Nimlivolivon 2 - Seysyo No Tao

No kapeyhekas no Seyzi

¹ Marateng rana o araw no Osinci am meylovolovot sira o amraralay ni Yeso do asa ka vahay.

² To da amizing o akmey rako a pagpag apo do teyngato. So mina to nagnozi no yanan da vahay.

³ So nipakacita da so akmey lila no apoy a makakaday jira mangay someyked do oo da.

⁴ Am ori o nioyatan na jira no Seyzi a kapanci da no meycyataretarek a ciriciring do kowyat na jira no Seyzi.

⁵ No kano nang am amyan so tao do Yotay apo do peycyamahamahatawan na kano meyvahay do Yelosaleng a makekdeng so nakenakem ji Ama ta do to.

⁶ Mamizing da o akmey rako a pagpag am mai sira meylovolovot o aro a tao. Ta yeyyak da sira o amraralay ni Yeso a tao a meyzezyak so ciriciring do peycyamahamahatawan na.

⁷ Ori o nipancyan da no, “Cita pala sira o yameyzezyak a tao ito, a yamamimin a tao do Cyadidi.

⁸ Ikongo da todamimini nira ito a yamakateneng do ciriciring ta.

⁹ Yamyan jyaten eya so tao do Patiya kano tao do Mitiya kano tao do Ilan a kano yapo do Meysopotamiya kado Yotay a kado Kapatocya kado Pento a kado Yasiya,

¹⁰ kado Vodicya kado Pangveydiya kado Ayci a kano yapo do Dipiya a masngen do Cidinay. Yamyan jyaten eya so apo do Loma a tao do Yotay a kano beken a tao do Yotay a omahap rana so iwawalam ta tao do Yotay.

¹¹ Amyan jyaten eya so yapo do Kedite a kado Alapo. Am ikongo da todamimini a yamakateneng do aro a ciriciring ta a yamanci no yamapeyzokab a vazay ni Ama ta do to!”

¹² So nikalakan da nira kapeyyahhahes da manci no, “Ikongo o akman sya vazay!”

¹³ Am amyan jira so maming nira manci no, “Yamasaki sira ori.”

No kapangnanao na ni Pite

¹⁴ No kanang na rana am meytatanek si Pite a kano asa so ikakarwan a kararay na. So nilolos na manci nya do aro a tao so, “Inyo rana manga zipos a tao do Yotay a kano yameyvahay do Yelosaleng eya tao am amizngen nyo o ciring ko an.

¹⁵ Nyo ipanci sira ori a yamasaki. Beken an, ta neykasyam pa ya no toki an.

¹⁶ Yamanoyong ya nipanci no panoyonoywan na so ciring ni Ama ta do to no kakwa a meyngaran si Yoel. Maniring am,

¹⁷ ‘O ciring na ni Ama ta do to am: No marateng rana o araraw ko no makwa am tovoin ko o Seyzi a macikaop do aro a tao. O anak nyo a mahakay a kano mavakes am mangay o kapanoyonoyo da so ciriciring ko. So iyan no malavayo a mahakay a makacita so mapangyangyalak a ipacita ko jira do akma dey tateynep. So iyan no rarakeh a mahakay a meytateynep so mapeyzokab a ipatateynep ko sira.

¹⁸ Sira rana mahap so vazay ko am tana mavakes a tana mahakay am tovoin ko jira o Seyzi a omoyat jira. So peylimwangan da no ciriciring ko.

¹⁹ So iyan no ipacita ko a mapangyangyalak do hanit a kado teyrahem. Ori rana am apoy a kano rala kano rako a aob.

²⁰ O araw am ji rana maniray. O vehan am akmey rala. So ikatey makdeng na no araraw no nang. Ta ori o yai ko rana a Panirsirngen.

²¹ Si masasnad rana o araraw no nang am o mapasyasi jyaken am ori o patazadangen ko.’ ”

²² Maniring pa si Pite am, “Inyo rana Isedi a tao a keylyan ko am amizngen nyo o ciring ko an. Ta si Yeso rana tao do Nasale am nitovoy na ni Ama ta do to. Oyowyat na kano mapeyzokab a vazay na rana ni Yeso am yongkad na ori do mina katovoy na sya ni Ama ta do to. So nyo ipakateneng do akman sang a vazay. Ta mina vazay na ya do tangain nyo an.

²³ O nakenakem na ni Ama ta do to no kakwa am hapen nyo si Yeso a itoro do marahet so nakenakem a tao a kapadket da sya do jyojika a wakwaken.

²⁴ Am mina kapirwa na sya avyain ni Ama ta do to. So ikabo rana no alalaw na ikawakwak na.

²⁵ Amyan so nivatvatkan ni Tawey a nipanci ni Yeso. Maniring am, ‘Ko mangday a macita si Ama ta do to do wanan ko. Am ori o ji ko a mogawi.

²⁶ Am ori o ko ikasaray so onowned a yaomazwazway jimo. Tana mawakwak o kataotao ko am o pahad ko am ahapen mo do teyngato.

²⁷ Ta mo ji mya o pahad ko a to ngyan do yanan da no nimawakwak a tao. So ji na macirapai do tana no kataotao ko, ta nipeyvazay ko na o vazay mo.

²⁸ Ta nipananao mo rana jyaken o manoyong a pangonongan ko. So sarayan ko nimo a macikaop jyaken.’ ”

²⁹ Maniring pa si Pite am, “Manga zipos, ta katenngan o ineynapo ta si Tawey a nimawakwak rana no kakwa kabobo da nya. Ta katenngan o nibobwan da nya.

³⁰ No kapeyigegen na pa do karawan ni Tawey am panoyonoywan na so ciring ni Ama ta do to. So ipakateneng na do nipanci na jya ni Ama ta do to. Ta amyan do sivosivovoong na so macipalit jya a asa ka Panirsirngen.

³¹ Katenngan na ni Tawey o kapeyvangon na ni Ama ta do to so sivovoong na a si Kizisto a nipamnekan na Panirsirngen. Maniring am, ‘Ji na mya ni Ama ta do to o pahad na to ngyan do yanan da no nimawakwak a tao. So ji na macirapai do tana no kataotao na.’

³² “Ta si Yeso am nivyay ni Ama ta do to. Ta yamen rana am yongkad no akman sang a vazay. Ta nimacita namen rana ori a nimavyay. So namen pancyan nya jinyo.

³³ So na rana nipeycyakavat a yamyan do wanan na ni Ama ta do to a yamahap so itoro na jya ni Ama ta do to a Seyzi. O nyo macita rana kano nyo mamizing sicyaikwaya am mamimin a yapo do oyowyat na no Seyzi a na nitoro ni Ama ta do to.

³⁴ O nipanci na ni Tawey am beken a o kataotao na o nipanci na a nimangay do teyngato. Ta maniring do nivatvatkan na a omagaz ji Yeso am, ‘Maniring si Ama ta do to do Panirsirngen ko am: Amlisna ka do wanan ko,

³⁵ mangay no si balinasen ko sira o macioya jimo a tao.’

³⁶ “Am ori an manga zipos a kakteh ko a Isedi a tao am naknakmen nyo an. Ta si Yeso a nyo nipadket do jyojika am yana rana nibnek ni Ama ta do to a Misayya a Panirsirngen ta.”

³⁷ Mamizing da no aro a tao am marahet o onowned da. Am ori o nipacicyan da si Pite a kano kararay na a nipamnekan ni Yeso a omlivolivon no ciriciring na. Maniring sira am, “Manga kakteh, makongo namen so wanjin eya.”

³⁸ Maniring si Pite jira am, “Mamlis kamo na so nakem a komaro do raraten nyo a kataktak da jinyo no ngaran ni Yeso Kizisto. Ta ori o ikavonas na no raraten nyo a katoro na rana nya jinyo so Seyzi ni Ama ta do to.

³⁹ Ta ori o nipanci na itoro na jinyo a kano ananak nyo a pacyangayan da no tao do peycyamahamahatawan na. Ta tamo mamimin a rarahen ni Ama ta do to a Panirsirngen ta.”

⁴⁰ So ikaro na pa no ciring na ni Pite a pakoyokoin na jira. Maniring pa am, “Inyo rana am macisyay kamo do meyraraten a tao an. Ta ori o ji nyo macizanoji do balinasen na ni Ama ta do to a tao.”

⁴¹ So ikaro da no tao a mahap rana so ipangnanao na a kataktak da rana jira. No kanang rana am omanoyong ji Yeso am nikarapan sira so kakatlwan a ranaw (3000) a tao.

⁴² So nikowyat da macinanao do nipamnekan ni Yeso a omlivolivon no ciriciring na kalwalovot da rana meynozi a kakan da so pang a makanakem si Yeso a nimawakwak.

Icicirawat da no omanoyong ji Yeso

⁴³ So ikaro no mapeyzokab a vazay da no nipamnekan na ni Yeso a omlivolivon no ciriciring na a mapacita no rako a oyowyat na ni Ama ta do to. So ikaro no tao a somavasavak nya.

⁴⁴ So ikatey yapya da no yamraralay ni Yeso a tao do kapeyyangangay da so onowned. So ikamimin da ji beywan do kangangay da do kadwan jira,

⁴⁵ kapanazang da no iheyhakaw da kano kangangay da do vahay da a kavonong da so nginangina na nizpi a itoro do kadwan jira. To da palololwa o itoro da do ikasi da tao.

⁴⁶ So ipangday da mangay a malwalovot do rako a panaralayan a meyyangangay so nakenakem. So ikasasaray da no onowned a koman so pang do kavahayan da. So icyakman da sang a mahahanghang do kanen da,

⁴⁷ kazwazway da si Ama ta do to. So ikaro no tao a manci no kapiya no icicirawat da. Am ori o nipangday da do araraw a meyparo no tao a omanoyong ji Yeso.