⁵ Ia iloa lo outou agamalu e tagata uma lava; ua lata mai le Alii.

⁶ Aua ne‘i popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai.

⁷ O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.

⁸ Le au uso e, o le toe upu lenei; o mea uma ua moni, o mea uma ua ta‘uleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea.

⁹ O mea foi ua a‘oa‘oina ai outou, ma outou talia, ma outou faalogo i ai, ma outou vaai mai ia te au, ia outou faia ia lava mea; ona ia te outou lea o le Atua e ona le manuia.

¹⁰ A ua ou fiafia tele i le Alii, auā o ona po nei ua toe tupu mai ai lo outou manatunatu mai ia te au; sa outou manatunatu foi i ai, a ua le maua e outou se ala.

¹¹ Ou te le fai atu ona o le mativa, auā ua a‘oa‘oina a‘u ia to‘a filemu lo‘u loto i mea ua ia te au.

¹² Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua a‘oa‘oina ai a‘u ia ou ma‘ona, ma ou fia ‘ai, ia faulai mai mea, ma ia oge mea.

¹³ Ou te mafaia mea uma lava i le faamalosi mai o Keriso ia te au.

¹⁴ A e ui lava i lea na outou agalelei, ina ua outou alolofa mai i lo‘u puapuaga.

¹⁵ Ua outou iloa foi, outou Filipi e, o le amataga o le tala lelei, ina ua ou alu atu nai Maketonia, e leai se ekalesia na alofa mai ai ia te au i le mataupu o le foai mai ma le talia o mea, na o outou lava.

¹⁶ Auā foi a o i Tesalonia a‘u, na outou avatu mea na ou mativa ai, ua atu tasi, ma le atu lua foi.

¹⁷ E le ina ua ou saili se mea alofa, a ou te saili le fua e atili ai ona ta‘uleleia ai outou.

¹⁸ A ua ia te au mea uma, ua tele lava, ua atoa mea ia te au, ina ua maua e a‘u mai ia Epaferoti o mea mai ia te outou, o mea manogi lelei, o le taulaga e talia ma le mālie i le Atua.

¹⁹ A o lo‘u Atua e faaatoa e ia ia te outou mea uma e matitiva ai outou, e tusa ma le faulai o lona viiga, ia Keriso Iesu.

²⁰ Ia i le Atua lo tatou lava Tamā le viiga e faavavau faavavau lava. Amene.

²¹ Ua ou alofa atu i le au paia uma o ia Keriso Iesu; o alolofa atu ia te outou le au uso uma ua ia te au.

²² O alolofa atu ia te outou le au paia uma, a e sili lava i latou o i le aiga o Kaisara.

²³ Ia ia te outou uma lava le alofa tunoa o lo tatou Alii o Iesu Keriso. Amene.