TIMOTHI MƆƐKƐ TIŊDƐ 1 - Sherbro New Testament Portions

¹ Pɔl, lemnɔ Krayst Jisɔsɛ ka fɔsa Hɔbatokɛ ni kaŋgbe ihɔlɔŋdɛ Krayst Jisɔsayɛ,

² ko Timothi, komɔ mi ŋchɔmalen dɛ wɔŋɔ, kelenyendapani, ni mbɔs hiŋg Hɔbatokɛ Baaɛ ni Krayst Jisɔs Bɛɛ hiyɛ.

Chɔŋsɛkɛ ni thɛthɛ

³ Ya chɔŋɔ Hɔbatokɛ sɛkɛ wɔ ya haa mpanthɛ ka bolɛ charaŋ, kendɛ mba ŋami ŋa haɛ, yɛ ya kɔche ha tɛniɛmɔni sɛlimdayɛ.

⁴ Yɛ ya tɛniɛni imam mɔɛ, ya ŋgbelŋgbel ichɔl ni ipal ha ke mɔ, chelɛ ya bɔ pɛ ka iŋɔɛ.

⁵ Ya tɛniɛni laanɛ mɔ tiŋtiŋdɛ, laanɛ kɔ ka che nsendɛ thetha mɔ Lɔisay ni yamɔ Yunisay, ni yɛlayoɛ ya laanɛ kɔ hɔmay.

⁶ Labiyɛ ya mɔni hokbolɛ ha mɔn tɛki wɔŋɔ Hɔbatokɛ hɔmay ka hini pia thimdɛ hɔm bol;

⁷ haliwɔ Hɔbatokɛ ka kahi ni min ŋkwath kɛ ka hi min fɔsa ni nchɔŋmalen ni lɛlinikɛn atok.

⁸ Ma lap ha hɔ jali kɛlɛŋ ha Bɛɛ hiɛ, ni ha yaŋ nɔwɔ kekay. Kɛ poɔni ngbathil mamdɛ ha Womdi Yegbeyɛ fɔsa Hɔbatokay.

⁹ Wɔ loliɛ hiɛ ni vel hi vel charaŋay, che ka mpanth ma hi kɛlɛŋdɛ kɛ ka ikɛlɛŋ la wɔn yemaɛ ni wɔŋɔ Hɔbatokɛ kɔ wɔŋdɛ Krayst Jisɔsay mbɛnay,

¹⁰ ni yɛlayoɛ koŋ toŋgini hiŋg Nɔloliɛ hiɛ Krayst Jisɔs. Wɔ koŋka wullɛ ni chi ihɔlɔŋ ni ihɔlɔŋ chɔŋgba ko checheɛ ka Womdi Yegbeyɛ.

¹¹ Ha Womdi Yegbeo ki la pɔ hami nɔ thɛkɛsiɛ ni awoma ni nɔ toŋgiɛ ayin,

¹² ni labi ya thenɛki kendɛki. Kɛ ya chela lapka, haliwɔ ya si nɔɛ wɔ ya koŋ laanɛ, ni yabi laanɛ kɛ wɔ bɔ pa yendɛ ŋɔ pɔ kami ha thɔnda haŋ huɛ yɛvɛ.

¹³ Lemil naythin ŋhɔk tiŋtiŋdɛ kɔ koŋ the hiŋg yaŋdɛ, laanɛay ni nchɔŋmalendɛ ma Krayst Jisɔsayɛ;

¹⁴ mpa tiŋtiŋdɛ kɔ Min Charaŋdɛ wɔ hi thiyeŋdɛ kamɔ ha thɔŋgulɛ.

¹⁵ Siyɛ lɛ ŋanɛ gbi Esiako ha thimni kɔk hiŋg yaŋ, ni han thiyeŋ haɛ Figilɔs ni Hamoginɔs.

¹⁶ Ha ni Bɛɛ ke ram Onisifɔrɔsɛ yendapani, haliwɔ wɔm thɛthɛ kɛtkɛt; ka cheni lap ka nyɔlkɔ mamdɛ,

¹⁷ kɛ yɛ wɔ mɔɛ Romkoɛ wɔ ye che ŋgbelŋgbel ha lɛliɛ mi ni ke mi.

¹⁸ Ha Bɛɛ ha ni sɔthɔ yendapani hiŋg Bɛɛ hɔɛ yɛ vɛ ni si fuli mpanthɛ ma wɔ ha Ɛfisɔskoɛ.