Fa‘amasino 10 - O LE TUSI PAIA

O LE MATAUPU X. O le faamasino a Tulaga ma Iairo.

¹ Ua mavae Apimeleko ona tu mai ai lea e faaola ia Isaraelu o Tulaga le atalii o Pua, le atalii lea o Toto, o le tagata o Isakara, sa mau o ia i Samira i le mauga o Efaraima.

² Na ia faamasino ia Isaraelu i tausaga e luafulu ma le tolu, ona oti ai lea o ia, ua tanumia i Samira.

³ Ua mavae o ia ona tu mai ai lea o Iairo le Kiliata; na ia faamasino ia Isaraelu i tausaga e luafulu ma le lua.

⁴ Sa ia te ia atalii e toatolugafulu, e na tietie i asini e tolu sefulu; sa ia i latou o aai e tolu sefulu, ua igoa ai o Havota-iairo ua oo mai i le aso nei, o loo i le nuu o Kiliata.

⁵ Ua oti Iairo, ua tanumia i Kamoni.

⁶ Ona toe amio leaga lea o le fanauga a Isaraelu i luma o Ieova, ua latou auauna ia Paala, ma Asaira, ma atua o Suria, ma atua o Saitonu, ma atua o Moapi, ma atua o le fanauga a Amoni, ma atua o Filisitia; a ua latou tuulafoai ia Ieova, ua latou le auauna ia te ia.

⁷ Ona toasa tele ai lea o Ieova ia Isaraelu, ua na tuuina atu ai i latou i lima o Filisitia, ma lima o le fanauga a Amoni,

⁸ Sa latou faatiga, ma faasaua i le fanauga a Isaraelu i ia ona po i tausaga e sefulu ma le valu, o le fanauga uma a Isaraelu e na i le la itu o Ioritana i le nuu o sa Amorī i Kiliata.

⁹ Ona sopoia atu lea o le fanauga a Amoni i Ioritana, latou te tau ma Iuta, ma Peniamina, ma le aiga o Efaraima; ua matuā puapuagaina Isaraelu.

¹⁰ Ona alalaga lea o le fanauga a Isaraelu ia Ieova, o loo faapea, Ua matou agasala atu ia te oe, ina ua matou tuulafoai i lo matou Atua, a ua matou auauna ia Paala.

¹¹ Ona fetalai mai lea o Ieova i le fanauga a Isaraelu, E le o Aikupito ea, ma sa Amorī, ma le fanauga a Amoni, ma Filisitia;

¹² ma sa Saitonū, ma Amaleka, ma Meona, sa latou faasauaina outou, ona outou valaau mai lea ia te au, ma ou faaolaina outou ai o latou lima.

¹³ A o outou, ua outou tuulafoaiina a‘u, ma ua outou auauna i atu ese; o le mea lea ou te le toe faaola ai ia te outou.

¹⁴ O ia, ina valaau i atua ua outou loto i ai, se‘i latou faaola ia te outou i ona po o lo outou puapuaga.

¹⁵ Ona fai atu lea o le fanauga a Isaraelu ia Ieova, Ua matou agasala, ia e faia ia te i matou mea uma ua e finagalo i ai; tau lava ina e laveai mai ia te i matou i lenei aso.

¹⁶ Ona latou tuu ese lea o atua ese sa ia te i latou, ma latou auauna ia Ieova; na tigaina lona finagalo ona o le puapuaga o Isaraelu.

¹⁷ Ua faapotopotoina le fanauga a Amoni, ma latou to lauapi i Kiliata; ona faapotopoto lea o le fanauga a Isaraelu, ua to lauapi i latou i Mesepa.

¹⁸ Ona fai ane lea o le nuu ma alii o Kiliata o le tasi i le tasi, O ai se tasi na te amata ona tau ma le fanauga a Amoni? E fai o ia ma alii sili i e nonofo uma lava i Kiliata.