Veydimeng 1 - Seysyo No Tao

¹ Yaken rana am si Pawlo ko. Yako akmey nimanakaw a tao a yada aptengen do yako kahap so vazay na ni Yeso Kizisto. Yaken a kani Timotay am namen ipeyteygami imo a akma nameney kakteh do cinai, mo Veydimeng,

² a kano yameyneynozi do vahay nyo a akma tey kakteh do cinai. So namen peyteygamyan no kakteh ta si Aveyya kano kararay namen a si Asipo a yamowyat a yamahap so vazay na ni Ama ta do to.

³ Inaoy no si itoro na jinyo ni Ama ta do to a kani Yeso Kizisto a Panirsirngen ta o pangangarilawan na kano ikapiya no onowned nyo.

Nakenakem na ji Yeso Kizisto a kano pangangarilawan na ni Veydimeng

⁴ Imo rana akma nameney kakteh do cinai mo Veydimeng am no ko ipeynozi imo am yako isaray imo ji Ama ta do to.

⁵ Ta ko mamizing o pangasyan mo so akma tey kakteh do cinai a yamraralay ni Ama ta do to a kano nakenakem mo ji Yeso Kizisto a Panirsirngen ta.

⁶ Ko ipeynozi ji Ama ta do to o kapeyraporapong na jyaten do yata kakmey yasa a yamraralay ni Ama ta do to. So ipakateneng ta do makakaday a apya vazay a mamimin a apo ji Kizisto, do yata kapeyhanhan ni Kizisto a yasomidong jyaten.

⁷ O pangangarilawan mo, mo Veydimeng am yatey rako na nipasarayan jyaken, na nipaitan jyaken. So da ikamimin no akma tey kakteh do cinai a yasomaray nimo.

Kakzeben ni Pawlo ji Onaysemo

⁸ Am ori an, no ko manoyong a akma moy kakteh do cinai do ta kapacikaop ji Kizisto am ji ko amwan nimo a pahanhanen a mahap so ciring ko.

⁹ Ko katenngan o katey rako no pangarilawan mo so tao. Am ko ji gacigaci imo a manidong so tao, ta yako apyapyahen pa o kapasyasi ko jimo do kapanadnad ko jimo. Ta yako rarakeh rana a yada masangib a aptengen, do ko kahap so vazay na ni Yeso Kizisto.

¹⁰ O yako kakdain jimo am ikarilaw mo si Onaysemo an. Ta iya rana am akma koy anak ji Kizisto do ko iyan rana do pamemtengan. So ko icyakmey ama na do raralayan ta ni Ama ta do to, ta amizngen na o ninanao ko sya a Ciriciring na ni Ama ta do to.

¹¹ No kakwa pa am abo o ilamnayan na jimo. Am sicyaikwaya am yana ilamnain rana imo a ka nyaken.

¹² Ko na peysinaolin jimo sicyaikwaya si Onaysemo a mangay jimo do dang, a ney kaglaw ko akmey minapodpod jyaken.

¹³ Ko kakdain o kato na ngyanan do katangked ko akmey kataotao mo a mapeyveyveken jyaken, do aptengan da jyaken a meylimwang no Mapasaray a Ciriciring.

¹⁴ So ko kakdayan jimo a to meynakem nya ikarilaw. Taosya kasalit mo a marilaw nya. Am no si ji mo amya am cyaha, to ko macipanadngi imo.

¹⁵ Ala nakenakem na ni Ama ta do to o mina kakaro na jimo so alikey ni Onaysemo. Am cyaha, ta ji na rana ngaro imo a mangay no makwa.

¹⁶ Iya rana sicyakwaya am beken a lamlamsoy an. Ta iya rana am akma tey kakteh do cinai. O akman rana sang a vazay jyaken am manoyong ori an. Kakwakwan ko a imanngo rana do akman jimo. Ta inyo rana am lamlamsoy na rana inyo ni Yeso a akmey meyketeh do cinai.

¹⁷ Am ori an, no si anoyngan mo yaken a kagagan mo am akmey kataotao ko rana iya a taotawwen mo do vahay mo.

¹⁸ No si myan so karatan na jimo a kano ji na pa nipaoli jimo a nizpi am to mo mimina padketen o ngaran ko. Ta torwan ko.

¹⁹ So to ko na padkeci sya do teygami ya. Cyaha, ta yaken o tomoro jya. O ko ipanci a paolin mo jyaken am tana ji ko mancyan jimo am to mo na tenngi do onowned mo.

²⁰ Am ori o karilawan mo nyaken, mo Veydimeng, do ta kararalay ni Yeso Kizisto. So sidongan mo jyaken a pasarain so onowned.

²¹ Ko anoyngan imo a omamizing jyaken. Ori o ko vatvatkan do teygami ya. Ko katenngan o karo no vazay mo do pahanhanan jimo.

²² Ipeykala mo pa yaken so asa ka vahay a isanan ko dang. Inaoy si amizngen na o inozi nyo ni Ama ta do to. So ipacitovong ko jinyo do dang.

Imanowji na aryarilaw na sira

²³ Na ipeyminaminasi inyo no kararay ko a si Ipava do pamemtengan a yada aptengen do yanamen kahap so vazay na ni Yeso Kizisto.

²⁴ Si Make a kani Aditako a kani Temase a kani Locya a kararay ko a mahap so vazay na ni Ama ta do to am sira mamimin a yameyminaminasi ninyo.

²⁵ Inaoy si itoro na ni Yeso Kizisto a Panirsirngen ta o pangangarilawan na jinyo.