Nimlivolivon 7 - Seysyo No Tao

Ipacisirsiring na o kataotao na ni Setiven

¹ Pacicin no rako a panirsirngen da no mapatanatanang so nakem da si Ama ta do to si Setiven. Maniring sira am, “Manngwa, yamanoyong o na keyyan no akman sang a vazay mo an?”

² Pasapan na ni Setiven am, “Manga maran, manga kakteh, amizngen nyo yaken an. No kakwa pa am nimapacita o mazway a si Ama ta do to ji Apolahan no keyyan na pa do Meysopotamiya a meypanam pa a meyvahay do Alan a ili.

³ Maniring jya am, ‘Karwan mo o ili nyo a kano apapnan mo a mangay do tovoyan ko jimo an.’

⁴ Am ori o nikarwan na jya ni Apolahan do Cyaloti a pongso a kangay na meyvahay do Alan. Mawakwak si ama na am ori o nyangay na rana do meyngongyod a tovoyan na sya ni Ama ta do to, do ili ta ya.

⁵ No kanang am abo pa nitoro na jya ni Ama ta do to a iheyhakaw na. Am nipanci na pa jya ni Ama ta do to no kakwa am itoro na jya o ili ta ya a lisanan da no apwapo na. Am no kanang am abo pa o anak na ni Apolahan.

⁶ Maniring pa jya si Ama ta do to am, ‘O sivosivovoong mo am meyvahay sira do teysa ka mahataw an, a kapeylamlamsoy da sira dang a peyrarehten so sikapat a poo (400) so awawan.

⁷ Am pasingsingtan ko sira o mapeylamlamsoy sira a tao do teysa ka mahataw a kakaro da rana do dang a meysinaoli do jya kararalay da nyaken.’

⁸ Meyratateng am ipanci na ni Ama ta do to ji Apolahan o keyyan na no yongkad na jira do ananak na mahakay, do kaji da makahamangan do nipanci na jira ni Ama ta do to. Am matazak a tao si Isa am niyongkadan na o kataotao na do ikawao na pa araw. Akman sang vazay ni Isa do anak na si Yakebo. Akman sahang o vazay na ni Yakebo do rarwa so ikakarwan a ananak na mahakay a ineynapo ta tao do Yotay no kakwa.”

⁹ Maniring pa si Setiven am, “Asa do anak ni Yakebo a meyngaran so Yoseyvo am nikeynanahet da no kakakteh na. Am ori o nipanazangan da nya do tao do Ayci. Am mina kapzat na jya ni Ama ta do to,

¹⁰ do meycyamadadayan a kanginanawan na. Nipanta na ni Ama ta do to so teneteneng na. Am ori o nikakza na nya no rako a panirsirngen da do Ayci a meyngaran so Valaw. Am ori o nipamnekan na nya tomonton jya meypanirsirngen do Ayci a tomalamozong no kangangay na kano kanekanen na.

¹¹ “Mownay am meykabcil do Ayci a kado Cyanan a pongso. Am ori o nikaro no alalaw da no ineynapo ta, ta abo rana o kanekanen da do Cyanan.

¹² Mamizing na ni Yakebo o kabsoy da no Ayci am tovoin na sira o anak na a ineynapo ta mangay do Ayci. Ori am ikeypisa da pa ori a yanimangay.

¹³ Ipidwa so kangay da am ipanci na ni Yoseyvo o kataotao na da kakakteh na. Ori o nipakatenngan na rana ni Valaw do kakakteh na ni Yoseyvo.

¹⁴ So nipanovoy na so tao ni Yoseyvo a manci ni ama na kano aro a zipozipos da mai do Ayci. O nimai a apapnan na am lalima o ikasikawao da (75).

¹⁵ Am ori o nyai da rana do Ayci a meyvahay a kato da wakwakan do dang ni Yakebo a kano ananak na a ineynapo ta.

¹⁶ Mownay am anaten da o totowang da yangay do Secyan a ili do ninginangina na ni Apolahan a heseb no kakwa pa do ananak na ni Hamo.

¹⁷ “Toda jyarateng o mina ciring na ni Ama ta do to ji Apolahan am nisomaod sira o ineynapo ta do dang.

¹⁸ No kanang rana am amyan so nimacipalit a vayo a panirsirngen no tao do Ayci. Am ji na pa nimamizing si Yoseyvo no kakwa pa.

¹⁹ Am ori o nikarahet na no niyokodan na no ineynapo ta a peyrarehten. Ipanci na o kapipowa da no anak da kawakwak da.

²⁰ No kanang rana am nimatazak a tao si Moyse. Apiya o kamahamahakay na. Ikatlo na vehan am nitayo da do vahay da a peyveyveknen.

²¹ Marateng rana o araraw no nipasazokaw da sya am macita na no mavakes a anak na ni Valaw. Am ori o nyahapan na sya azwazovwen a kabnek na sya anak na.

²² So ninanawan da sya no iwawalam da do Ayci. So ikateneng na mapehtaw so ciring a mateneng do ahahapan na so vazay na.

²³ “Sikapat a ngarnan (40) o kakawakawan ni Moyse am naknakmen na o kangay na tomita so keylyan na Isedi a tao.

²⁴ Makaranes am to na cita o asa ka keylyan da ji dasnesnekan no tao do Ayci. Am ori o nyangay na mabong no keylyan na, kazakat na so tao do Ayci.

²⁵ O nakenakem na ni Moyse am, ‘Ala katenngan da yaken no keylyan namen a nipamnekan na ni Ama ta do to a makasidong sira do peyrarehten da sira no tao do Ayci.’ Am ji da tenngi ori no keylyan da.

²⁶ Ikadwa na araw am macita na o rarwa ka keylyan da meyliman. Am ori o nipeyyawwan na sira. Maniring jira am, ‘Manga kahakay, inyo rana am kamo meykeylyan. Ikongo nyo ipeyliman.’

²⁷ Am o mapeymetdeh so kararay na am nimapadondon si Moyse. Maniring jya am, ‘Sino nimanci nimo a yamyokod nyamen.

²⁸ Mo zakaten yaken a akman so nizakat mo no kakyab a asa ka tao do Ayci?’

²⁹ Mamizing na ni Moyse am malalayo a komaro rana do Ayci a mangay meyvahay rana do Miteyang a ili, kapeytaodtod na dang so rarwa ka mahakay.

³⁰ “Mahatas rana o sikapat a ngarnan (40) awawan am mangay si Moyse do kabwan no nihakawan no tao a meyngaran so Sinay a tokon. So nipakacita na dang so asa ka tinsi amyan do amlila tazici.

³¹ Macita na ori ni Moyse am mina to ogto a kapeypasngen na tomita sya. Karahan am to na amizing o ciring na ni Ama ta do to a manci no,

³² ‘Yaken rana am Tao do to da yaken no ineynapo nyo si Apolahan a kani Isa kani Yakebo.’ So nizikzik na ni Moyse a maonib nya. Ori ji na nitomitai sya.

³³ Maniring pa jya si Ama ta do to am, ‘Pakaro o tokap mo, ta o mo peytatankan eya am yako yanan.

³⁴ Ko nimacita rana sira o ko yaponged a tao a yamyan do Ayci. Ko nimamizing o da ipasyasi jyaken, do na katey yaro no alalaw da. Am ori o ko ipeygegcin a mapasaway sira do da peyrarehtan sira no tao do Ayci. Ko tovoin imo sicyaikwaya a yamangay omagag sira do Ayci.’

³⁵ “Si Moyse rana am ji dakzan no keylyan na a somidong sira. Maniring sira am, ‘Sino nimamnek jimo a yatomalamozong nyamen.’ Am iya rana am nipamnekan ni Ama ta do to a amyokod nira a komaro do Ayci, do kanisomidong na sya no tinsi a nimacisirsiring jya do amlila tazici ang.

³⁶ Si Moyse o nitomirara so ineynapo ta a komaro do Ayci. So nikaro no mapeyzokab a vazay na, no kaji da pa ngarwan do Ayci a kano kapangonong da do meyngaran so Mabazangbang awa kano keyyan da pa do kabwan no nihakawan no tao so sikapat a ngarnan (40) so awawan.

³⁷ Si Moyse o nimanci nya do Isedi a tao so, ‘No makwa am amyan pa do sivosivovoong nyo so panoyonoywan na so ciring ni Ama ta do to a tovoin na jinyo akman jyaken a nitovoy na jinyo a Isedi.’

³⁸ Si Moyse o nipacisirsirngan no tinsi do tokon a meyngaran so Sinay, no keyyan da pa no ineynapo ta do kabwan no nihakawan no tao. Iya o torwan na no nivatvatkan a to meyyonong a Ciriciring ni Ama ta do to a nitaid na jyaten.

³⁹ “Am ji da nyamizing si Moyse no ineynapo ta, ta manakem da o kapeysinaoli da pa do Ayci.

⁴⁰ Amyan pa si Moyse do tokon am nimangay sira do kakteh na a meyngaran so Yalon a manci no, ‘Ipamaring mo pa yamen so iraralay namen an, a kapangonong na nyaten do rarahan. Ta namen jyatenngi rana o vazay ni Moyse a niomagag jyaten do Ayci.’

⁴¹ So nipamaring da so likta baka a iraralay da a papazosan da, kapamaring da so kanen a somaray no nipariparing da a iraralay da.

⁴² Am ori o nikarwan na jira ni Ama ta do to, ta ioya na sira a omraralay no mata no hanit akman so nivatvatkan da no panoyonoywan na so ciring ni Ama ta do to a manci no, ‘Inyo rana Isedi a tao am nimanzakat kamo so vinyay a ipazos nyo do iraralay nyo no keyyan nyo pa do kabwan no nihakawan no tao so sikapat a ngarnan (40) so awawan. Am beken a yaken o nitorwan nyo nya.

⁴³ Nipalolo nyo o vahay no iraralay nyo a meyngaran so Molo a kano akmey mata no hanit a meyngaran so Layvan. Niparing nyo sira ori a iraralay nyo. Am ori o angayan ko ninyo do Papilon a ili.’ ”

⁴⁴ Maniring pa si Setiven am, “No kanang na am amyan so vilad a niparing da a panaralayan da no ineynapo ta. Ori rana am inarahen da o niyokodan na ni Moyse ni Ama ta do to, ipakateneng da do kaji na ngarwan jira ni Ama ta do to.

⁴⁵ Macipalit rana si Jyesoya ji Moyse am palolwen da rana o nipariparing da panaralayan da a yangay do ili ta ya. Nibalinas da sira o beken a tao do Yotay, ta nisidong na sira ni Ama ta do to. Am ori o nipakaranes da rana jya. O nipariparing da panaralayan am mangay do araraw no ipeypanirsirngen ni Tawey.

⁴⁶ Nikaglaw na si Tawey ni Ama ta do to. Am ori o nipancyan na nya ni Tawey ji Ama ta do to so kapamaring na so apiya raralayan da nya. Iya rana am niraralay na no kakwa ni Yakebo.

⁴⁷ Am ji na mya ni Ama ta do to. Ta o anak na ni Tawey a meyngaran so Solomen am ori o nimakaparing sya.

⁴⁸ “Am si Ama ta do to rana am ji meyvahay do nipariparing da no tao a vahay. Ta akman so nivatvatkan no panoyonoywan na so ciring na no kakwa. Maniring am,

⁴⁹ ‘O teyngato rana am lisnan ko. O teyrahem rana am pazasagan ko so ai ko. Akman so wanjin paringen nyo a peyvahayan ko a kano peywalaman ko.

⁵⁰ Yaken saon o nimangamaog so karawan eya am.’ ”

⁵¹ Maniring pa si Setiven am, “Inyo rana ji mangap so ciring a tao am kamo meyyangay a kano ji manaralay a tao a ji ngahap so ciriciring ni Ama ta do to. Ta nyo to nginara sira o ineynapo nyo a ji ngahap so Seyzi.

⁵² Amyan so asa ka panoyonoywan na so ciring ni Ama ta do to a ji da nipakakasi no ineynapo nyo an? Yabo. Niwakwak da sira o meylimwang no omanam a mai a Misayya. Iya rana am tey yapya o nakenakem na a omahap so vazay ni Ama ta do to a nipacinginangina nyo a niwakwak nyo.

⁵³ Inyo o nitorwan da nya no tinsi so iwawalam ni Ama ta do to am nyo ji peyvazaya.”

No kawakwak da si Setiven

⁵⁴ Mamizing da no panipanirsirngen no tao do Yotay o ciring na ni Setiven am meyoyaoya sira a mangisem.

⁵⁵ Am nioyatan no Seyzi si Setiven. Tangarahen na o hanit am macita na o azwazway ni Ama ta do to a kani Yeso a meytatanek do wanan na ni Ama ta do to.

⁵⁶ Maniring si Setiven am, “Ko macita o teyngato a yameywang. O Nipamnekan ni Ama ta do to a tao am yameytatanek do wanan na.”

⁵⁷ Amlololos sira somengseng do cicilwan da kakarakararwa da ji Setiven a rakpen,

⁵⁸ kalolo da sya a yangay do asked no ili da kabhebhes da jya, kazakat na rana. O nitorwan da so nizpi a tao a mangamaog so karatan na ni Setiven am nitoro da o talili da do asa ka malavayo a tao a meyngaran si Sawlo a citahen na a kapacyangay da a ombhebhes jya.

⁵⁹ Abhebhesan da si Setiven am meynozi. Maniring am, “Mo Yeso, Panirsirngen ko, ahapen mo o pahad ko an,”

⁶⁰ a kapeylilitod na amlolos. Maniring am, “Mo Panirsirngen, ji mo naknakma o raraten da jyaken an.” Teyka na ipanci am mawakwak rana.