Yake 5 - Seysyo No Tao

Ipaziman so katenngan a tao

¹ Inyo rana yakatenngan a tao am amizngen nyo o ciring ko. Amlavi kamo a peydednan no alalaw.

² Mavozcin jinyo o peymeymasaodan nyo. Mangay kapeykamyamil no ayob nyo.

³ Mangay karaci no nizpi nyo. O raci no nizpi nyo am yongkad no kababayo nyo. So icyakma ney apoy no nizpi nyo a ombalinas jinyo. Ikeykongo kamo a yato ngimong no kangangay nyo, do yana ikakeykai rana no araraw no peyoyaoyyan na ni Ama ta do to.

⁴ Nyo jingneta o nizpi da no yameyvazay do hakawan nyo. Amizngey kamo o da iraherahet jinyo a kano da pasyasyan. Ta na rana nimamizing ni Ama ta do to o da lavyan.

⁵ Yateywara o yanyo sarayan no peymeymasaodan nyo do karawan. So yanyo icyakmey vinyay a tey matatava a yameypanam a da ipamaring so kanen.

⁶ Nyo pananakawen sira o yamakasi a tao. Nyo kawakwak pa siraha, do da kabo no oyowyat a yamapatonggal jinyo.

Jyahayo a meynozi

⁷ Am ori manga kakteh an, ji nyo macimangsahi a omapananala si Yeso Kizisto a Panirsirngen ta mai. To nyo nita o omhakakaw a tao a ji macimangseh a mapanala so cimoy a mapasaod so nihakawan na.

⁸ Akman sang an, to kamo ngotokot so nakem a mapananala so araraw na no yai na ni Yeso Kizisto. Ta yarana makeykai o araraw no na yai.

⁹ Ji nyo oyyan o kadwan jinyo, manga kakteh an, ta ioya na inyo ni Ama ta do to. So na rana ikakeykai a mai no yamapeykapyapinpin jyaten a Panirsirngen ta.

¹⁰ Naknakmen nyo sira o yamangozay do ngaran na ni Ama ta do to a yamnoyonoyo so ciring na tao an. Ta inarahen nyo sira a tongbo so alalaw da an.

¹¹ Tamo ipanci sira tey masaray a tao an, do da kajya haywan no yamyan so alalaw da an. Nimamizing nyo rana si Yepo a jya nimablis so onowned no keyyan no alalaw na. So nyo ipakateneng do kato na ngavosan no alalaw na nisidong na ni Ama ta do to. Ta si Ama ta do to rana am tey rako o pangangarilawan na kano pangangasyan na.

¹² O ney makdeng na, manga kakteh am taosya o kapacipeyyeyyan nyo so nakem do teyrahem. Ta manoyong saon am manoyong am. O malas saon am malas am. Ta no si makman kamo sang am jyabo kaoya na ninyo ni Ama ta do to a.

¹³ No myan jinyo so makasazi so alalaw am meynozi an. No masaray kamo am meyyanwanood kamo an a somaray nya ji Ama ta do to.

¹⁴ No myan jinyo so meyngen am ipanci na sira o panipanirsirngen do kyokay a meynozi nya a kapangozay da do ngaran na ni Yeso Kizisto a Panirsirngen ta a komoris jya no haneng.

¹⁵ No ipeyhanhan nyo o ngaran na am mavoga na o ingingnen na no makaliliw sya tao. So ikanoyong na rana nikeywakwakan so kataotao. No myan so raraten no tao ori am todavonas rana.

¹⁶ Patwawen nyo o kalasan nyo do kadwan jinyo a kapeynozi nyo no kadwan jinyo a keywakwak jinyo. Ta tey rako o oyowyat no inozi no apiya so nakenakem a tao.

¹⁷ Meyyangay ta tao a kani Idiya. Ikongo do tey makdeng a meynozi no kaji na cimoyan, am ori o ikanoyong na jya nimacimoy a kasisi so ikapat a kawan.

¹⁸ Meynozi pa am makas rana o cimoy apo do teyngato. Ori o nipakapiya na rana nimlida no nihakawan da.

¹⁹ Manga kakteh, no si myan jinyo so nimavozaw a nikomaro rana do nanao na ni Ama ta do to a keyyan no tao a mapeysinaoli sya am,

²⁰ manakem nyo an. O tao a nimapaoli so akma ney kakteh do cinai a apo do peyraratenan na am manoyong o akman sang a tao a niomagag sya do peyoyaoyyan na ni Ama ta do to, do kanimavonas na rana no aro a raraten na.