JƆN MƆƐKƐ TIŊDƐ 1 - Sherbro New Testament Portions

¹ Nɔ bɛndɛ ko nɔma wɔ pɔ kweɛ ni apumawɔɛ, wɔ ya chɔŋlen tiŋtiŋdayɛ, ni chen yaŋ kɛn gbo kɛ ni ŋanɛ gbi ŋa si tiŋtiŋdɛ,

² haliwɔ ha tiŋtiŋ dɛ kɔhiayɛ ni kɔ bi ha che ni hin ha chɔŋgba:

³ Wɔŋɔ Gbɛŋ, keyendapani, ni mbɔs ma bi ha che ni hin, hiŋk Hɔbatokɛ Baaɛ ni hiŋk Jisɔs Krayst Tak Baaɛ, tiŋtiŋday ni ŋchɔmalen day.

Tiŋtiŋ ni Ŋchɔmalen

⁴ Ya ihɔɛ bomay ha ke apumanɔɛ apum ŋa lemil tiŋtiŋdɛ, kendɛ hɔ Baaɛ ko hi gbɔndaɛ.

⁵ Ni yɛlayoɛ ya mɔ thɛlɛni, wantama, chendɛ kendɛ yɛ ya mɔ gbala saba sanaɛ, kɛ ŋɔnɛ hɔ hi ka koŋ sɔthɔ hiŋg tipɛkɛ, hi ha chɔŋniyalen.

⁶ Ni ki ma ŋchɔmalen, lɛ hi lemil saba thi wɔɛ; sabaɛ hɔ kiɛ, kendɛ ha koŋ theɛ hiŋk tipɛkɛ, lɛ ha lemil ŋchɔmalen.

⁷ Haliwɔ anya fothiɛ mbol agbe ha koŋ honi hɔlɔay, apukan ha chen bi ha kwe hun Jisɔs Kraystɛ jalay; nɔ che vɛ wɔɛ nɔ fothiɛ mbol ni nɔ boŋsua Krayst.

⁸ Ha bɛkninten, chelɛ ŋa chen tuki yendɛ hɔ ha koŋ ha mpanthɛ, kɛ ha bi ha sɔthɔ paka pɛɛ thiŋ.

⁹ Nɔɛ gbi wɔ kɔ gbo cheeɛ ni che ni toŋgi Kraystɛ biɛni Hɔbatokɛ; nɔɛ wɔ kweyɛ gbo toŋgi Kraystɛ bi Baaɛ ni Taaɛ ŋan atiŋ.

¹⁰ Yɛ nɔ gbi hun gbo konɔko ni chiɛni toŋgiyo ki, ŋa mawɔ gbaŋa kilɛko o ŋa ma wɔ lɛiŋ;

¹¹ haliwɔ nɔɛ wɔ lɛŋyɛwɔ gboɛ koŋ poɔni mpanth ma wɔ kafaɛ.

Ŋhɔk mɛkindɛ

¹² Yɛlabɛ ya bi li gbe ha gbal konɔkoɛ, ya chen theni ŋa kwe pɔm raɛ ni mɛn gbalkaɛ, kɛ ya bi kithgbɔl ha hun ha kenɔ ni ha thelema nɔ ŋan thɔlɛ, chelɛ iŋɔɛ hi yɛ ŋɔ che pɛɛ thiŋ.

¹³ Apuma wante mɔɛ ha pɔ koŋ kweɛ ha mɔ lɛyŋ.