Sipolay 5 - Seysyo No Tao

¹ O nipamnekan da no tao do Yotay a panirsirngen no mapatanatanang so nakem da si Ama ta do to am mapasyasi nira ji Ama ta do to, a mapatanang nira so makakaday a sarayan da ni Ama ta do to, kapatanang na so rala no kagling a kano baka a ivonas na so raraten da.

² Amyan so karatan na no mapatanatanang so nakem da tao, ta meyyangay sira tao. Am ori o kanigan na no amyan so kalasan a tao a mapasyasi nira ji Ama ta do to.

³ Ori o pazanodan na so kataotao na ipasyasi ji Ama ta do to a ivonas na so raraten da.

⁴ Abo o tao a mapasolib so kataotao na do panirsirngen no mapatanatanang so nakem da si Ama ta do to. Ta o nitenngan ni Ama ta do to o mangay do dang, akman so tao a meyngaran so Yalon.

⁵ Yakman sang si Kizisto a yaji nimamnek do kataotao na a panirsirngen no mapatanatanang so nakem ta si Ama ta do to, ta nakenakem na ni Ama ta do to a nimamnek jya. Ta maniring si Ama ta do to jya am, “Imo am Anak ko imo an. So peylimwangan ko nimo a mapeyyama jyaken sicyaraw eya.”

⁶ Maniring pa am, “Imo rana am akman ka si Mocisete a mapatanatanang so nakem no tao a mapasyasi nira jyaken a mangay do kaidan no karawan.”

⁷ No keyyan na pa ni Yeso do karawan am nimlolos a mapasyasi ji Ama ta do to a mapatastas sya do kawakwakan na. So niiteng no kaoo na mapasyasi ji Ama ta do to. Ikongo do nipehbo na o kataotao na, am ori o nyamizngan na sya ni Ama ta do to so ciring na.

⁸ Tana Anak na ni Ama ta do to am nimasazi na o alalaw a ipeypahagnat na so nakem na a omonot ji Ama ta do to.

⁹ Komavos o vazay na ni Yeso am tombod rana jya o to meyyonong a ikavyay no pahad da no yaomonot jya tao,

¹⁰ a kapamnek na ji Yeso ni Ama ta do to a ney manhama na a mapatanatanang nyaten so nakem ta ji Ama ta do to a mangay do kaidan no karawan, akman si Mocisete.

Ipaziman so ji manganoyong a tao

¹¹ O akman rana sang a vazay am yaro pa dang o ciring ko a yamakekdeng am nyo kaji makazazaban a tao.

¹² No kamo mowyat a yamacinanao am kamo na mangnanao. Am asyosyo kamo eya a yada pananawen no tao no yatodalapit a ciring na ni Ama ta do to. So nyo icyakmey metdeh a yapa somoso.

¹³ O somoso a tao am ji pa makaveyvow. So ji na makatenngi do apya kano marahet.

¹⁴ O asa ka ciring dang am o makaveyvow o koman so cinvevekeh, ta mapeyneynara da rana. Akman so sang o makaveyvow a tao a makateneng do apya kano marahet.