Sipolay 4 - Seysyo No Tao

¹ Am ori o naknakman nyo so kato nyo ngotokotan so nakem a omanoyong ji Ama ta do to. Ta no si ji kamo manganoyong am ji kamo macikaop ji Ama ta do to.

² Tamo akman so ineynapo ta ang a yarana nimakamizing so Mapasaray a Ciriciring na ni Ama ta do to. Am da ji meypapyan o da nimamizing a nanao na ni Ama ta do to. Ta da ji nganoyngi.

³ Yaten rana yamanganoyong a tao am manoyong o kapacikaop ta na ji Ama ta do to. Ta maniring si Ama ta do to am, “To ko na mancyan o kapeyoyaoya ko a kaji da makaransan do ipanci ko a pamahamahan da.” Tana nimeycicinda no kakwa o keyyan no pamahamahan da no kakavos no karawan a nyamaog na ni Ama ta do to am ji da tokod o pamahamahan ang, ta ji da nganoyngi.

⁴ Amyan do Seysyo so asa ka vakong a yanan no makalavat so ikapito na araw. O domket dang am, “Nimeyvazay si Ama ta do to do kanem a araw a kapamahamaha na do ikapito na araw.”

⁵ Maniring pa am, “To sira angay do kaidan no karawan o ji ko payaknengi sira.”

⁶ Sira rana nimanmanma makamizing so Mapasaray a Ciriciring na ni Ama ta do to am ji da nimatokod o pamahamahan da. Ta ji da nyamizing si Ama ta do to. Am o tao rana a omanoyong ji Ama ta do to am macikaop sira ji Ama ta do to.

⁷ Na rana vahangsowen do jya o na kapamnek ni Ama ta do to so kasaraw a yaipanci a “sicyaraw eya.” Mownay am toywen na ni Tawey o ciring ni Ama ta do to. So na idket rana do Seysyo. Maniring am, “No si mamizing nyo sicyaraw eya o ciring na ni Ama ta do to am ji nyo a oyyan.”

⁸ No si manoyong si Jyesoya a nimangay no aro a tao a mamahamaha do nipanci ni Ama ta do to a pamahamahan da am jyabo o kapakalavat na pa so kasaraw a ipakahap ta so nakem na jyaten ni Ama ta do to a.

⁹ So na ikanoyong ni Ama ta do to a yanimangata so kasaraw a yana itaziman do yamonganay jya tao.

¹⁰ Ta o tao rana a macikaop ji Ama ta do to am mahap da rana o keylamnayan da kano ikapiya no onowned da, do kapeyhanhan da ni Ama ta do to a macikaop rana jira.

¹¹ Am ori o ikowyowyat ta pa a omonot do ciriciring na ni Ama ta do to. Ta ori o ipacikaop ta ji Ama ta do to. Sino ka paro a ominara so ji nganoyong do ciriciring na ni Ama ta do to a tao a yatey marahet so vazay.

¹² O Ciriciring na ni Ama ta do to am tey rako o oyowyat na. So ikowyowyat na pa kano matarem a takzes a to makatjip so asisi a kano totowang. So ikakman na sang so kowyowyat no Ciriciring na ni Ama ta do to a makateneng do onowned a nakenakem no tao.

¹³ Abo o makatayo do tangain ni Ama ta do to. O yamakakaday do karawan a nyamaog na am yabo na jyacita so vazay. So ikamimin ta katenngan na so onowned do tangain ni Ama ta do to.

Ney manhama na si Yeso a mapatanatanang so nakem ta

¹⁴ Am ori o pangozayan ta do nakem ta yamraralay ni Ama ta do to. Ta yata ipeyhanhan si Yeso a ney manhama na mapatanatanang nyaten so nakem ta ji Ama ta do to. Iya rana am Anak ni Ama ta do to a yarana myan do tangain ni Ama ta do to.

¹⁵ Si Yeso Kizisto am panoyngen na yaten a tao do karawan a ji makanet so nakenakem. Ta iya rana am nimasapa na o makakaday a ilita na jya ni Satan. Am jya nikalittan. Iya am abo o raraten na.

¹⁶ Am ori an, ji tamo a mogawi a omasngen do tangain ni Ama ta do to a omahap so itoro na jyaten a pangangasyan na kano pangangarilawan na a isidong ta so kataotao ta no makasazi ta so alalaw ta.