Sipolay 11 - Seysyo No Tao

Manoyong o kapeyhanhan ni Ama ta do to

¹ O ipanganoyong rana ya am ipeyhanhan o vazay a ipeynanakem. O peypeypangayan no nang am anoyngan o kanoyong na myan no ji pa nimacita.

² O sarayan na no tao no kakwa ni Ama ta do to am nipeyhanhan da si Ama ta do to.

³ O ta ipakateneng do kaniomamamaog na ni Ama ta do to so karawan no ciring na am tana tamo jya nimacita am tamo na to nganoyngi o akman sang. So ikanoyong no yamacita eya nyamaog na ni Ama ta do to no ciring na.

⁴ O nikapyapya na no nipatanang ni Yapo a kani Kayin ji Ama ta do to am nipeyhanhan na ni Yapo si Ama ta do to. Ori o nisarayan na nya ni Ama ta do to. Ori o nyabnekan na sya abo so raraten do tangain na, do kanoyong na meyhanhan ni Ama ta do to. Tana yana rana mownay si Yapo a nimawakwak am nitaid na jyaten o kakdeng ta a meyhanhan ni Ama ta do to.

⁵ Si Inok rana am jya nimawakwak, ta mina to meytopos a nyahap na ni Ama ta do to, do kapeyhanhan na nya. So ji da rana nimakakalai sya no tao. Maniring do Seysyo am, “No kaji na pa ngapan sya ni Ama ta do to am nimanmanma o kasaray na nya ni Ama ta do to.”

⁶ No abo panganoyngan no tao am ji na narayan ni Ama ta do to. O mai do tangain ni Ama ta do to a tao am anoyngan da o keyyan ni Ama ta do to a macikaop jira a marilaw no komakzeb sya tao.

⁷ Si Noya rana am tana ji na pa nimacita o vazay am nyamizing na o nipaziman na sya ni Ama ta do to, do kapeyhanhan na ni Ama ta do to. Ori o nipamaring na so rako a avang. Ori o nikapya da asa ka vahay do henep, do katey rako no raraten no tao do karawan. So nikanoyong ni Noya a nibnek na ni Ama ta do to abo so raraten do tangain na, ta nipeyhanhan na si Ama ta do to.

⁸ Si Apolahan rana am nionotan na si Ama ta do to do kapeyhanhan na nya. Am ori o nikarwan na do keymiminili da a mangay do tovoyan na sya ni Ama ta do to a pongso a itoro na jya ni Ama ta do to. Am no kakaro na do keymiminili da am ji na tenngi o angayan na.

⁹ Tana meyvahay do matarek a ili si Apolahan am nipeyhanhan na si Ama ta do to. So nipangilili na a meyvahay do akmey sarwap. Akman sang si Isa kani Yakebo. Ta meyyangangay sira a omapanala so mina ciring na sira ni Ama ta do to.

¹⁰ Ta anoyngan na ni Apolahan o meypanam pa amaogen ni Ama ta do to a tey meymatek a ili do teyngato.

¹¹ Tana rarakeh si Salay rana abo so kanen sospa am nimeytaodtod, do kapeyhanhan na ni Ama ta do to a mangononong do mina ciring na sya.

¹² Tana rarakeh rana si Apolahan am akma raney mata no hanit a kano anay do pasalan o karwaro da no sivosivovoong na no makwa.

¹³ Sira rana ori am to da noiban do karawan o kapeyhanhan da ni Ama ta do to. Tana abo nimahap da do nipanci na ni Ama ta do to am da ji macimangsahi o da kapananala so akman sang a nakem na sira ni Ama ta do to. Da anoyngan o da kakmey mangilili a tao a yato ngiseysan do karawan.

¹⁴ O mapeyciring so sang a tao am manoyong sira meykala no kataotao da so vahay da do teyngato.

¹⁵ So ji da rana naknakmi so nikarwan da ili. Ta no ikapaw da am apya pa o kapeysinaoli da.

¹⁶ O ikakza da am apyapya pa vahay do teyngato. Am ori o ji na macimanigi nira ni Ama ta do to no kapanci da nya Ama da do to. Ta amyan rana so hapan na sira ili.

¹⁷ No keyleylamdam na si Apolahan ni Ama ta do to a tomoro no anak na a meyngaran so Isa a wakwaken a patanangen ji Ama ta do to am ji na nikamama, do kapeyhanhan na nya. Ta ipeyhanhan na si Ama ta do to a manta nya so aro a sivosivovoong na.

¹⁸ O mina ciring na jya ni Ama ta do to am, “O apwapo mo am mapo ji Isa.”

¹⁹ Nipeyhanhan na ni Apolahan si Ama ta do to a mapaoli sya avyain si Isa. Am ori o ta pancyan ni Apolahan a nimahap si Isa do apwa kawakwakan na.

²⁰ Si Isa rana am nipanlanlag na si Yakebo a kani Isaw, do kapeyhanhan na ni Ama ta do to a manta nira so ileylamnay da no nakem no makwa.

²¹ No katod na rana jyawakwakan ni Yakebo am nipanlanlag na o rarwa ka anak ni Yoseyvo. So to na meysikoji a omraralay ni Ama ta do to, do kapeyhanhan na ni Ama ta do to.

²² Ikongo do ipeyhanhan na ni Yoseyvo si Ama ta do to, am toda jyawakwak am malavat na sira o kakaro da do Ayci no Isedi a tao a kapanci na rana nya jira so ahahapan da so totowang na a ibobo do peyyalislisan da ili.

²³ Matazak si Moyse am macita da no inyapwan na o kapiya no kamahamahakay na. Karahan am mina katlo a vehan a nipowzib da. So ji da nimanyahei no ciring no panirsirngen, do kapeyhanhan da ni Ama ta do to.

²⁴ Makaveyvow si Moyse am nitaosya na o kapanci da nya taodtod no anak ni Valaw a panirsirngen, do kapeyhanhan na ni Ama ta do to.

²⁵ Apyapyahen na pa o kapacitetngehan na no inawan na do italamozong na ni Ama ta do to a Isedi a tao a peyrarehten da, do kaji nakzan no kahap na so ji meyyonownay a sarasaray do vahay ni Valaw.

²⁶ Apyapyahen na pa o kapeyrarahet na mahap so vazay no Misayya. So nilikodan na do aro a peymeymasaodan da no tao do Ayci a pamoonen da jya. Ta anoyngan na o kapyapya na pa no peymeymasaodan ni Ama ta do to a itoro na jya.

²⁷ Ji na nyaheyan o kapeyoyaoya na ni Valaw. So nikaro na do Ayci. Ta akma ney todacita no mata si Ama ta do to a yamacitovong jya. Am ori o ji na rana kei a meysinaoli, do kapeyhanhan na ni Ama ta do to.

²⁸ Ikongo do ipeyhanhan na si Ama ta do to ni Moyse, am ori o nipapwan na so Iyeci a kano omrarala so pazezevngen da a katodaliklikan so vahay da no Isedi a tao no tinsi a omwakwak so kabnekan da no tao do Ayci.

²⁹ Akmey to mangonong sira do kacyan o Isedi a tao do rako a awa a ngaranan da so Mabazangbang awa, do kapeyhanhan da ni Ama ta do to. Am mangonong sira o tao do Ayci am nimamimin sira nipeytalama na no awa.

³⁰ Nilivolivon da no Isedi a tao o ili a meyngaran so Yedike so kapito araw a kazdazday na rana no ahad no ili da, do kapeyhanhan da ni Ama ta do to.

³¹ Ikongo do ipeyhanhan na si Ama ta do to no manakaw a mavakes a meyngaran si Laha, am ori o ji na nimacikazosoji jira kano aro a ji ngonot ji Ama ta do to a tao a mawakwak. Ta nitaotao na o nitovoy no Isedi a tao a omileylamdam so tao do Yedike.

³² Yaro pa dang o ciring ko am ko na ji mancyan si Cityan a kani Pala kani Sansong a kani Yevota kani Tawey a kani Samoar a kano aro a panoyonoywan na so ciring ni Ama ta do to a tao.

³³ Ikongo do nipeyhanhan da si Ama ta do to, am ori o nipakahap da so mina ciring na jira a somidong sira. So nibalinasan da so tao do livolivon no ili da. So nikapiya na rana no nyahahapan da sya. So icyakma dey nisomengseng do ngongoy no kokoman so tao, do kapeyhanhan da ni Ama ta do to a somidong sira.

³⁴ So nihespan da do rako a lila no apoy. Nipakasaoy da do ipangan no tao a amwakwak sira. Kakwakwan da abo so oyowyat am nioyatan na sira ni Ama ta do to. So nikowyat da amharag so omarap sira tao do livolivon no ili da.

³⁵ O tatasa a mavavakes am mina to mirwa a mavyay o nimawakwak a makaop do asa ka vahay da, do kapeyhanhan da ni Ama ta do to. O tatasa ka tao am apyapyahen da pa o kaneb da jira kapakakasi da sira wakwaken, do kahap da so kapanganoyong da a meyhanhan ni Ama ta do to. Ta katenngan da o kapirwa da mavyay no makwa.

³⁶ Tatasa jira to myapya so kapeyzeyzozomyak da jira a bakbakan. So iyan no nivaod da kano nyaneban da.

³⁷ Amyan so tao a nibhebhesan da nimawakwak. Amyan so nigetget da nipeyketeb so kataotao. Amyan so nizakat da no ipangan. Amyan so meyyayob so kolit no kagling a vovwan da limanen a paksozen. So to da liliwi so kakcinan da kano peyrarehtan da sira pakakasin.

³⁸ So ikapyapya na rana no kaji da macivahayan jira no apya so nakenakem a tao, do kateywara no pacioyyan da do manaralay a tao. So ikanoyong da akmey minaminasbang a to meyyowyaw do peycyeylilyan na kado kahasan. So to da rana pavyavingi so kataotao da do azcizcip.

³⁹ Sira rana ori am admain na sira ni Ama ta do to o makdeng so nakem a tao. Am abo nimahap da mina ciring na sira ni Ama ta do to no kavyay da pa.

⁴⁰ Ta amyan so nipamnekan na ni Ama ta do to a apyapya pa a itoro na jyaten. Ori rana am pehzahen na sira jyaten a makahap so to meyyonong a ikavyay no pahad da do teyngato a yazaw na sira.