Sipolay 7 - Seysyo No Tao

Meyngaran so Mocisete a mapatanatanang so nakem ji Ama ta do to

¹ O meyngaran so Mocisete am panirsirngen da no Saleng. Iya ori am panirsirngen da no mapatanatanang nira so nakem da ji Ama ta do to. Teyka na sira balinasen ni Apolahan o apat a ka panirsirngen am meysinaoli rana. Meyratateng am rapongen na no meyngaran so Mocisete a kapanlanlag na nya.

² O ineynahap ni Apolahan a apzapzatan no kapeyyarap da am pasinahen na o asa vovonongan a itoro ji Mocisete. O peypeypangayan no ngaran ni Mocisete am “Ji mapeycyakaban so tao a panirsirngen”. Ikongo do panirsirngen da no Saleng, am ori o pancyan da no ngaran na a “Ikapiya no onowned no tao a panirsirngen”.

³ Si Mocisete rana am abo do vakong o domket a ngaran no ama na kano ina na. So icyakman da sang no iteytetngehan da. So ji da nimapadkeci so araraw no cinatazak na kano cinawakwak na. So icyakma dey meyyangay a kano Anak ni Ama ta do to a mapatanatanang so nakem a mangay do kaidan no karawan.

⁴ Naknakmen nyo pala. Jyabo na kajyahamahaman pa ni Mocisete do kanimapasina na no ineynapo ta si Apolahan so ineynahap na so asa vovonongan ji Mocisete.

⁵ O apwapo da ni Diwey a mapatanatanang so nakem da si Ama ta do to am tana meyyangangay sira kano Isedi a tao a sivosivovoong ni Apolahan am to da mangozai o iwawalam a komakaday so Isedi a tao pangapan so asa vovonongan a kanen da a illam da sira.

⁶ Am tana ji macitetngehan si Mocisete ji Diwey am macivonong do ineynahap ni Apolahan so asa vovonongan a kapanlanlag na ni Mocisete si Apolahan a omamoon so mina ciring na jya ni Ama ta do to.

⁷ O manlanlag no tao am makarakarang pa sira ori a kano ipanlanlag da tao. So ji na alasi no akman sang a ciring.

⁸ O mapatanatanang so nakem da si Ama ta do to am mangap sira do tao so asa vovonongan a illam da sira. Am mawakwak pa sira ang. Am si Mocisete am tana nimangap so asa vovonongan am akmey todavyay, do kaji da nimvatvatkan do Seysyo so araraw no cinatazak na kano cinawakwak na.

⁹ Am ori an, mapasina si Apolahan so asa vovonongan am akmey to macizanod si Diwey a manta ni Mocisete so asa vovonongan.

¹⁰ Am no kangay na amrapong si Apolahan ni Mocisete am ji pa nimalikey si Diwey. Am macitetngehan ji Apolahan.

¹¹ O iwawalam no Isedi a tao am nimakalapo no kakwa o kapangozay da do iwawalam ni Diwey a mapatanang so nakem da ji Ama ta do to. No makanet rana ori a ipakasalap ta do teyngato am ikongo tovoyan na pa ni Ama ta do to si Yeso Kizisto a mapatanatanang nyaten so nakem ta ji Ama ta do to akman si Mocisete, a iblis na so adan a iwawalam ni Yalon.

¹² Tovoin na ni Ama ta do to si Kizisto am mablis rana o iwawalam no mapatanatanang so nakem no kakwa.

^13-14 Ta si Yeso a Panirsirngen ta am yaji monganay do iteytetngehan ni Diwey. Ta macitetngehan da Yoda. Sira rana am abo pa jira o nimangay do mapatanang so nakem no tao ji Ama ta do to. Ta no kapakalavat ni Moyse so mapatanatanang so nakem si Ama ta do to am ji na nimalavat o itetngehan da Yoda.

Macitarek a mapatanatanang so nakem a akmey si Mocisete

^15-16 Yarana mapengkad sicyaikwaya o na kaniomablis rana ni Ama ta do to so iwawalam ni Moyse. Ta si Yeso rana o yavayo a mapatanatanang nyaten so nakem ta ji Ama ta do to yakman si Mocisete. Ta beken a na pangozayan o iwawalam no tao. Ta na pangozayan o na kato meyyonongan a mavyay a Tao do to.

¹⁷ Ta maniring do Seysyo am, “Imo rana am mapatanatanang ka so nakem no tao a mapasyasi nira jyaken a mangay do kaidan no karawan, akman si Mocisete.”

¹⁸ So na rana ikablis no adan a iwawalam ni Moyse, ta yabo oyowyat na mapatazadang jyaten do teyngato.

¹⁹ Am cyaha, ta yarana myan so yapyapya pa hanhan ta a mapanop jyaten ji Ama ta do do. Iya rana am si Yeso Kizisto.

²⁰ Amyan so apyapya pa nyahahapan na sya ni Ama ta do to. Ta no kapamnek na ji Yeso a mapatanatanang so nakem am amyan so makdeng a ciring na. Ta no kapamnek da no tao do sivosivovoong ni Diwey a mapatanatanang so nakem am abo o makdeng a ciring na jira ni Ama ta do to.

²¹ Am si Yeso am amyan so ciring na sya ni Ama ta do to. Maniring am, “Ji ko na ablisi o nakenakem ko a mamnek jimo a mapatanatanang so nakem no tao a mapasyasi nira jyaken a mangay do kaidan no karawan.”

²² So ikanoyong na ni Yeso Kizisto a yongkad ni Ama ta do to a mangononong do vayo a pangozayan a ciring na jyaten. So ikapyapya na pa no vayo a pangozayan a ciring na ni Ama ta do to a kano adan a ciring na a nitaid na ji Moyse.

²³ O asa pa ko ipanci am o nipanlanlag da mapatanatanang so nakem no tao no kakwa am aro sira mapalipalit. Ta no mawakwak sira am todakteb rana o vazay da.

²⁴ Am si Yeso rana am yato meyyonong a yamavyay. So yana ikabo no tao a makamoon so vazay na.

²⁵ Am ori o yana ikanoyong a yamakasidong so yaomanop ji Ama ta do to a tao, do yana kato meyyonongan a mavyay a yamapasyasi nyaten ji Ama ta do to.

²⁶ So yana ikanoyong ni Yeso a ney manokdwan na a ta ipeyhanhan a mapatanatanang nyaten so nakem ta ji Ama ta do to. Ta yabo na karatan a yabo so raraten. Iya rana am na nipapinpin ni Ama ta do to do yameyraraten a tao. So ikanoyong na rana ney mazway na do teyrahem a kado teyngato.

²⁷ Iya am yamacitarek a kano aro a panipanirsirngen no mapatanatanang so nakem, do yana kaji mangdayan so araraw a yamapatanang so nakem da a ivonas so raraten da no tao. Iya rana am ipisa mapatanang so nakem na kato na rana ngavosan. O na nipatanang am kataotao na.

²⁸ O nipamnekan no iwawalam ni Moyse a mapatanatanang so nakem am tao sira. So iyan no karatan da. Am o nipamnekan ni Ama ta do to a mapatanatanang so nakem am Anak na. So ikabo no karatan na. So to na meyyonongi a makasidong so tao no vazay na mangay do kaidan no karawan.