Nimlivolivon 26 - Seysyo No Tao

¹ Maniring si Aglipa ji Pawlo am, “Ji ka nig a manci no ciring mo.” So nipaztaznekan na so lima na ni Pawlo a manci no ciring na.

² Maniring am, “Ko masaray a yameytatanek do tangain mo, mo Aglipa a panirsirngen, a yamanci no da raherahetan jyaken no tao do Yotay.

³ Ta mo katenngan o iwawalam da no tao do Yotay a kano da kazyakan nyaken. Am ori o amizngan mo so ciring ko.

⁴ “O iwawalam ko no kalyalikey ko, na kai sicya rarakeh ko na ya do ili namen a kado Yelosaleng am yada mamimin a katenngan no tao do Yotay.

⁵ No si manakem da o mina vazay ko no kakwa am anoyngan da rana yaken a tey makdeng so nakem a tao a macyagom do Vadisay a ji mapasala do iwawalam namen a tao do Yotay.

⁶ Sicyaraw rana ya am ko myan do tangain nyo a nyo pacicin, ta ko anoyngan o kanoyong na no nipanci na ni Ama ta do to do ineynapo ta do keypirwa da mavyay no nimawakwak a tao.

⁷ Iya o yata pananalahen a sivosivovoong da no rarwa so ikakarwan a ineynapo ta, do ta kararalay ni Ama ta do to. Mo panirsirngen, ori o peypeypangayan no da rakpan jyaken no keylyan ta.

⁸ Am inyo rana a tao do Yotay am ikongo nyo ji nganoyngi ji Ama ta do to a mapeyvangon so nimawakwak rana tao.

⁹ “No kakwa pa am abo ji ko peyvazaya a izakat ko so tao a omamizing so nanao ni Yeso a tao do Nasale.

¹⁰ Ori o mina vazay ko no keyyan ko pa do Yelosaleng. Nipya da yaken no panipanirsirngen no mapatanatanang so nakem da si Ama ta do to a omrakep so omanoyong ji Yeso a tao. No kapanzakat da jira am to ko myapya.

¹¹ Masangib ko sira a pakakasin do peyneynozyan da a kapanci ko nira omalalas ji Yeso a iraralay da. So nikakdeng ko a macioya jira. Tomakatakaw kangay ko do teyhesa ka ili a mapakakasi sira.

¹² “Ipisa nipya da yaken no panipanirsirngen no mapatanatanang so nakem da si Ama ta do to a mangay do Tamaseke.

¹³ Amyan ko do rarahan do peyignan no araw am to ko makacita so maniray apo do teyngato a mazngazngang pa kano araw a komowap jyaken a kano kararay ko.

¹⁴ So nikamimin namen a nimavazakwang do teyrahem a nimakowap. Meyratateng am makamizing ko so ciring no Sipolay a tao. Maniring jyaken am, ‘Sawlo, Sawlo, ikongo yamo pakakasyan jyaken. Jyabo o kapakaharag mo jyaken a. Ta rakorako o oyowyat ko a ka nimo.’

¹⁵ Maniring ko jya am, ‘Mo Panirsirngen, sino ka.’ Maniring am, ‘Yaken rana am si Yeso ko a mo pakakasin.

¹⁶ Peyvangon rana a kapeylimwang mo nyaken a nimapacita jimo. Ta yaken rana am yako nipamnekan imo a mahap so vazay ko. So peylimwangan mo no meypanam pa vazay a itoro ko jimo.

¹⁷ Ko tovoin imo a meylimwang nyaken do tao do Yotay a kano beken a tao do Yotay. No si myan so omraherahet jimo am cyaha, ta apzatan ko imo.

¹⁸ Ko tovoin imo a omiwang do mata da kapakacita da rana so kazngangan a komaro do vazay ni Satan a omanoyong rana ji Ama ta do to. So ikanoyong da rana mavonas so raraten a macikaop do amraralay nyaken a tao,’ kwan na yaken ni Yeso.

¹⁹ “Am ori mo Aglipa a panirsirngen, o ko to mangozai do yana nipanci jyaken ni Yeso no kapakacita ko sya.

²⁰ Nimanma na do Tamaseke a kado Yelosaleng o nyangayan ko a kangay ko na do peycyeylilyan na do Yotay a kado peyilyan da no beken a tao do Yotay amvavaga jira a komaro do peyraratenan da a somazap si Ama ta do to a mapacita rana no apiya icicirawat da, do kanoyong da rana nimamlis.

²¹ Ikongo do nimangnanao ko do beken a tao do Yotay, am ori o nirakpan da jyaken no tao do Yotay do rako a panaralayan a vovwan a zakaten.

²² Yato ngai sicyaraw eya o na nisidongan jyaken ni Ama ta do to a meylimwang no ciriciring na do meynakem a tao a kano ipangoyongoyod da tao. O nipeylimwang ko am meyyangay a kano nipeylimwang ni Moyse a kano panoyonoywan na so ciring ni Ama ta do to no kakwa.

²³ Ta o nipeylimwang da da Moyse am manoyong keyyan no alalaw ni Kizisto a wakwaken da. So ika iya na no ney manma na a nimirwa a mavyay. Ta iya o mapatazadang jyaten a tao do Yotay a kano beken a tao do Yotay.”

²⁴ Ji na pa teyka ni Pawlo o ciring na am to na amizing si Veyseto a amlololos. Maniring am, “Ka zomyak eya an? Ta yateywara rana o mo naknakmen a vazay.”

²⁵ Maniring si Pawlo am, “Ko ikamo imo mo Veyseto panirsirngen am jyabo ko kazyak a. Yamanoyong saon o ciring ko ang.”

²⁶ Maniring si Pawlo ji Aglipa am, “Mo katenngan o akman sang a vazay. Am ori o ko jyamogawi a yamapatwaw sya jimo. Ta o akman rana sya a vazay am abo makatayo sya.

²⁷ Mo Aglipa a panirsirngen, mo anoyngan o ciring da no panoyonoywan na so ciring ni Ama ta do to no kakwa pa? Ko katenngan mo kanoyong jya.”

²⁸ Maniring si Aglipa ji Pawlo am, “Mo panopen yaken a yaomanoyong ji Kizisto?”

²⁹ Maniring si Pawlo ji Aglipa am, “Tana mahay rana am to ko meynozyan nimo a kano aro a mangamizing a tao do jya a kamimin nyo rana akman jyaken a omanoyong jya. Am ji nyo nginara yaken a da aptengen!”

³⁰ Mamizing na ni Aglipa kani Veyseto a kano meyngaran so Peynici a mavakes a kano aro a tao a mangamizing am mina to sira meytatanek a makowbot do pantaw.

³¹ Amyan rana sira do pantaw am maniring sira do kadwan jira am, “Ikongo peypeypangayan no kato tamtengan sya, kato ta wakwakan sya.”

³² Maniring si Aglipa ji Veyseto am, “No ji na nipanci no tao eya o kangay na ji Kaysa a panirsirngen no Loma am jyabo o kaji ta mapasawayan sya.”