Fa‘ata‘oto 31 - O LE TUSI PAIA

O LE MATAUPU XXXI. O upu a Lemueli i le uiga o le avā lelei.

¹ O upu a Lemueli le tupu, o le valoaga na a‘oa‘oina ai o ia e lona tinā.

² Se a ea sa‘u upu ia te oe la‘u tama e? se a lava sa‘u upu ia te oe na fanau i lo‘u manava? se a lava sa‘u upu ia te oe le tama na ou tauto ai?

³ Aua ne‘i e avatu lou malosi i fafine, ma ou ala i le mea e fano ai tupu.

⁴ Lemueli e, e le ono i tupu, e le ono lava i tupu le inu uaina, po o alii e manao i le ‘ava;

⁵ ina ne‘i inu o ia, ona galo ai lea o tulafono, ma faasese le finauga o se tasi tagata ua tigaina.

⁶ Avatu le ‘ava i lē a mole; ma le uaina i le ua tiga le loto;

⁷ ia inu ai o ia, ma faagalogalo i lona mativa; ma ia le toe manatu i lona puapuaga.

⁸ Ia e tautala mo e gūgū, o le finauga lava o i latou uma ua aumatuā;

⁹ ia e tautala ia faamasino ma le tonu, ma ia finau mo e ua puapuagatia, ma e ua mativa.

¹⁰ O le avā amio lelei, o ai ea se ua maua? e silisili lona tau i penina.

¹¹ Ua faatuatua ia te ia le loto o lana tane; e le mativa o ia i oloa.

¹² E agalelei o ia ia te ia, a e le agaleaga i aso uma o lona olaga.

¹³ Na te sailia fulufulu mamoe ma lino; ua galue ai ona lima ma le fiafia.

¹⁴ E tusa o ia ma vaa o le faatauoa; e mamao le mea e au mai ai ana mea e ‘ai.

¹⁵ E tulai foi o ia, a o po lava, ma avatu mea e ‘ai i lona aiga, ma le galuega ua tofia i ana auauna teine.

¹⁶ Ua manatunatu o ia i se fanua, ona maua ai lea e ia; o le fua o ona lava lima ua ia fai ai le tovine.

¹⁷ Na te fusia lona sulugatiti i le malosi; na te faamalosia ona lava lima.

¹⁸ Ua iloa e ia ua lelei lana tau; e le mate lana lamepa i le po.

¹⁹ Ua tuu atu e ia ona lima i le kisuro, ma ua tago atu ona lima i le peleke.

²⁰ Ua faamafola lona lima i le ua tigaina; ua tuu atu foi ona lima i le ua mativa.

²¹ E le fefe o ia ona o lona aiga i le kiona; auā ua oofu lona aiga uma i ofu mūmū.

²² Ua fai ie afu mona; o le ie vavae ma le ie pāuli; o ona ofu ia.

²³ Ua iloga lana tane i faitotoa, pe a saofai o ia faatasi ma toeaina o le nuu.

²⁴ Ua fai e ia le ofu lino, ma faatau ai; ua avatu foi fusi i le faatauoa.

²⁵ O le malosi ma le mamalu e fai mona ofu ia; ua ‘ata‘ata foi o ia i aso o lumanai.

²⁶ Ua tautala o ia ma le poto; ua i lona laulaufaiva le tulafono o le alofa.

²⁷ Ua vaavaai o ia i amioga a lona aiga; e le ‘ai foi o ia mea e ‘ai a le paie.

²⁸ E tulai mai lana fanau, ma faafetai ia te ia; o lana tane foi ua vivii ia te ia.

²⁹ E toatele fafine e amio lelei i latou; a o oe; ua faasilisili oe ia i latou uma.

³⁰ O le matagofie e pepelo lea, o le mea faatauvaa le lalelei; a o le fafine ua mata‘u ia Ieova, e viia lava o ia.

³¹ Avatu ia te ia le fua o ona lima; o ana galuega foi e viia ai o ia i faitotoa.