Sipolay 13 - Seysyo No Tao

Makongo so wanjin a mapasaray si Ama ta do to.

¹ Mangday kamo do araraw a masicyakarilaw a akman so meyketeketeh do cinai.

² Taotawwen nyo sira o tao do teyhesa ka ili do vahay nyo. Ta nimyan so tao a nimanaotao so tao do teyhesa ka ili am ji na tentenngi ka tinsi na no nitaotao na.

³ Manakem nyo sira o yamyan do pamemtengan a tao. Ta akma kamoy to macizanod jira aptengen da. Manakem nyo sira o peyrarehten da a tao. Ta akma kamoy to macizanod jira a peyrarehten da.

⁴ Naknakmen nyo o kakdeng no meysinmo a tao. Masipanadnadnad kamo so nakem a marwarog do vahay. Ta o mapasagpyan so aktokto a tao am pasingsingtan na ni Ama ta do to.

⁵ Ji nyo pahama o kakzan nyo no nizpi. Isaray nyo no onowned o amyan rana jinyo. Ta maniring si Ama ta do to am, “To meyyonong o kaji ko ngarwan jimo. So ji ko mapaveyvowi jimo a manta nimo so kalahen mo no nakem.”

⁶ Am ori o ji ta rana nyahey a manci no, “Ko jyavokahaw. Ta na sidongen yaken ni Ama ta do to. Kongwen da yaken no tao.”

⁷ Inarahen nyo sira o nimapalololo jinyo no kakwa a nimeylimwang no ciriciring na ni Ama ta do to. Ta no kapeyigegen da pa kangay na do nikawakwak da rana am yamamimin o vazay da omagaz do da kapeyhanhan ni Yeso. So inaran nyo so kakdekdeng da meyhanhan ni Yeso.

⁸ Ta si Yeso Kizisto rana am tana no kakyab a tana sicyaraw eya a tana todangay no makwa am yajyablis.

⁹ Taosya o kapeycyakawad na jinyo no makakaday a malas a nanao da no tao. Ta kapangozay nyo do pangangarilawan ni Ama ta do to a mapahadpet so onowned nyo. Ji nyo meyhanhanan o pamarmarngan da so kanen. Ta ji na sidong inyo a makahap so to meyyonong a ikavyay no pahad nyo.

¹⁰ Sira rana yamyan do akmey sarwap a panaralayan a yamapatanatanang no tao do Yotay so nakem da am abo kasngesngenan da jyaten a macizanod do mina vazay na jyaten ni Yeso Kizisto.

¹¹ O panirsirngen rana no mapatanatanang so nakem da no tao do Yotay am isdep na o rala no kagling a kano baka do Ney manokdwan na vahay a kapatanang na rana sya a ivonas na so raraten no tao. Am o kataotao da no kagling a kano baka am yangay da do siri no ili a katemtem da sya.

¹² Akman sang si Yeso a niwakwak da do siri no ili. O peypeypangayan no kaniomvoyog no rala ni Yeso am ivonas na so raraten no tao.

¹³ Am ori o karwan ta na do adan a raralayan da ni Ama ta do to no tao do Yotay a kapacizanod ta ji Yeso Kizisto do alalaw na.

¹⁴ Ta abo do karawan eya o to meyyonong a peyvahayan ta. Am ori o ta kalan so to meyyonong a angayan ta no makwa.

¹⁵ Am ori o ipangday ta so araraw a somaray ni Ama ta do to a nitomovoy si Yeso a nimangay mawakwak nyaten. O itoro ta ji Ama ta do to am apya anwanood ta a idmadmay ta sya.

¹⁶ Ji nyo hamangi o kapanidong nyo so tao. Ta o akman rana so sang a vazay am akmey nakem ta patanangen ji Ama ta do to a isaray na.

¹⁷ Onotan nyo o makayokod ninyo a tao do kyokay. Amizngen nyo o ciring da. Ta sira rana am da peyveyveknen o pahad nyo, do da kahap so vazay ni Ama ta do to. No si amizngen nyo sira am masasaray sira mahap so vazay ni Ama ta do to. Am no si ji nyo ngamiznga sira am meyngen o onowned da. No si akman sang am jyabo kapya nyo a.

¹⁸ Ji nyo amtadan yamen a ipeynozi. Ta namen anoyngan o kapya no vazay namen do tangain no tao a kani Ama ta do to.

¹⁹ Ko kakzeben inyo a meynozi nyaken. Inaoy si makeykai na yaken ni Ama ta do to a tovoin a mangay jinyo do dang.

Inozi

²⁰ Si Ama ta do to rana a yamanta nyaten so ikapiya no onowned ta am nipeyvangon na si Yeso a Panirsirngen ta do heseb na. Na rana nipangononongan ni Ama ta do to no rala ni Yeso o to meyyonong a pangozayan a ciring na. So na ikanoyong a tomalamozong nyaten aro a tao.

²¹ Inaoy si itoro na jinyo ni Ama ta do to o makakaday a ileylamnay no nakem nyo a kowyat na jinyo a mahap so isaray na vazay. So ikanoyong nyo a mahap so nakenakem ni Ama ta do to, do nyo kararalay ni Yeso Kizisto. Inaoy si mangay o azwazway ji Kizisto mangay do kaidan no karawan. Amin.

Ney manowji rana ciring

²² Manga kakteh, ko inyo vavagan am pakamyamizngen nyo o ciring ko an. So na jyanaroi no ciring ko do teygami.

²³ Ko kakzeben inyo a makateneng do na kanimakowbot rana no kakteh ta a si Timotay do pamemtengan. No si makeykai rana mai am macihza jyaken a mangay tomita jinyo.

²⁴ Ipeyminaminasi nyo pa sira o yamyokod ninyo do kyokay a tao a kapeyminaminasi nyo pa no aro a sinjya. Da ipeyminaminasi inyo no kakteh ta yapo do Itadi.

²⁵ Inaoy si itoro na jinyo o pangangarilawan na ni Ama ta do to.