Yota 1 - Seysyo No Tao

¹ Yaken rana am si Yota ko a lamlamsoy na ni Yeso Kizisto a kakteh na ni Yake. Ko ipeyteygami inyo a nipamnekan na rana ni Ama ta do to a yamahap rana so pangangarilawan na ni Ama ta do to a yamanoyong a yana rana apzatan ni Yeso Kizisto.

² Inaoy si itoro na jinyo o pangangasyan na kano ikapiya no onowned nyo a kano pangangarilawan nyo.

Malas so ipangnanao a tao

³ Manga keypong, nimanakem ko o kapeyteygami ko ninyo a pancyan ko no kapatazadang na jyaten ni Ama ta do to do teyngato. Am apyapya pa o kavavaga ko jinyo a kowyat nyo a mangozay do nipeylimwang da rana jinyo no nipamnekan na ni Yeso a amlivolivon no ciriciring na ni Ama ta do to. Ta oya rana am yajyablis a pangozayan no amraralay nya tao.

⁴ Ta yamyan so yatatasa ka tao a yamacizavoz jyaten. Sira rana am yamalas o yada ahahapan so pangangarilawan na ni Ama ta do to a kano ciring na a yada ibonbon do da pasagpyanan so kataotao da. Da taosyahen si Yeso Kizisto a yamaveyvow a yatomalamozong nyaten. No kakwa pa am amyan rana so ciring a domket do Seysyo a omaing jira, do keyyan no ipasingsingkad na sira ni Ama ta do to.

⁵ Tana nyo na mamimin o akman sang a vazay a katenngan am ko paolin a ipanci jinyo o nisidongan na sira ni Ama ta do to so Isedi a tao a nikomaro do Ayci. So nibalinas na so karwan da ji manganoyong a tao.

⁶ Naknakmen nyo sira o nimeyraraten a tinsi a ji niomamizing si Ama ta do to a to ngaro do apiya yanan da do teyngato. Sira rana am na sira to peyyononga yavaoden ni Ama ta do to a yaneban do kasarisaryan a yaomapanala so araraw no ipasingkad na sira.

⁷ Naknakmen nyo o tao a yameyvahay do Sotoma kado Hamola kano yamacitangked do dang so ili a tao a yamapasala so aktokto da a yamapeyvazay so macimasesnek a vazay. So ikanoyong no jyahesep a lila no apoy a nimangay meydedna jira. O akman rana sang a vazay am ikananao da rana ori no meyraraten a tao.

⁸ O yamalas so ipangnanao a tao am akman sira so sang. Ta da to mangozangozai o aktokto da yamapasagpyan so kataotao da. Da kolalahen o oyowyat na ni Ama ta do to. Da ipeyzozominyak o tinsi do teyngato.

⁹ Kakwakwan no panirsirngen no tinsi a meyngaran so Micyale a ji makadket ji Satan a avain, no kapeysolib da do kataotao ni Moyse no kawakwak na. O kanimanci na nya ji Satan so, “Ioya na imo ni Ama ta do to.”

¹⁰ Am sira rana a malas so ipangnanao a tao ori am da to rehrehta o yada jyatenngi a vazay. So da icyakmey omalalam a ji makateneng do apya kano marahet. Ori rana o ipakasapa da so peyoyaoyyan na ni Ama ta do to.

¹¹ Sira rana am to sira makasi, ta da to nginara o mina vazay ni Kayin a kani Palang a nimakza no nizpi. So da icyakman si Kela a jya niomamizing si Moyse. So icyakman da sira ori a balinasen na ni Ama ta do to.

¹² No kamo mamarimaring so kanen am nyo pacikatamwadan sira, do da kabo no panganyanigan. So da icyakman so cinalab a yana pavyoten no pagpag a ji na maciralai no cimoy. So da icyakman so kayo a ji malasi, akmey nimasapwat so yamot a to rana oto.

¹³ Sira akman so otab no awa yarana todapengkad so raraten. Sira akman so ananayo a jyatenngi so angayan. Am o angayan na nira ni Ama ta do to am to meyyonong a kasarisaryan.

¹⁴ Amyan rana so ciring na a pagazen na jira do ikapito da tapilan no sivosivovoong na ni Adam a meyngaran so Inok. Maniring am, “Cita kamo o Panirsirngen ta a yamapalolo so yameykalaklaksa a tinsi a yamai do karawan,

¹⁵ a mapeykapyapinpin so tao do karawan, a mapasingsingkad do meyraraten a tao. Ta ji sira macipayok so aktokto a meynyagamo ni Ama ta do to.”

¹⁶ Masangib sira meyoyaoya a ji makamyamya no peymeymasaodan da. Da to ngonongonongi o nakenakem da, mapakazwazway no ciring da. Apiya o ciring da a ipeha da do icyatatao da.

Ipaziman so tao a vavaga

¹⁷ Am manga keypong, ji nyo a hamangi o ciring da no nipamnekan ni Yeso Kizisto a Panirsirngen ta a amlivolivon no ciriciring na.

¹⁸ Maniring sira jinyo am, “Do kavosan no karawan am amyan so tao a komolala si Ama ta do to a meykeykaming ninyo.”

¹⁹ So to na meyyangai ya kano mina ciring da jinyo. O akman rana sang a mapeyzavozavoz jinyo a tao am abo jira o Seyzi na ni Ama ta do to. Ta kapangozay da do onowned da a omnakenakem so kapeyvwak da so tao.

²⁰ Am inyo rana manga keypong am makowyat kamo so nakenakem ji Ama ta do to a mangozay do manoyong a nanao na. Ipeyhanhan nyo o Seyzi no meynozi kamo.

²¹ Ji nyo ngawawan do onowned nyo o pangangarilawan na ni Ama ta do to a meyhanhan ni Yeso Kizisto a Panirsirngen ta a marilaw ninyo a manta ninyo so to meyyonong a ikavyay no pahad nyo.

²² Sira rana yameykeykarwa pa so nakem a tao am ikarilaw nyo sira a pakdekdengen so nakem ji Ama ta do to.

²³ O yatatasa ka tao a da nilittan no yamalas so ipangnanao a tao am paolin nyo o nakenakem da, ta makasi sira mangay do lila no apoy. Am azimanen nyo o kaji nyo to macikzan jira a meyraraten.

²⁴ Apzatan na inyo ni Ama ta do to a kaji nyo meyraratenan. So ikanoyong nyo a masaray a abo so karatan a mangay do tangain na ni Ama ta do to a macikazway jya.

²⁵ Si Ama ta do to am abo o ikararwa na a yanitomovoy si Yeso Kizisto a Panirsirngen ta a mapatazadang jyaten do teyngato. Inaoy si mangay jya o azwazway do teyngato a kado teyrahem nimapo no kakwa, na kai sicyakwaya a kangay na do kaidan no karawan. Amin.