Sipolay 8 - Seysyo No Tao

¹ O yamakdeng a yata malavat am yamyan so ney manhama na mapatanatanang nyaten so nakem ta si Ama ta do to. Iya rana am si Yeso a yamhezsad do wanan na ni Ama ta do to do teyngato.

² Iya rana am yamyan do yamanoyong a raralayan ni Ama ta do to do teyngato a mapasyasi nyaten ji Ama ta do to. Am o yana yanan am beken a nyamaog no tao, ta nyamaog ni Ama ta do to.

³ O vazay da no panipanirsirngen no mapatanatanang so nakem ji Ama ta do to no kakwa am patanangen da o nakem da a sarayan da ni Ama ta do to, a kapatanang da so rala no kagling a kano baka a ivonas da so raraten da. So icyakman na sang ni Yeso a mapatanang ji Ama ta do to.

⁴ No yamyan pa si Yeso do teyrahem am ji na peyvazaya o kapatanatanang na so nakem no tao ji Ama ta do to, ta amyan rana so mapeyvazay sya a mangozay do iwawalam no tao do Yotay.

⁵ O vazay na no mapatanatanang so nakem no tao ji Ama ta do to do teyrahem am akmey avwavong no meyngongyod a vazay do teyngato. Ta ninara da o vazay do panaralayan do teyngato. O ipakateneng ta do akman sang am yamyan do Seysyo o nipanci na ni Ama ta do to ji Moyse no kapangamaog na so raralayan da ni Ama ta do to. Maniring jya si Ama ta do to am, “Naknakmen mo an. Ta to mo peynara o panaralayan a nipacita ko jimo do tokon so kamamaogan a paringen.”

⁶ Am o vazay na ni Yeso a mapatanatanang so nakem ta ji Ama ta do to am maharahara pa kano vazay da no mapatanatanang so nakem no tao do teyrahem. Ta si Yeso rana am nipanop na yaten no vayo a pangozayan a ciring na ni Ama ta do to. O vayo a pangozayan a ciring na ni Ama ta do to am omaing do mina ciring na ni Ama ta do to so omanoyong jya tao. So ikapyapya na pa no nang a kano adan a pangozayan a ciring.

⁷ No abo karatan no manmanma a pangozayan a ciring am tana abo o ikadwa no pangozayan a ciring am makanet rana.

⁸ Am ioya na ni Ama ta do to o Isedi a tao. Maniring am, “Yarana makeykai o araraw no patnekan ko no Isedi a tao a kano Yoda tao so vayo a pangozayan a ciring.

⁹ O vayo a pangozayan da ciring am ji meyyangay a kano adan a nipangozayan da a ciring no ineynapo da no kakwa. Ta no kanang am nikalay ko o lima da a nyagag do Ayci. Am da ji mangononongi o nitoro ko jira a pangozayan da a ciring. Am ori o nipancyan ko no, ‘Ji ko na peyvazaya sira.’

¹⁰ Maniring pa jira si Ama ta do to am, ‘Ipatnek ko sira o Isedi a tao so pangozayan da a ciring no makwa. Peydednahen ko o iwawalam ko do oo da kapangay ko sya do onowned da. Abneken da yaken a Tao do to da. Abneken ko sira akma koy anak.

¹¹ Abo jira o manci nya do icyatatao da kano akma dey kakteh do cinai so kapanaralay da makateneng jyaken. Ta sira rana am tana kanakan a tana rarakeh am yatodamimin sira yamakateneng jyaken.

¹² Vonasen ko o raraten da. Ji ko na naknakma o karatan da.’ ”

¹³ Yarana nimangamaog si Ama ta do to so vayo a pangozayan a ciring a nyalit na do adan a pangozayan a ciring. So to na rana tastasi no adan a pangozayan a ciring, ta abo rana o oyowyat na.