Fa‘ata‘oto 4 - O LE TUSI PAIA

O LE MATAUPU IV. O le apoapoaiga ina ia saili ia poto.

¹ Faalogo mai ia, outou le fanau e, i le a‘oa‘o atu e le tamā, ma uai mai o outou taliga ina ia faaatamamaiina outou.

² Auā ou te avatu ia te outou le poto e lelei; aua ne‘i tou tuulafoai i la‘u upu e a‘oa‘o atu.

³ Auā o a‘u nei, o le atalii o lo‘u tamā, o le pele toatasi a lo‘u tinā.

⁴ Na ia a‘oa‘o mai ia te au, ma na fai mai ia te au, Ia taofi a‘u upu i lou loto, ia tausiusi i a‘u poloaiga e te ola ai.

⁵ Ia maua le poto, ia maua le atamai; aua ne‘i galo ia te oe nei mea; aua foi ne‘i e liliu ese i upu a lo‘u gutu.

⁶ Aua e te lafoai ia te ia, ona tausia lea o oe e ia; ia e alofa ia te ia, ona leoleoina lea o oe e ia.

⁷ O le poto o le mea sili lea, ia maua le poto; o mea uma e te maua ia maua mai ai le atamai.

⁸ Ia e vivii ia te ia, ona faaeaina lea o oe e ia; na te faamamaluina oe pe a e fusi ia te ia.

⁹ Na te avatu le pale matagofie i lou ulu; o le palealii lalelei na te foaiina atu ia te oe.

¹⁰ Faalogo mai, lo‘u atalii e, ma e talia a‘u upu, ona faateleina ai lea o tausaga o lou olaga.

¹¹ Ou te faasino ia te oe le ala o le poto; ou te ta‘ita‘iina oe i ala sa‘o.

¹² A ē savali e le faalavelaveina lau laasaga; a ē momo‘e e te le tausuai.

¹³ Ia e taofi mau i upu e a‘oa‘oina, aua ne‘i tuuina atu; ia e leoleo i ai; auā o lou ola lava lea.

¹⁴ Aua e te alu i le ala o e agasala; aua foi e te ui i le ala o e fai amio leaga.

¹⁵ Ia e faamamao i ai, aua ne‘i ui atu i ai, ia e ‘alo ai, ma alu ese.

¹⁶ Auā latou te le momoe, se‘i iloga ua latou faia se mea leaga; ua aveesea foi o latou moe, pe afai latou te lei faatausuaiina nisi.

¹⁷ Auā ua latou aai le areto a le agasala; ua latou inu foi le uaina a le sauaga.

¹⁸ A o le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.

¹⁹ O le ala o e amio leaga e tusa lea ma le pogisa; latou te le iloa le mea latou te tausuai ai.

²⁰ Lo‘u atalii e, ia e faalogo mai i a‘u upu; ia uai mai ou taliga i mea ou te fai atu ai;

²¹ aua ne‘i te‘a ese ia mea i ou mata; ia e tausi i ai i totonu o lou loto;

²² auā o ia mea o le ola lea i e ua maua; ma le mea e malolo ai o latou tino uma.

²³ Ia sili ona leoleoina o lou loto i le leoleoina o mea uma; auā e tupu mai ai le amio.

²⁴ Tuu ese ia te oe le gutu faapiopio; ma laugutu faatu‘iese, ia mamao ia ia te oe.

²⁵ Ia vaai sa‘o ou mata i ou luma; ma ou laumata, ia faasagatonu ia i ou luma.

²⁶ Ia mafaufau i le ala o ou vae; ona faatumauina ai lea o ou ala uma.

²⁷ Aua ne‘i afe i le itu taumatau po o le itu tauagavale; ia ‘alo ese ou vae i le leaga.