Nimlivolivon 28 - Seysyo No Tao

No keyyan da Pawlo do Maarta pongso

¹ Makarala namen rana do pamsan na am katenngan namen rana o kapongpongso na a ngaranan da so Maarta.

² No kanang rana am macimoy a karekmeh na. Am apya sira dang o meyili a tao. Ta nitaotao da yamen a kapeydokdok da nyamen so apoy a panangdangan namen.

³ Pangain na ni Pawlo o nikpeh na kayo do panangdangan namen am makowbot o mavowaw, ta nikakwatan a kalavicin na do lima na a somongit sya.

⁴ Macita da no meyili dang a tao am maniring sira am, “Yajya nimangap so tao ya. Tana yaji nimawakwak ya do karakwan no awa am oya rana na masapa a alalaw na, do na kapeyraraten.”

⁵ Karahan am toktoken na rana ni Pawlo o mavowaw do apoy am abo o nipeyzazan na.

⁶ To da pananala no aro a tao o kalipad no lima na, kawakwak na am abo imeymonan da sya. Am ori o nipeyzokaban da nya. Maniring rana sira am, “Ala tao do to ya?”

⁷ Amyan dang so tao a macisngen so nihakawan a meyngaran si Popaydi a panirsirngen da. Macita na yamen am yangay na yamen do vahay da a taotawwen so katlo araw.

⁸ No kanang am nimeyngen o velek na ni ama na ni Popaydi a kapeyingwat na pa sya. Mangay jya si Pawlo am paoptahen na o lima na do kataotao na a meynozi nya. Ori o nikapya na rana.

⁹ Mamizing da o vazay ni Pawlo no tao do dang am meykayyai o meykeyngeyngen a tao. So ikamimin da apya rana a nipeynozi ni Pawlo.

¹⁰ Nimacipinda no kanang o kanig da nyamen no tao. Karwan namen rana sira am aro o apzapzatan a nitoro da jyamen a paciralayan namen a mangay do asa ka avang.

Makaranes sira Pawlo do Loma

¹¹ Mavitos rana o katlo a vehan am mavang namen do asa ka avang apo do Yadisanta a nimanbong dang do karahet no kakawan do ahemyan. O avang rana ori am ngaranan da so Adwa ka tao do to.

¹² Makaranes rana o avang do Silako a ili am nimeywalam namen dang so katlo araw.

¹³ Karwan namen dang am mangay namen rana do Leciang. Ikadwa na araw am somazawsaw. Am ori o nipavyotan na jyamen so kasaraw a kapakaranes namen rana do Potidi a ili.

¹⁴ Makarahan am makasazi namen do dang so akma nameney kakteh do cinai. Nipeyseysan da yamen so kapito araw a kalam namen mangay rana do Loma.

¹⁵ Mamizing da yamen no amyan do Loma akma nameney kakteh do cinai am mangay da tazapyahen yamen do rako a panazangan a ngaranan da a Yapio. O karwan da am nimangay sira do ngaranan da so Meykatlo a iseysanan a ili a tomazapya jyamen. Macita na sira ni Pawlo am isaray na ji Ama ta do to. Ta nikaitan o onowned na.

¹⁶ Makaranes namen do Loma am apyahen da si Pawlo a kano amzat jya itaysang a meyvahay do asa ka vahay.

Mangononong si Pawlo do Loma

¹⁷ Ikatlo na araw am lovoten na sira ni Pawlo o panipanirsirngen da no tao do Yotay. Maniring jira si Pawlo am, “Manga kahakay, yaken rana am tana ko jya niraherahet o keylyan ta a yajya nimapasobna do iwawalam no ineynapo ta am da todey amtenga yaken do Yelosaleng a da kangay nyaken do panirsirngen no Loma a pacicin.

¹⁸ No kapacici da jyaken am ji da kala o karatan ko a izakat da jyaken. Ori o naknakman da so kapasaway da jyaken.

¹⁹ Am raten da no keylyan ta tao do Yotay. Am ori o to ko na manci nya so kangay ko do tangain ni Kaysa. Am yabwata o yasa ka ciring a ko iraherahet so keylyan ta tao do Yotay.

²⁰ Am ori o ko kakzeban jinyo a yapacisirsirngan. Ta o da nivaodan jyaken am yaomagaz do ko kanoyong ji Yeso Kizisto a yarana mownay a da pananalahen no Isedi a tao.”

²¹ Maniring sira ji Pawlo am, “O akman rana sang a vazay mo am yabo namen nimahap a teygami apo do ili nyo a omagaz jimo. Yabwata do keylyan nyo o asa ka tao a nimapo do dang a yamraherahet jimo.

²² Am pancyan pala jyamen, ta namen katenngan inyo a yamraralay ni Yeso a da pacioyyan no aro a tao do peycyeylilyan na.”

²³ Meyratateng am mamnek sira so kasaraw a ipeylovolovot da so tao a omamizing so ciring ni Pawlo. Marateng rana o araraw na am aro sira o tao a nimai a omamizing so ciring ni Pawlo. Meyratateng am papwen na ni Pawlo do penzak a kangay na nya do mahep a omononong do italamozong na ni Ama ta do to a mapanod sira. Meyratateng am vilangan na o iwawalam na ni Moyse a kano vakong da no panoyonoywan na ciring ni Ama ta do to no kakwa a mapanop sira a omanoyong ji Yeso.

²⁴ O nipanci na ciriciring am amyan so tao a niomanoyong jya. Amyan so ji nganoyong jya.

²⁵ So ipeytaretarek no nakenakem da. Am ori o to da na meysyasyai. No kaji da pa meysyasyayan am maniring si Pawlo jira am, “Manoyong o nipanci no Seyzi do ineynapo ta a nivatvatkan ni Isayya a panoyonoywan na so ciring ni Ama ta do to.

²⁶ Maniring si Isayya am, ‘Mey mo ipanci do aro a tao an. Manoyong o kamizing nyo sya am ji nyo a tenngi. Macita nyo am ji nyo a pengkad.

²⁷ Ta tey masalit o onowned da no tao eya. O cicilwan da am yakacilcilan. O mata da am yameyreket. Ta no sira macipayok so onowned am makacita o mata da. Makamizing o cicilwan da. Makazazap da no onowned a kapeysinaoli da rana jyaken. Ta ori o ipatazadang ko sira do teyngato.’ ”

²⁸ Maniring pa si Pawlo am, “Inyo rana am anoyngan nyo si Ama ta do to a yarana mapatazadang so beken a tao do Yotay no ciriciring na, do da kapeyhanhan nya.”

²⁹ [Teyka na o ciring ni Pawlo am to sira na meycyangangay o tao do Yotay. So nikapanes da a somkad do kadwan jira.]

³⁰ Mina kadwa kawan si Pawlo a nimeyvahay do nivood na vahay a kasaray na a tomaotao so mey manangangay nya tao,

³¹ a kapangnanao na no italamozong na ni Ama ta do to a kano omagaz ji Yeso Kizisto a Panirsirngen ta. So ikabo no ikamogaw na. So ikabo rana no itaysang a omza sya a meylimwang no ciriciring na ni Ama ta do to.