Nimlivolivon 9 - Seysyo No Tao

No kanoyong na ni Sawlo ji Yeso

¹ No kanang rana am ji namtadan ni Sawlo o kalalaw na so omraralay ni Yeso a tao a zakaten. Am ori o nyangay na do rako a panirsirngen no mapatanatanang so nakem da si Ama ta do to,

² ta kakzeben na o kapeyteygami na no tomalamozong no aro a peyneynozyan da no tao do Yotay do Tamaseke a ili a manci no kapya da sya omrakep so amraralay ni Yeso a tao, tana mahakay a tana mavakes am miminen na sira yangay do pamemtengan do Yelosaleng.

³ Masngen rana do Tamaseke am to ngyan so zezak apo do teyngato a tomiray sya.

⁴ Am ori o nikavazakwang na do teyrahem a kapakamizing na so macisirsiring jya. Maniring am, “Sawlo, Sawlo, ikongo mo pakakasyan jyaken.”

⁵ Maniring am, “Mo Panirsirngen, sino ka.” Maniring am, “Yaken rana am si Yeso ko a yamo pakakasin.

⁶ Peyvangon rana mangay do ili, ta yamyan so asa ka tao a manci nya jimo so vazay ko jimo.”

⁷ O kararay ni Sawlo am tey maonib sira, ji rana makapeyzezyak, ta amyan so mamizing da am ji da cita.

⁸ Meyvangon si Sawlo am peyvezezngen na o mata na am ji makacita. Ori o nyalakan da sya no kararay na yangay do Tamaseke.

⁹ So nipakatlo na araw a jya nimakacita, jya nimangakaday.

¹⁰ Amyan do Tamaseke so asa ka omraralay ni Yeso a tao a meyngaran si Ananiya. Nimapacita jya si Yeso. Maniring am, “Ananiya.” Maniring am, “Ikongo o mo kakzeben jyaken, mo Panirsirngen.”

¹¹ Maniring si Yeso am, “Mangay ka do ngaranan da so Matazineng a rarahan. Ta myan do vahay ni Yota o asa ka tao do Tasose a meyngaran si Sawlo a yameynozi dang.

¹² Nipaziman ko na jya o katovoy ko jimo a mangay a somidong sya a mapaopta so lima mo a kapakacita na rana.”

¹³ Maniring si Ananiya am, “Mo Panirsirngen, ko nimamizing rana do aro a tao o marahet a vazay na do keyyan da no aro a nipakakasi na a omraralay nimo do Yelosaleng.

¹⁴ Iya rana am nipya da no panipanirsirngen no mapatanatanang so nakem da si Ama ta do to a mangay a omrakep so omraralay nimo a tao.”

¹⁵ Maniring jya si Yeso am, “Mangay ka, ta ko nipamnekan si Sawlo a mahap so vazay ko a meylimwang no ngaran ko do beken a tao do Yotay a kano aro a panipanirsirngen, pacyangayan nyo a Isedi a tao.

¹⁶ Ta pazimanen ko jya o karo no alalaw na do ipeyvazay na jyaken.”

¹⁷ Am ori o nyangay na rana ni Ananiya. Somdep rana do vahay am paoptahen na o lima na do kataotao na ni Sawlo. Maniring am, “Mo kakteh, o mo nimacita do rarahan a Panirsirngen ta si Yeso am na nitovoy yaken a mai a tomazogaw nimo. Ta kakzeben na imo a makacita rana a italamozong no Seyzi.”

¹⁸ Mamizing na ni Sawlo o ciring na am mina todakas do mata na o akmey isis no among. So nipakacita na rana. Am ori o nipeyvangon na rana kataktak da jya.

¹⁹ So nipangakaday na rana a kowyat na rana no kataotao na. Kadadayan na so araraw am amyan pa si Sawlo do Tamaseke a macihza jira do omraralay ni Yeso,

Mangnanao si Sawlo do Tamaseke

²⁰ a kangay na do aro a peyneynozyan a meylimwang ni Yeso a manoyong a Anak na ni Ama ta do to.

²¹ Mamizing da no aro a tao am isavasavak da. Ori o nipancyan da nya do kadwan jira so, “Beken a oya asyo o nimapakakasi so omraralay ni Yeso a tao do Yelosaleng? O na nyai do jya am ala na littan sira a yavaoden a yangay na do panipanirsirngen no mapatanatanang so nakem da si Ama ta do to do Yelosaleng.”

²² So ikatey mateneng na ni Sawlo a mangnanao a jyamogaw a macinekanekad jira a manci ni Yeso a Misayya. Am ori o ji da makatenngi jya pasapan no aro a tao do Yotay do Tamaseke.

²³ Kadadayan na do araraw am ipeysirsiring da o kazakat da si Sawlo no tao do Yotay.

²⁴ So ipangday da do maraw a kado mahep omavat ji Sawlo a zakaten no makowbot do ili. Am keyyan no tao a nimanci nya ji Sawlo.

²⁵ Am ori o nitontonan da sya no sinjya do mahep do rako a yala do likod no makarang a atoy no ili da kakaro na rana dang.

Meysinaoli si Sawlo do Yelosaleng

²⁶ Makaranes si Sawlo do Yelosaleng am naknakmen na o kapacikaop na do omraralay ni Yeso a tao. Am nikanyahey da, ta ji da anoyngi o kanoyong na rana omanoyong ji Yeso.

²⁷ Am kanisomidong na sya ni Parnapo a mangay tomita so nipamnekan ni Yeso a omlivolivon no ciriciring na a kapanci na nya jira so mina kapakacita na ni Sawlo si Yeso do rarahan a nisomirisiring sya a kapanci na pa nya jira so kaji na mogawan ni Sawlo a meylimwang ni Yeso do Tamaseke.

²⁸ Am ori o nikabwangan da rana ji Sawlo no nipamnekan ni Yeso a omlivolivon no ciriciring na. So ji na nimamogawi a meylimwang ni Yeso do Yelosaleng.

²⁹ No kanang am nimacisirsiring a kapacinekanekad na do tao do Yotay a meyzezyak so ciring da no tao do Sila. Am naknakmen da o kazakat da si Sawlo.

³⁰ Katenngan da no akma ney kakteh do cinai o akman sang a vazay am yangay da do Kaysadiya katovoy da sya mangay rana do meyngongyod a ili da do Tasose.

³¹ No kanang rana am abo rana o ikalaw da no omraralay ni Yeso a tao do Yotay a kado Cyadidi a kado Samadiya. So nikakdeng da rana so nakem ji Yeso. Ta arako o nisidongan na sira no Seyzi. Am ori o nikaro no tao a omanoyong ji Yeso. So nikapiya no icicirawat da rana omahap so vazay na ni Ama ta do to.

Mapeyzokab a vazay ni Pite do Dita kado Yepey

³² Si Pite rana am nilivolivon na o peycyeylilyan na angayan na tomazogaw no omraralay ni Yeso a tao. Makaranes do Dita am,

³³ macita na dang o asa ka tao a meyngaran si Aynayya. Iya rana am nimakasapa tao, mina kawao (8) a kawan a jya nimeyvavangon.

³⁴ Maniring jya si Pite am, “Mo Aynayya, peyvangon rana kahap so ireyrayan mo. Ta na rana nipeypapya imo ni Yeso Kizisto.” So nikapya na rana.

³⁵ Macita da ori no aro a tao a meyvahay do Dita kado Salon am anoyngan da rana si Yeso.

³⁶ Do Yepey rana ili da am amyan so asa ka mavakes a omraralay ni Yeso a meyngaran si Tapitay. O ngaran na do ciring no Sila am si Tocya. Peypeypangayan na am ibosbosan. Aro apiya vazay na, ta sidongen na sira o abo so nizpi a tao.

³⁷ Amyan si Pite do Dita am meyngen a kawakwak na rana ni Tapitay. Am ori o niryosan da sya kapangay da sya do kavava no vahay na.

³⁸ Manovoy sira so rarwa ka tao a mangay ji Pite, ta mamizing da si Pite amyan do Dita. Maniring sira am, “Makeykai ka mangay do ili namen.”

³⁹ So nipacihza da rana ji Pite a mangay do Dita. Makaranes sira am yangay da do kavava no vahay na ni Tapitay. So nikamimin da no vao a mavakes amlimot sya amlavi a mapacita no nitapang na ni Tapitay a ayob da no kapeyigegen na pa do karawan.

⁴⁰ Karahan am powboten na sira ni Pite a kapeylilitod na meynozi a somazap so kataotao na ni Tapitay. Maniring am, “Mo Tapitay, peyvangon rana.” Meyratateng am meyvezezeng o mata na a makacita si Pite kapeyvangon na rana amlisna.

⁴¹ Am ori o nyalakan na so lima na ni Pite a patanken a kapanci na no aro a vao a mavakes a kano karwan da omraralay ni Yeso a somdep rana. So nipakacittan da rana si Tapitay a nimirwa a mavyay.

⁴² O akman rana sang a vazay am nimamizing da rana no tao do Yepey. Ori o nipeyparo da rana no tao a omanoyong ji Yeso do Yepey.

⁴³ Si Pite rana am todavezed do dang a macivahay ji Simong. O vazay ni Simong am mapakapkapya so nihab da kolit no baka.