3 Ioane 1 - O LE TUSI PAIA

O LE MATAUPU I. O le tusi ia Kaio.

¹ O a‘u le toeaina, o la‘u tusi lenei ia Kaio, o le pele, o le ou te alofa faamaoni i ai.

² Le pele e, ia e manuia i mea uma, ma ia e malolo, faapei ona manuia o lou agaga.

³ Auā ua tele lava lo‘u fiafia ina ua o mai le au uso, ma faailoa mai lou faamaoni, ina ua e savali i le upu moni.

⁴ E leai so‘u fiafia e sili i lenei, pe a ou faalogo ua savavali la‘u fanau i le upu moni.

⁵ Le pele e, ua e faamaoni lava i mea uma o faia e oe i le au uso atoa ma tagata ese,

⁶ o e ua faailoa mai lou alofa i luma o le ekalesia; afai e te fesoasoani i lo latou moliga e tusa i le Atua, e lelei lau mea e fai.

⁷ Auā na latou o atu ona o lona suafa, e lei talia sina mea mai nuu ese.

⁸ O lea e tatau ai ona tatou talia tagata faapea, ina ia tatou fai ma fesoasoani i le upu moni.

⁹ Na ou tusi atu i le ekalesia, a o Tioterifi, o lē fia sili ia te i latou, e le talia i matou e ia.

¹⁰ O le mea lea, pe a a‘u alu atu, ou te faamanatu ai lana amio o loo faia e ia, o loo tuaupua mai ia i matou i upu leaga; e le gata foi i ia mea, a e le talia lava e ia le au uso, e vavao atu foi i e loto i ai, na te faateaina foi i latou i le ekalesia.

¹¹ Le pele e, aua e te faaa‘oa‘o i le leaga, na o le lelei. O lē amio lelei, mai le Atua lava lea; peitai o lē amio leaga, e lei iloa atu lava e ia le Atua.

¹² Ua logoleleia Temetiu e tagata uma lava, atoa ma le upu moni lava; o i matou foi matou te molimau i ai, ua outou iloa foi e moni la matou mau.

¹³ Ua ia te au mea e tele e tusi atu ai, a ou te le fia tusi atu ia te oe i le vaitusi ma le fulu tusi.

¹⁴ Auā ou te faamoemoe o le a vave feiloai i taua, ina ia ta fetautalatalai. Ia ia te oe le manuia. O loo alolofa atu le aumea mamae ia te oe; ua ou alofa i le aumea mamae uma lava.