Sipolay 1 - Seysyo No Tao

Toywen na ni Ama ta do to o ciriciring na do Anak na

¹ No kakwa pa am masangib si Ama ta do to a somapasapa so pazyazimanan na so ciriciring na do ineynapo ta. O ciriciring na rana am patwawen da no panoyonoywan na so ciring ni Ama ta do to.

² Am sicyaikwaya am o Anak na ni Ama ta do to o nimapatwaw so ciriciring na jyaten. Si Yeso o nimangamamaog so karawan no ciring na ni Ama ta do to. So nitorwan na ni Ama ta do to no makakaday do karawan eya a italamozong ni Yeso.

³ Yatomwaw jya o azwazway ni Ama ta do to. Iya rana am akma ney kataotao ni Ama ta do to. Na kalopkopen no oyowyat no ciring na o makakaday do karawan. Nikawakwak na o raraten no tao a kangay na rana do teyngato amlisna do wanan ni Ama ta do to a meypanirsirngen.

Makarakarang pa si Yeso Kizisto a kano tinsi

⁴ Makarakarang pa o Anak ni Ama ta do to a kano tinsi. Yakman sang o ngaran na a na nitoro ni Ama ta do to do Anak na yamaharahara pa kano tinsi.

⁵ Abo asa ka tinsi a nipancyan na nya ni Ama ta do to so, “Imo am Anak ko imo an. So peylimwangan ko nimo a mapeyyama jyaken sicyaraw eya.” Akman sang ta abo asa ka tinsi a pakacirngen na so, “Ama na yaken. Iya am Anak ko.”

⁶ Am tovoin na o veyvowen na Anak ni Ama ta do to do karawan am maniring si Ama ta do to am, “Mamimin sira o tinsi a amraralay nya.”

⁷ O mina ciring ni Ama ta do to a omagaz do tinsi am pahanhanen na sira akman so pagpag a kano apoy so kamamagenan.

⁸ Am pagazen na ni Ama ta do to o ciring na do Anak na am, “Oyowyat mo a Tao do to a tomalamozong no tao do karawan am todangay do kaidan no karawan. Ta yaka ji mapeycyakaban so tao.

⁹ O yapya vazay o mo ikakza. Mo ikaoya o malas a vazay. Am ori an, na ika yaken a Tao do to mo no yanimamnek jimo a yanimanta nimo so azwazway mo a kano sarasaray mo. So da ikabo no kararay mo a makahap jimo.”

¹⁰ Maniring pa am, “Mo Panirsirngen, imo niomamaog so karawan. Nyamaog mo o hanit no lima mo.

¹¹ Amyan so kasaraw a ikabalinas da. Am imo am to ka meyyonong. So ikanoyong da akmey ayob a mararalaw.

¹² Akman so ayob o karawan a topin a kapalit mo rana so vayo. Am imo am ka jyablis a abo so pangavosan.”

¹³ Ji na pa nipanci ni Ama ta do to do tinsi o, “Amlisna ka do wanan ko, mangay no si balinasen ko sira o macioya jimo a tao.”

¹⁴ Ikongo o tinsi. Sira rana am na kalamsoyan sira ni Ama ta do to a somidong so yarana makahap so to meyyonong a ikavyay no pahad da tao.