1 Tupu 1 - O LE TUSI PAIA

O LE MATAUPU I. Ua toeaina Tavita. Ua fouvale Atonia. Ua fai Solomona ma tupu.

¹ Ua toeaina le tupu o Tavita, ua tele ona tausaga; ua latou ufitia o ia i ie, a e le mafanafana ai o ia.

² Ona fai atu lea o ana auauna ia te ia, Se‘i saili mai se teine taupou mo lo matou alii le tupu, ina ia tu o ia i luma o le tupu, ma tausi ia te ia; ia taoto foi o ia i lou fatafata, ina ia mafanafana ai lo matou alii le tupu.

³ Ona latou sailiili ai lea i itu uma o Isaraelu o se teine lalelei; ua latou maua Apiseka le Sunema, ona latou aumaia lea o ia i le tupu.

⁴ O le teine matuā lalelei lava ia, na ia tausia foi le tupu, ma auauna ia te ia; a e lei iloa o ia e le tupu.

⁵ O Atonia, o le tama tane a Akita, ua faamaualuga o ia, ua faapea, Ou te fai ma tupu. Ua ia faia foi mona o le nofoa faataavalevale, ma ē tietie i solofanua, ma tagata e toalimagafulu o taufetuli i ona luma.

⁶ E lei faatigaina o ia e lona tamā talu ina tupu mai, i lona fai atu, Se a le mea ua e faapea ai? O ia foi ua aulelei lava lona tino na fanaua o ia o le tua o ia o Apisaloma.

⁷ Ua latou fetautalatalai foi ma Ioapo le tama a Seruia, ma Aviata le faitaulaga; ua la fesoasoani ma mulimuli atu ia Atonia.

⁸ A o Satoka le faitaulaga, ma Penaia le atalii o Ioiata, ma Natano le perofeta, ma Semi, ma Rei, ma le au toa, o e sa ia Tavita, ua le i ai i latou ia Atonia.

⁹ Ua fafasi foi e Atonia o mamoe ma povi, ma manu pepeti, e lata ane i le maa o Soelete, e lata ane i Enerokelu, ua ia tala‘i atu ai ona uso uma, o atalii o le tupu, ma tagata o Iuta uma lava, o auauna a le tupu;

¹⁰ a o Natano le perofeta, ma Penaia, ma le au toa, atoa ma Solomona lona uso ua ia le tala‘iina.

¹¹ Ona fai atu lea o Natano ia Patesepa le tinā o Solomona, ua faapea atu, Ua e le faalogo ea o loo fai ma tupu Atonia le tama tane a Akita, a e le o silafia e lo tatou alii Tavita?

¹² O lenei, ina sau ia, so‘u faatonu atu ia te oe, ina ia faaola oe ia te oe, ma lau tama o Solomona.

¹³ Alu ia oe, ma e ulufale atu i le tupu o Tavita, ma e fai atu i ai, Le alii e, le tupu, na e le tauto mai ea ia te au lau auauna fafine, ua faapea mai, E moni, e fai lau tama o Solomona ma tupu pe a mavae atu a‘u, e tietie foi o ia i lo‘u nofoālii; se a foi le mea ua fai ai Atonia ma tupu?

¹⁴ Faauta mai ia, a o tautalatala ai oulua ma le tupu ou te alu atu foi e mulimuli ia te oe, ma ou faamaonia au upu.

¹⁵ Ona alu atu ai lea o Patesepa i le tupu i lona potu, ua toeaina lava le tupu; ua auauna foi Apiseka le Sunema i le tupu.

¹⁶ Ona punou ai lea o Patesepa, ma ifo atu i le tupu. Ona fai mai lea o le tupu, Se a ea lou manao?

¹⁷ Ona fai atu lea o ia ia te ia, Le alii e, na e tauto ia Ieova lou Atua i lau auauna fafine, na faapea mai, E moni, e fai lau tama o Solomona ma tupu pe a mavae atu a‘u, a tietie foi o ia i lo‘u nofoālii.

¹⁸ O lenei, faauta, o loo fai ma tupu Atonia, a o oe le alii e, le tupu, ua e le silafia.

¹⁹ Ua fafasi foi e ia o povi, ma manu pepeti, ma mamoe e tele lava, ua ia tala‘iina foi o atalii uma lava o le tupu, ma Aviata le faitaulaga, ma Ioapo le pule i a‘u; a o Solomona lau auauna ua ia le tala‘iina.

²⁰ A o oe le alii e, le tupu, o loo faasagasaga Isaraelu uma ia te oe, ina ia e faasino mai ia te i latou po o ai e tietie i le nofoālii o lo‘u alii le tupu pe a mavae atu o ia.

²¹ A leai, ona ta‘uagasalaina lea o i maua ma la‘u tama o Solomona, pe a taoto lo‘u alii le tupu faatasi ma ona tamā.

²² Faauta, o tautalatala i laua ma le tupu, ua ulufale atu Natano le perofeta.

²³ Ona latou ta‘u atu lea i le tupu, ua faapea atu, Faauta, o Natano le perofeta. Ua ulufale atu o ia i luma o le tupu, ona ifo toele lea o ia i luma o le tupu.

²⁴ Ona fai atu lea o Natano, Le alii e, le tupu, po ua e fetalaia ea, E fai Atonia ma tupu pe a mavae atu a‘u, e tietie foi o ia i lo‘u nofoālii?

²⁵ Auā ua alu ifo o ia i le aso nei, ma ua fafasi i povi, ma manu pepeti, ma mamoe e tele lava; ua tala‘iina foi e ia o atalii uma o le tupu, ma e avea ‘au, ma Aviata le faitaulaga; faauta foi, ua latou aai ma feinu i ona luma, ma ua faapea ane, Ia soifua le tupu o Atonia.

²⁶ A o a‘u, o a‘u nei lau auauna, ma Satoka le faitaulaga, o Penaia foi le atalii o Ioiata, ma lau auauna o Solomona ua ia le tala‘iina.

²⁷ Po ua faia ea lenei mea e lo‘u alii le tupu, a e te lei faailoa mai i lau auauna po o ai e tietie i le nofoālii o lo‘u alii le tupu pe a mavae atu o ia?

²⁸ Ona tali mai lea o le tupu o Tavita, ua faapea mai, Ina valaau atu ia ia Patesepa e sau ia te au. Ona sau lea o ia i luma o le tupu, ua tu foi i luma o le tupu.

²⁹ Ona tauto lea o le tupu, ua faapea mai, O loo soifua Ieova, o le na faaolaina a‘u i puapuaga uma lava,

³⁰ e faapei ona ou tauto ia te oe ia Ieova le Atua o Isaraelu, ua faapea atu, E moni, e fai lau tama o Solomona ma tupu pe a mavae atu a‘u, e tietie foi o ia i lo‘u nofoālii e sui a‘i a‘u, e faapea lava ona ou faia i le aso nei.

³¹ Ona punou lea o Patesepa i le eleele, ua ifo o ia i le tupu, ua faapea atu, Ia soifua e faavavau lo‘u alii le tupu o Tavita.

³² Ona fai mai lea o le tupu o Tavita, Ina valaau atu ia ia Satoka le faitaulaga, ma Natano le perofeta, ma Penaia le atalii o Ioiata. Ona latou o mai lea i luma o le tupu.

³³ Ona fai atu lea o le tupu ia te i latou, Ina o ia outou atoa ma auauna a lo outou alii, ma faatietie ia Solomona lo‘u atalii i la‘u lava falata, ma ta‘ita‘i ifo ia te ia i Kiona;

³⁴ ma ia faauuina o ia i lea mea e Satoka le faitaulaga, ma Natano le perofeta, e fai ma tupu ia Isaraelu; ia outou ili foi le pu, ma fai atu, Ia soifua le tupu o Solomona.

³⁵ Ona outou o ae lea o mulimuli ia te ia, ina ia sau o ia ma tietie i lo‘u nofoālii; auā e fai o ia ma tupu e sui a‘i a‘u; ua ou tofia foi o ia e fai ma ta‘ita‘i ia Isaraelu atoa foi ma Iuta.

³⁶ Ona tali atu lea o Penaia le atalii o Ioiata i le tupu, ua faapea atu, Amene; ia faapea ona fetalai mai o Ieova le Atua o lo‘u alii le tupu.

³⁷ E faapei ona i ai o Ieova i lo‘u alii le tupu, ia faapea lava ona i ai o ia ia Solomona, ma faasili ona mamalu o lona nofoālii i le nofoālii o lo‘u alii le tupu o Tavita.

³⁸ Ona o ifo lea o Satoka le faitaulaga, ma Natano le perofeta, ma Penaia le atalii o Ioiata, ma le au Kereti, ma le au Peleti, ma latou faatietie ia Solomona i le falata a le tupu o Tavita, ma latou ta‘ita‘i ia te ia i Kiona.

³⁹ Ona ave lea e Satoka le faitaulaga se fagu nifo o suāuu ai le fale fetafai, ma faauu a‘i ia Solomona. Ona latou ilia lea o le pu; ua fai atu le nuu uma, Ia soifua le tupu o Solomona.

⁴⁰ Ona o ae lea o le nuu uma o mulimuli atu ia te ia, ua latou ilia foi fagufagu, ma latou olioli lava ma le olioli tele, ua māvae le laueleele i lo latou alalaga.

⁴¹ Ua lagona ai e Atonia ma i latou uma sa tala‘iina e ia, ina ua uma ona latou aai. Ua lagona foi e Ioapo le leo o le pu, ona faapea lea o ia, Po o le a ea lena vāvāo o le aai ua vevesi?

⁴² Faauta, o tautala o ia ua sau Ionatana le atalii o Aviata le faitaulaga; ona fai atu lea o Atonia ia te ia, Sau ia, auā o oe o le tagata amio lelei, ma ua e aumaia tala lelei.

⁴³ Ona tali mai lea o Ionatana ia Atonia, ua faapea mai, E moni, o lo tatou alii o le tupu o Tavita, ua na faia lava Solomona ma tupu.

⁴⁴ Ua aauina foi faatasi ma ia e le tupu, o Satoka le faitaulaga, ma Natano le perofeta, ma Penaia le atalii o Ioiata, ma le au Kereti, ma le au Peleti, ua latou faatietie foi ia Solomona i le falata a le tupu;

⁴⁵ ua faauuina foi o ia i Kiona e Satoka le faitaulaga ma Natano le perofeta e fai ma tupu; ua latou o ae ai ma le olioli, ua vevesi ai foi le aai. O le vāvāo lea ua outou faalogo atu i ai.

⁴⁶ O loo tietie foi Solomona i le nofoalii o le malo.

⁴⁷ I le ma lea foi, ua o atu auauna a le tupu e faamanuia atu i lo tatou alii le tupu o Tavita, ua faapea atu, Ia faasili e le Atua o le suafa o Solomona i lou suafa, ma ia faasili lona nofoālii i lou nofoālii. Ona ifo lea o le tupu i lona moega.

⁴⁸ Ua fai mai foi le tupu, ua faapea mai, Ia faafetaia Ieova le Atua o Isaraelu, o le ua foaiina mai i le aso nei o le tasi e tietie i lo‘u nofoālii, o loo vaai atu i ai o‘u mata.

⁴⁹ Ona matatau ai lea o i latou uma e na tala‘iina o e sa i ai ma Atonia, ma ua latou tutū ua latou taitasi ma alu i lona ala.

⁵⁰ Ua mata‘u foi Atonia ona o Solomona, ona tulai lea o ia ma alu, ma tago atu i nifo o le fata faitaulaga.

⁵¹ Ua ta‘uina mai foi ia Solomona ua faapea mai, Faauta, ua mata‘u Atonia i le tupu o Solomona; faauta foi, ua tago atu o ia i nifo o le fata faitaulaga, ua faapea mai o ia, Ia tauto mai le tupu o Solomona ia te au i le aso nei na te le fasiotia lana auauna i le pelu.

⁵² Ona fai atu lea o Solomona, Afai e amio lelei o ia e le paū sona lauulu i le eleele; a e afai e iloa se leaga ia te ia, e oti ia.

⁵³ Ona aauina atu lea nisi e le tupu o Solomona; ua latou ta‘ita‘i mai foi ia te ia ai le fata faitaulaga. Ona sau lea o ia, ma ifo mai i le tupu o Solomona; ona fai atu lea o Solomona ia te ia, Alu ia oe i lou fale.