Sipolay 9 - Seysyo No Tao

Panaralayan do teyngato a kado teyrahem

¹ O manmanma a pangozayan a ciring na ni Ama ta do to am domket dang o katwatontonan no raralayan da ni Ama ta do to a kano nipatnek da no tao a vahay a raralayan da nya.

² So nitnek na rana no akmey sarwap a ananaten da vahay a panaralayan. O manma aspangan do sahad na am ipanci da Meynakem a vahay, yanan no peyzeyzampwan a kano akakanan a kano nipatanang da ji Ama ta do to a pang.

³ O peyyawwan no manma aspangan a kano katangked na vahay am milakayob o nipeyhawa da sya. O peyyawwan da sya no milakayob am Ney manokdwan na vahay.

⁴ Amyan dang so asleban da so mahangno a haneng. O panlenleban am ovay o akma ney kolit. O amyan pa dang am meykavahayan so ovay a kavangan. O makonokon do dang am tagaw a ovay a yanan no mana kano nitomyok a sisikod ni Yalon a kano vato a adketan no nanao na ni Ama ta do to a nitaid na ji Moyse.

⁵ O teyngato no kavangan am amyan dang so akmey tinsi a nyamaog no ovay a ngaranan da keloping. O peypeypangayan no nang am peydednan ni Ama ta do to. O panid no keloping ori am mavezay a ombonbon do pangapangayan da so rala no kagling a kano baka a ivonas so raraten no tao. O makakaday rana vazay am ji to mimin a ipanci sicyaikwaya.

⁶ O katwatontonan no makakaday a vazay am mangday sira so araw o mapatanatanang so nakem a mangay do sahad no manma aspangan na vahay a mapatanang so nakem da ji Ama ta do to.

⁷ Am o Panirsirngen no mapatanatanang so nakem am no somdep do katangked na vahay am abo ikararwa na. Ipisa do kasa kawan a somdep. No somdep am mangap so rala no kagling a kano baka a patanangen na a ivonas na so monganay jya raraten na kano ji da ningongyod a raraten da no macikeylyan a tao.

⁸ O katwatontonan no raralayan ni Ama ta do to am Seyzi o mapananao nya. Ta no jyabalinas o akman so sang a adan a raralayan ni Ama ta do to am masalit o kato ngonongonongan jya no tao so kangay do tangain ni Ama ta do to.

⁹ O peypeypangayan no yanimalavat ta makakaday a vazay ori am ipakateneng ta do kaji na makanetan no patanangen da kagling a kano baka ji Ama ta do to a ivonas so raraten no tao.

¹⁰ Ta do ji na pa nimapatwawi ni Ama ta do to so apyapya pa kano adan a pangozayan a ciring am mamimin pa ori a omagaz do icicirawat a kano isovo a kanen.

¹¹ Am yarana nimakaranes si Kizisto a ney manhama na yamapanop jyaten ji Ama ta do to a yamai no vayo a pangozayan a ciring na ni Ama ta do to. So na ikapyapya pa kano adan a pangozayan a ciring. So yana rana iyan do teyngato ni Yeso. Ta apyapya ori a kano nyamaog no tao do teyrahem a panaralayan.

¹² Si Yeso Kizisto am ji rana mapalolo so rala no kagling a kano baka. Ta mina to na rana patananga o rala na ipatazadang na jyaten do teyngato. Am o akman rana sang a vazay am ipisa mapatanang nyaten a kakavos na rana a mangay do kaidan no karawan.

¹³ No si saboin o tao no nikataheman no nitemtem a avo no baka ranom a kapasaboy da jira so rala no kagling a kano baka do ipanci da akmey makanyaw do iwawalam da am todavoga rana sira.

¹⁴ Kakwakwan na rana no rala no kagling a kano baka a ipanci da makavoga so nikaratan da. Imanngo rana o oyowyat no rala ni Kizisto. Ta nioyatan no Seyzi a mapatanang so abo so karatan a kataotao na ji Ama ta do to. Jyabo kaji na haraharan pa makavonas so marahet do onowned ta a ombalinas so malas a icicirawat ta. No si manoyong o kakman ta sang am manoyong ta pahanhanen na ni Ama ta do to do vazay na.

¹⁵ So ikanoyong ni Kizisto a yatomalamozong no vayo a pangozayan a ciring na ni Ama ta do to a somidong so nipamnekan na tao a omahap so nakem na jira. So na ikanoyong ni Kizisto a niomagag sira do raraten da a ji ngonot do manmanma pangozayan a ciring a nitaid na ji Moyse ni Ama ta do to.

¹⁶ O nitaid no toda jyawakwak a tao a ciring na am pangozayan da ori a ciring na no mawakwak rana.

¹⁷ Ta no mavyay pa tao a kataid na so ciring na am abo peypeypangayan no ciring na. Ta no si mawakwak rana o tomaid so ciring na am pangozayan da na o ciring a nitaid na jira.

¹⁸ Akman sang o ney manma na pangozayan a ciring na ni Ama ta do to no kakwa. Ta no abo o rala amvoyog a patanangen ji Ama ta do to am abo oyowyat no adan a pangozayan a ciring na ni Ama ta do to.

¹⁹ O ney manma na am ipeylimwang ni Moyse o iwawalam ni Ama ta do to do aro a tao a kapangap na rana so rala no baka kano kagling pazavozen do ranom, kapangap na rana so akmey vangkoro a milakayob a pinabedbed do akmey kamanakaoy a kasaboy na so aro a tao a kano vakong a adketan no nanao ni Ama ta do to.

²⁰ Maniring am, “O rala rana ya am yongkad na ni Ama ta do to a manci ninyo a omahap so pangozayan a ciring na.”

²¹ Akman sang si Moyse a mapasaboy so rala do akmey sarwap a panaralayan da kano makakaday amyan do sahad na a ipanaralay da.

²² To da mangozai o iwawalam da somaboy no rala so makakaday a ipanaralay da. No abo rala am jyavonas o raraten.

O inawan ni Kizisto omvonas do raraten

²³ Kakwakwan no panaralayan do teyrahem a yaominara sya do teyngato a yamangap so rala no kagling a kano baka a ipanvoga so tao. Ney manngo rana o panaralayan do teyngato. Jyabo kaji nakdekdengan pa no rala ni Yeso Kizisto do teyngato a ipanvoga na so tao ni Ama ta do to a.

²⁴ Jya nisomdep si Yeso do nyamaog no tao a akmey sarwap a panaralayan. Ta o nyamaog no tao am ji meyngongyod ori. Si Kizisto rana am yarana myan do teyngato a mapasyasi nyaten do tangain ni Ama ta do to.

²⁵ O panirsirngen no mapatanatanang so nakem no tao do Yotay am mangday so awawan o kapatanang da so rala no kagling a kano baka do Ney manokdwan na vahay. Am si Kizisto rana am ipisa mapatanang so kataotao na a ivonas na so raraten no tao.

²⁶ O na icyakman sang ni Yeso a yarana ji vangovangon so iwawalam no tao do Yotay a mapatanang so rala am na rana nipatanang o kataotao na abo so raraten a ivoga na so raraten no tao. So na ikeypisa ni Yeso a mangay mawakwak nyaten a kato na rana meyyonongan a mavonas rana no raraten ta.

²⁷ Mamimin o tao a ipisa mawakwak. Am no mawakwak o tao am pacicin na ni Ama ta do to.

²⁸ Yakman sang si Kizisto a ipisa mapatanang so kataotao na a ivonas na so raraten no aro a tao. So ikeypisa na pa mai do teyrahem. Am beken a raraten o vazay na. Ta mangay na hapen sira o mapanala sya tao.